LESONI 22
O na Wasea Vakacava na iTukutuku Vinaka?
Ni o vulica tiko na iVolatabu, de dua o na kaya, ‘Mera kila tale ga qo eso tale!’ Io, e dodonu ga mera kila! Ia de dua o na rere mo tukuna vei ira na ka o sa vulica. Meda dikeva mada qo na sala mo kua ni rere kina, kei na nomu wasea ena marau na itukutuku vinaka mai na iVolatabu.
1. O na wasea vakacava na ka o sa vulica vei ira o kila?
Erau tukuna na tisaipeli i Jisu: “Keirau na sega ni galuvaka na ka keirau raica kei na ka keirau rogoca.” (Cakacaka 4:20) Na kena talei vei rau na ka dina, erau via wasea kina vei ira e levu. E va tale ga qori na nomu rai? Vakacava mo tukuna ena veidokai vei ratou na lewe ni nomu vuvale kei ira nomu itokani na ka o sa vulica.—Wilika Kolosa 4:6.
Ka o rawa ni cakava
-
Ni o veitalanoa tiko kei na dua na wekamu, mo tekivutaka va qo: “Dua na ka vou au vulica ena macawa qo.”
-
Wilika e dua na tikinivolatabu ena uqeti nomu itokani e tauvimate se nuiqawaqawa.
-
Ke ra taroga eso nomu itokani vakacakacaka na nomu muanimacawa, tukuna vei ira na ka o vulica ena iVolatabu se na soqoni.
-
Vakaraitaka vei ira na nomu itokani na website na jw.org.
-
Sureta eso tale mera tomani iko ena vuli iVolatabu, se vakaraitaka vei ira na sala ni kere vuli iVolatabu ena jw.org.
2. Na cava e isausau vinaka kina mo vunau kei ira na lewe ni ivavakoso?
O ira na tisaipeli i Jisu era sega wale ga ni wasea na itukutuku vinaka vei ira era veikilai. E ‘lesia o Jisu mera lako yarua, mera liu vua ina koro kece’ mera vunau. (Luke 10:1) Ni tuvanaki va qori na vunau, era rogoca kina e levu na itukutuku vinaka. Era marautaka na tisaipeli nira vunau vata va qori. (Luke 10:17) Vakacava me nomu isausau mo vunau tale ga kei ira na lewe ni ivavakoso?
VAKEKELI
Dikeva na sala mo kua kina ni rere qai wasea yani ena marau na itukutuku vinaka.
3. Ena tokoni iko o Jiova
Eso era rere na vunau nira leqataka na ka era tukuna se na ka era na cakava o ira na rogoci ira.
-
Vakacava o rere ni o wasea na ka o sa vulica? Na vuna?
Sarava na VIDIO, qai veivosakitaka na taro tarava.
-
Na cava ratou cakava na itabagone ivakadinadina me ratou kua kina ni rere?
Wilika Aisea 41:10, qai veivosakitaka na taro qo:
-
Ni o rere na vunau, ena vukei iko vakacava na masu?
O bau kila?
Era nanuma e levu na iVakadinadina i Jiova nira na sega tu ga ni rawa ni wasea na itukutuku vinaka vei ira eso tale. Kena ivakaraitaki o Sergey, e dau beci koya qai dredre me veimaliwai kei ira na so tale. Ia e qai vulica na iVolatabu. E kaya: “Au dau rere, ia au qai tekivu wasea na ka au vulica vei ira eso tale. Au sega sara ga ni vakabauta niu rawa ni vunau ena doudou. E vaqaqacotaka tale ga na noqu vakabauta.”
4. Mo veidokai
Ni o wasea na itukutuku vinaka, mo kua ni kauaitaka ga na ka o tukuna, ia na kena itukutukuni tale ga. Wilika 2 Timoci 2:24 kei na 1 Pita 3:15, qai veivosakitaka na taro qo:
-
O na vakayagataka vakacava na tikinivolatabu qori ni o vunau?
-
De dua era na sega ni duavata kei iko o ira na wekamu, se o ira nomu itokani. Cava mo cakava? Cava mo kua ni cakava?
-
Na cava e vinaka kina mo maqosataka na nomu taro mai na nomu vosa tu ga yani vakadodonu?
5. Eda marau nida wasea na itukutuku vinaka
O Jiova e lesi Jisu me vunautaka na itukutuku vinaka. E raica vakacava o Jisu na cakacaka qori? Wilika Joni 4:34, qai veivosakitaka na taro qo:
-
Nida kania na kakana bulabula, ena vakaukauataki keda qai vakamarautaki keda. Na cava e vakatauvatana kina o Jisu me kakana na vunautaki ni itukutuku vinaka?
-
Na marau cava o rawa ni vakila ni o vunautaka na itukutuku vinaka?
Vakatutu
-
Ena soqoni ena lomanimacawa, qara na sala mo tekivutaka kina na veivosaki.
-
Vakacava mo curu ena koronivuli mo vakaitavi ena soqoni ena lomanimacawa. Qori ena vukei iko mo doudou ni wasea na ka o vulica.
-
E tiko ena lesoni qo na iwasewase “Ka Era Kaya Eso” se “Ke Taroga e Dua.” Mo vakayagataka qori mo kila kina na ka mo tukuna ke tarogi iko e dua se soli ulubale.
KE TAROGA E DUA: “Sa veisau sara ga o iko! E cava?”
-
O na wasea vakacava ena gauna qori na ka o sa vulica ena iVolatabu?
KA O VULICA
E marautaki na noda wasea na itukutuku vinaka, qai sega ni dredre.
Railesuvi
-
Na cava mo wasea kina na itukutuku vinaka?
-
O na cakava vakacava qori ena veidokai?
-
Cava mo cakava mo kua kina ni rere na vunau?
IKURI
Dikeva e va na sala o rawa ni vunau kina ni o vakayagataka na jw.org kad.
Vulica e va na itovo ena vukei iko mo vunau.
“O sa tu Vakarau Mo Gonedau ni Tamata?” (Na Vale ni Vakatawa, Seviteba 2020)
Sarava e dua na ivakaraitaki vakaivolatabu o rawa ni yaloqaqa kina mo vunau ke o gone mada ga.
Dikeva na sala o rawa ni veivosakitaka kina na iVolatabu kei ira nomu lewenivuvale era sega ni kilai Jiova.
“Uqeta na Lomadra na Wekada Era Sega ni Vakabauta” (Na Vale ni Vakatawa, 15 Maji, 2014)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
