LESONI 14
Ena Marautaka Vakacava na Kalou Noda Sokalou?
Me vaka eda sa vulica mai na lesoni sa oti, e sega ni marautaka na lotu kece na Kalou. Ia eda rawa ni sokaloutaka na Dauveibuli ena sala e marautaka o koya. Na “lotu” cava e marautaka na Kalou? (Jemesa 1:27) Dikeva na ka e kaya na iVolatabu.
1. Me yavutaki ena cava noda sokalou?
Me yavutaki noda sokalou ena iVolatabu. E kaya o Jisu vua na Kalou: “E ka dina na nomuni vosa.” (Joni 17:17) Eso na lotu era lecava na ka dina e kune ena Vosa ni Kalou na iVolatabu. Era sosomitaka ena ivakavuvuli vakatamata kei na ivakarau vakavanua. Ia o Jiova e sega ni taleitaki ira na beca na ‘nona ivakaro.’ (Wilika Marika 7:9.) Ena dua tale na yasana, eda na vakamarautaka na lomana nida dei ena ka e tukuna na iVolatabu da qai muria sara.
2. Meda sokaloutaki Jiova vakacava?
Ni Dauveibuli o Jiova, e dodonu meda sokaloutaki koya vakatabakidua. (Vakatakila 4:11) Oya meda lomani koya qai sokaloutaki koya duadua ga, me kua ni vakayagataki na matakau, ivakatakarakara, se itaba.—Wilika Aisea 42:8.
Na noda sokalou e dodonu me ‘savasava qai vakadonuya’ o Jiova. (Roma 12:1) Kena ibalebale meda muria nona ivakatagedegede savasava. Kena ivakaraitaki, o ira na lomani Jiova era na muria qai taleitaka nona ivakatagedegede me baleta na vakawati. Era na cata na itovo ca me vaka na vakatavako, na vakayagataki ni wainimategaga se na gunu vakasivia. a
3. Na cava meda sokaloutaki Jiova vata kina kei ira eso tale?
Na noda soqoni e veimacawa, eda rawa ni “vakacaucautaki Jiova [kina]. . . ena ivavakoso.” (Same 111:1, 2) Dua na sala eda cakava kina qori, ya noda vakacaucautaka na Kalou ena sere. (Wilika Same 104:33.) E vinakata o Jiova meda tiko ena soqoni ni lomani keda, ena vukei keda tale ga meda marau me tawamudu. Nida soqoni vata meda veivakauqeti, ena yaga vei keda.
VAKEKELI
Dikeva na vuna e sega ni vakadonuya kina o Jiova na vakayagataki ni ivakatakarakara ena sokalou. Vulica na sala meda vakacaucautaka kina na Kalou.
4. Me kua ni vakayagataki na ivakatakarakara ena noda sokalou
Eda kila vakacava ni na sega ni taleitaka qori na Kalou? Sarava na VIDIO, qai veivosakitaka na taro qo.
-
Na cava e yaco nira saga eso na tamata ni Kalou ena gauna vakaivolatabu mera sokaloutaki koya nira vakayagataka na matakau?
Eso era nanuma ni rawa nira veivolekati kei na Kalou ni vakayagataki na ivakatakarakara ena nodra sokalou. Ia vakacava era na volekati koya dina nira cakava qori? Wilika Lako Yani 20:4-6 kei na Same 106:35, 36, qai veivosakitaka na taro qo:
-
Na ivakatakarakara cava o raica nira vakayagataka eso ena nodra sokalou?
-
Na cava na rai i Jiova ena vakayagataki ni ivakatakarakara?
-
Na cava nomu rai?
5. Nida sokaloutaki Jiova duadua ga, eda na sereki mai na ivakavuvuli lasu
Dikeva na sala eda na galala kina mai na ivakavuvuli lasu nida sokaloutaki Jiova ena sala e vakadonuya. Sarava na VIDIO.
Wilika Same 91:14, qai veivosakitaka na taro qo:
-
Na cava e yalataka o Jiova ni na cakava nida sokaloutaki koya duadua ga?
6. Eda sokaloutaka na Kalou ena soqoni vakaivavakoso
Eda vakacaucautaki Jiova, eda veiuqeti tale ga nida lagasere qai vakamacala ena soqoni. Wilika Same 22:22, qai veivosakitaka na taro qo:
-
O dau taleitaka mo rogoca na ivakamacala ena soqoni?
-
O na via vakamacala tale ga?
7. E marau o Jiova nida wasea na ka eda vulica
E levu na sala eda wasea kina na ka dina vakaivolatabu. Wilika Same 9:1 kei na 34:1, qai veivosakitaka na taro qo:
-
Na cava o vulica ena iVolatabu o na via tukuna vei ira eso tale?
KA ERA KAYA ESO: “E dredre meda vakamarautaka na Kalou.”
-
Cava o nanuma?
KA O VULICA
Eda vakamarautaka na Dauveibuli nida sokaloutaki koya duadua ga, eda vakacaucautaki koya ena soqoni vakaivavakoso, da qai wasea na ka eda vulica.
Railesuvi
-
Eda na kila vakacava na sala dodonu meda sokaloutaka kina na Kalou?
-
Na cava meda sokaloutaki Jiova duadua ga kina?
-
Na cava meda sokalou vata kina kei ira eso tale era via vakamarautaka na Kalou?
IKURI
Wilika ena italanoa qo “Au sa Sega ni Bobula ina Matakau,” na nona biuta e dua na marama na qaravi matakau.
“E Veisautaka na Bula na iVolatabu” (Na Vale ni Vakatawa, 1 Julai, 2011)
Vulica na sala mo rawa ni vakamacala kina ena soqoni.
“Vakacaucautaki Jiova ena iVavakoso” (Na Vale ni Vakatawa, Janueri 2019)
Raica na kena yaga vua e dua na cauravou na nona tiko ena soqoni, dina ni sega ni rawarawa vua.
E levu era raica na kauveilatai me ivakatakilakila ni lotu vaKarisito, vakacava e dodonu meda vakayagataka ena noda sokalou?
“Cava Era Sega ni Sokaloutaka Kina na Kauveilatai na iVakadinadina i Jiova?” (Ulutaga ena jw.org)
a Ena veivosakitaki qori ena so tale na lesoni.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
