LESONI 44
E Vakadonuya na Kalou na Soqo Kece?
E vinakata o Jiova meda marautaka na bula, meda marautaka tale ga na soqo. Ia e vakadonuya na Kalou na soqo kece kei na olodei? Eda na vakaraitaka vakacava nida lomani Jiova ena gauna va qori?
1. Na cava e cata kina o Jiova e levu na soqo?
De dua o na kurabuitaka ni o mai vulica ni levu na soqo e sega ni yavutaki vakaivolatabu qai yavutaki ena lotu butobuto. Na soqo va qori e rairai sema ina lotu lasu. Era na rairai okati tale ga ena vakatevoro, se yavutaki ena vakabauta ni bula tale tiko e dua na ka ni mate e dua. Eso na soqo e yavutaki ena vakabauta vakatimoni se na vaqara kalougata. (Aisea 65:11) E vakasalataki ira na nona tamata o Jiova: “Ni tawasei kemuni . . . ni kua ni tara tiko na ka e sega ni savasava.”—2 Korinica 6:17. a
2. E raica vakacava o Jiova na soqo era vakacerecerei kina na tamata?
E vakasalataki keda o Jiova meda kua ni “nuitaka na tamata wale” me vaka era cakava tu e levu nikua. (Wilika Jeremaia 17:5.) Eso na olodei era vakacerecerei kina na veiliutaki kei ira na sotia. Eso tale e vakacerecerei kina na ivakatakilakila ni matanitu se tu galala. (1 Joni 5:21) Ia eso era uqeta na veika vakapolitiki se so tale na isoqosoqo. Na cava na rai i Jiova ke da vakacerecerea e dua na tamata se isoqosoqo, e veisaqasaqa na ka era cakava kei na nona inaki?
3. Na soqo cava e sega ni vakadonui?
E cata na iVolatabu na “gunu waini vakasivia, soqo ni marau vakalialia, [kei na] veisisivi gunu.” (1 Pita 4:3) Eso na soqo era sega ni lewai ira vinaka eso ra qai cakava na ka vakasisila. Meda itokani tiko ga i Jiova, e bibi meda cata na veika dukadukali.
VAKEKELI
Dikeva na sala mo vakamarautaki Jiova kina ni o vakatulewataka vinaka na soqo kei na olodei mo tiko kina.
4. Cata na soqo e beci kina o Jiova
Wilika Efeso 5:10, qai veivosakitaka na taro qo:
-
Na cava meda vakadeitaka nida via tiko ena dua na olodei se soqo?
-
Na olodei cava e kilai levu ena nomu vanua?
-
Cava nomu nanuma, e vakamarautaki Jiova?
Kena ivakaraitaki, o dau vakasamataka tu na rai ni Kalou me baleta na siganisucu? E sega ni tukuni ena iVolatabu nira solevutaka na siganisucu na dauveiqaravi i Jiova, ia e cavuta ga na nodrau siganisucu e rua rau sega ni qaravi Jiova. Wilika Vakatekivu 40:20-22 kei na Maciu 14:6-10, qai veivosakitaka na taro qo:
-
Na cava erau tautauvata kina na siganisucu qori?
-
Na cava na rai i Jiova me baleta na siganisucu ena ka o wilika qori?
Ia de dua o na vaqaqa, ‘Vakacava e kauaitaka o Jiova noqu tiko ena siganisucu kei na so tale na soqo e sega ni vakaivolatabu?’ Wilika Lako Yani 32:1-8. Sarava na VIDIO, qai veivosakitaka na taro tarava.
-
Na cava meda vakadeitaka kina na ka e vakadonuya o Jiova?
-
Eda na cakava vakacava?
Eda na kila vakacava na soqo e cata na Kalou?
-
Vakacava e yavutaki vakaivolatabu? Ke sega, vaqaqa se tekivu vakacava.
