LESONI 36
Meda Daudina ena ka Kece
Eda dau vinakata mera daudina na noda itokani. E namaka tale ga qori o Jiova vei ira na nona itokani. Ia e sega ni rawarawa meda daudina ena vuravura e levu kina na tamata lasulasu. Na cava na yaga ni noda daudina ena ka kece?
1. Na cava e bibi kina meda daudina?
Nida daudina, eda vakaraitaka vei Jiova nida lomani koya, eda dokai koya tale ga. Nanuma tiko: O Jiova e kila vinaka na ka kece eda vakasamataka qai cakava. (Iperiu 4:13) E kila vinaka nida vakatulewataka meda daudina, e marautaka qori. E kaya na nona Vosa: “Ni sevaka o Jiova na tamata lawakica, ia e veitokani voleka kei ira na yalododonu.”—Vosa Vakaibalebale 3:32.
2. Na cava eso na sala meda daudina kina e veisiga?
E vinakata o Jiova meda “dui tukuna na ka dina.” (Sakaraia 8:16, 17) Na cava na kena ibalebale? Nida vosa tiko vei ira noda vuvale, ira eda cakacaka vata, ira na tacida, se vakailesilesi vakamatanitu, meda kua ni lasu se solia na itukutuku veivakacalai. O ira na daudina era sega ni daubutako se lawaki. (Wilika Vosa Vakaibalebale 24:28 kei na Efeso 4:28.) Era sauma tale ga na ivakacavacava kece. (Roma 13:5-7) Qori na sala eda na ‘dina kina ena ka kece.’—Iperiu 13:18.
3. Na cava na yaga ni daudina?
Ni kilai nida daudina, eda na nuitaki. Ena taqomaki kina na ivavakoso, vaka e dua na vuvale dau veilomani. Eda na marautaka na lewaeloma savasava. Na noda daudina ena vakacaucautaki tale ga kina na “ivakavuvuli ni noda iVakabula na Kalou, ena ka kece ga.”—Taito 2:10.
VAKEKELI
Dikeva na rai i Jiova ni o daudina kei na kena yaga vei iko, qai vulica na sala mo daudina kina ena ituvaki o sotava.
4. E marautaka o Jiova na daudina
Wilika Same 44:21 kei na Malakai 3:16, qai veivosakitaka na taro qo:
-
Na cava e ka vakayalomatua kina meda kua ni vunitaka na ka dina?
-
Na cava na rai i Jiova ni o tukuna na ka dina ke dredre mada ga ni o cakava?
Nira daudina na gone, era na marau na nodra itubutubu. Nida daudina, ena marau o Jiova
5. Mo daudina ena veigauna kece
E levu era vakabauta ni sega ni bibi meda daudina. Ia dikeva mada na vuna meda daudina kina ena veigauna. Sarava na VIDIO.
Wilika Iperiu 13:18, qai veivosakitaka na sala meda daudina kina . . .
-
vei ira noda vuvale.
-
e vanua ni cakacaka se koronivuli.
-
ena so tale na ituvaki.
6. E yaga meda daudina
Nida saga meda daudina, ena rawa ni basika eso na leqa. Ia qori na ka vinaka duadua meda cakava. Wilika Same 34:12-16, qai veivosakitaka na taro qo:
-
Ena yaga vakacava vei iko na daudina?
-
Ni rau daudina na veiwatini, ena qaqaco nodrau bula vakawati
-
Nira daudina na tamata cakacaka, era na nuitaki vei nodra boso
-
Nira daudina na lewenivanua, ena vinaka na kedra irogorogo vei ira na vakailesilesi vakamatanitu
KA ERA KAYA ESO: “Qori e lasu lailai ga, e sega tu ni dua na ka.”
-
Na cava o vakabauta kina ni o Jiova e cata na lasu kece?
KA O VULICA
E vinakata o Jiova mera dina na nona itokani ena ka kece era tukuna qai cakava.
Railesuvi
-
Na cava eso na sala meda daudina kina?
-
Na cava e sega ni ka vakayalomatua kina meda vunitaka na ka dina?
-
Na cava mo daudina kina e veigauna?
IKURI
Era na vakavulici luvedra vakacava na itubutubu mera daudina?
Na cava na yaga ni noda daudina ena noda yalayala?
Vakacava e dodonu meda sauma noda ivakacavacava, ke sega mada ga ni vakayagataki vinaka?
“E Dodonu Mo Saumi iVakacavacava?” (Na Vale ni Vakatawa, 1 Seviteba, 2011)
Na cava e uqeta e dua na turaga daulasulasu me veisautaka nona bula me daudina?
“Au Vulica ni Yalololoma Qai Dauveivosoti o Jiova” (Na Vale ni Vakatawa, 1 Me, 2015)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
