Sa bau takali e dua drau dau veivolekati? Ena gauna dredre va qori, de dua o na vaqaqa: ‘Na cava e yaco nida mate? Eda rawa ni raici ira tale?’ Ena lesoni qo kei na kena e tarava, e veivakacegui na ka e tukuna na iVolatabu.

1. Na cava e yaco nida mate?

O Jisu e vakatauvatana na mate me vaka ga ni mocelutu e dua. O koya e mocelutu e sega ni kila na ka e yaco wavoliti koya tiko. E tautauvata vakacava na mate kei na moce? Ni dua e mate, e sega ni vakila na rarawa, e sega ni galili, se mani vakacava sara na nona volekati ratou nona vuvale se itokani. E kaya na iVolatabu ni “o ira na mate era sega sara ga ni kila e dua na ka.”​—Wilika Dauvunau 9:5.

2. E yaga vakacava nida kila na ka dina me baleta na mate?

Levu era rerevaka mera mate, era rerevaki ira mada ga na mate. Ia e rawa ni vakacegui iko na ka e kaya na iVolatabu me baleta na mate. E kaya o Jisu: “Na ka dina ena qai sereki kemuni.” (Joni 8:32) Levu na lotu era vakavuvulitaka ni bula tale tiko e dua na ka nida mate. Ia e duatani na ka e tukuna na iVolatabu. Ni dua e mate, e sega ni rarawa tale tiko. Era sega tale ga ni vakila e dua na ka. E sega ni rawa nira vakaleqai keda. E sega ni dodonu gona meda vakalomavinakataki ira se qaravi ira na mate, se meda masulaki ira.

Eso era kaya ni rawa nira veivosaki kei ira na mate. Ia e sega ni rawa qori. Me vaka eda sa vulica mai, “era sega ni kila e dua na ka na mate.” O ira era nanuma nira veivosaki tiko kei ira na wekadra era sa mate, era veivosaki tiko kei ira na timoni, era vukici ira mera vaka ga na wekadra era sa mate. Na noda kila gona na ka dina me baleti ira na mate, eda na sega ni vakacalai vei ira na timoni. E vakasalataki keda o Jiova meda kua ni veivosaki kei ira na mate, ni rawa nira vakaleqai keda na timoni.​—Wilika Vakarua 18:10-12.

3. Vulica na kedra ituvaki dina na mate

E veiyasa i vuravura, e levu e duidui na nodra rai ena ka e dau yaco nida mate. Ia e sega ni dina kece na vakabauta qori.

• Na vakabauta cava me baleti ira na mate e takalevu ena vanua o tiko kina?

 4. E yaga vakacava na ka dina me baleti ira na mate?

Nida kila na ka dina me baleti ira na mate, eda na sega ni rerevaki ira. Wilika Dauvunau 9:10, qai veivosakitaka na taro qo:

• E rawa nira vakaleqai keda na mate?

Nida kila na ka dina vakaivolatabu, eda na sega ni vakalomavinakataki ira na mate, se sokaloutaki ira. Wilika Aisea 8:19 kei na Vakatakila 4:11, qai veivosakitaka na taro qo:

• Cava o nanuma, na cava na rai i Jiova ke dua e sokaloutaki ira na mate, se kerea na nodra veivuke?

5. E vakacegui keda na ka dina me baleti ira na mate

Levu era vakabauta ni gauna era mate kina, era na vakararawataki ena vuku ni nodra itovo ca. Ia e veivakacegui nida kila ni sega ni dua e vakararawataki ena gauna e mate kina, o ira mada ga e ca sara na nodra itovo. Wilika Roma 6:7, qai veivosakitaka na taro qo:

• Ke tukuni ena iVolatabu ni bokoci se sereki na nona ivalavala ca e dua ena gauna e mate kina, cava o nanuma ena vakararawataki tale ena nona cala makawa?

Na levu ga ni noda kilai Jiova, ena matata vei keda ni sega ni dau vakararawataki ira na mate. Wilika Vakarua 32:4 kei na 1 Joni 4:8, qai veivosakitaka na taro qo:

• Vakacava na Kalou e tukuni tiko ena tikinivolatabu qo na nona itovo, ena vakadonuya mera vakararawataki na mate?

• O nanuma ni veivakacegui na ka dina me baleti ira na mate? Na vuna?

 KA O VULICA

Ni mate e dua, sa oti sara ga e kea na nona bula. Era sega ni rarawa tale tiko na mate, se mera vakaleqai keda na bula.

Railesuvi

• Na cava e yaco nida mate?

• E yaga vakacava vei keda na ka dina me baleta na mate?

• E vakacegui keda vakacava?