-
E vakacerecerei kina na tamata, isoqosoqo, se na ivakatakilakila ni matanitu? Eda vakacerecerei Jiova duadua ga, da qai nuitaka ni o koya ga ena walia na leqa e vuravura.
-
E veisaqasaqa na kena itovo kei na ivakatagedegede vakaivolatabu? E bibi me savasava tiko ga noda itovo.
5. Vukea eso tale mera doka na nomu vakabauta
Ena rawa ni dredre mo vakatulewa nira vakasaurarataki iko eso mo vakaitavi ena soqo e cata o Jiova. Mo vosovoso qai maqosa ni o vakamacalataka na nomu vakatulewa. Raica e dua na kena ivakaraitaki ni o sarava na VIDIO.
Wilika Maciu 7:12, qai veivosakitaka na taro qo:
-
Mai na tikinivolatabu qo, vakacava e dodonu mo vakatulewataka vei ira na wekamu ni tabu mera solevutaka na olodei?
-
Dina ni o sega ni rawa ni tiko ena soqo, ia o na vakaraitaka vakacava vei ira na wekamu ni o se lomani ira tiko ga qai mareqeti ira?
6. E vinakata o Jiova meda marau
E vinakata o Jiova meda marau kei ira noda vuvale, wili kina o ira noda itokani. Wilika Dauvunau 8:15, qai veivosakitaka na taro qo:
-
Eda kila vakacava ena tikinivolatabu qo ni vinakata o Jiova meda marau?
E vinakata o Jiova mera marau nona tamata. Sarava na VIDIO mo vakadinadinataka qori ena dua na soqo ni veimatanitu.
Wilika Kalatia 6:10, qai veivosakitaka na taro qo:
-
E tukuni sara meda solevutaka na olodei lelevu meda ‘caka vinaka kina’ vei ira eso tale?
-
Na soli ka vakacava e vakavu marau vei iko? Na kena e tukuni mo solia ena dua na olodei, se na kena o solia mai vu ni lomamu?
-
Ena so na gauna, e levu na iVakadinadina i Jiova era dau tuvanaka eso na ka vei luvedra, mera soli iloloma kina. Ke o vakaluveni, na cava eso na ka vinaka o rawa ni cakava vei ratou?
KA ERA KAYA ESO: “E sega ni bibi na vanua e yavutaki kina na olodei. E bibi ga meda marau vakavuvale kei ira na itokani.”
-
Cava o na kaya?
KA O VULICA
E vinakata o Jiova meda marau kei ira noda vuvale, kei ira noda itokani. Ia e vinakata tale ga meda cata na soqo e cata o koya.
Railesuvi
-
Na cava meda taroga meda kila kina na soqo e cata o Jiova?
-
Eda na tukuna vakacava vei ira noda vuvale kei ira noda itokani, noda vakatulewa me baleta na olodei?
-
Eda kila vakacava ni vinakata o Jiova meda marau?
IKURI
Dikeva eso na olodei era sega ni solevutaka na lotu vaKarisito.
“Cava Era Sega ni Dau Solevutaka Kina na iVakadinadina i Jiova Eso na Olodei?” (Ulutaga ena jw.org)
Raica e va na vuna eda vakabauta kina ni cata na Kalou na siganisucu.
“Na Cava Era Sega ni Soqova Kina na iVakadinadina i Jiova na Siganisucu?” (Ulutaga ena jw.org)
Dikeva ni o ira na gone era lomani Jiova era rawa ni vakamarautaki koya ena gauna ni olodei.
Era vakatulewataka e vica vata na milioni na lotu vaKarisito nira na sega ni solevutaka na Kirisimasi. Na cava nodra rai ena nodra vakatulewa?
“Era Kunea e Dua na ka e Vinaka Cake Sara” (Na Vale ni Vakatawa, 1 Tiseba, 2012)
a Raica na iKuri ni iVakamacala 5 mo kila na ka mo cakava nira solevutaka na soqo se olodei eso.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
