LESONI 49
Ena Marau Vakacava Nomu Vuvale?—Wase 1
Era nuitaka tu na veiwatini vou ni na tawamudu na marau era vakila ena siga ni nodra vakamau. Ena rawa ni yaco qori. Era vakadinadinataka qori na lotu vaKarisito e sa dede na nodra vakawati, era saga tale ga vagumatua mera muria na ivakasala ena iVolatabu.
1. Na cava na ivakasala vakaivolatabu vei ira na tagane vakawati?
O Jiova e lesia na tagane vakawati me ulu ni vuvale. (Wilika Efeso 5:23.) E namaka o Jiova ni vakatulewa ena cakava ena yaga ena vuvale. E tukuna na iVolatabu vei ira na tagane vakawati: “Ni lomani ira tiko ga na watimuni.” (Efeso 5:25) Na cava na kena ibalebale qori? Na tagane vakawati dauloloma ena kauaitaki watina e vale se matanalevu. Ena taqomaki koya, ena solia tale ga nona vinaka me qaravi koya kei na veika e gadreva. (1 Timoci 5:8) Koya e bibi duadua, ena kauaitaka nona bula vakayalo o watina. (Maciu 4:4) Kena ivakaraitaki, ena masu qai wili iVolatabu vata kei watina. Ni kauaitaki watina vakayalololoma o tagane, ena dei tiko ga nona veiwekani kei Jiova.—Wilika 1 Pita 3:7.
2. Na cava na ivakasala vakaivolatabu vei ira na yalewa vakawati?
E kaya na Vosa ni Kalou vei ira na yalewa vakawati ‘mera dokai watidra vakalevu.’ (Efeso 5:33) Ena cakava vakacava qori? Me vakasamataka na itovo vinaka i watina, kei na sasaga e cakava me qaravi koya kina kei ratou na gone. Ena vakaraitaka tale ga nona veidokai ni tokona na vakatulewa nei watina, ena vosa vakayalovinaka vua, ena tukuna na veika vinaka me baleti koya, ke sega mada ga ni tiko ena dina.
3. Rau na vaqaqacotaka vakacava na veiwatini na nodrau vakawati?
E tukuna na iVolatabu me baleti ira na vakawati: “Me rau sa na lewe dua ga.” (Maciu 19:5) Kena ibalebale, rau na valuta na ituvaki ena rawa ni vakaleqa na nodrau veivolekati. Rau cakava qori ni rau dau veimaliwai vakalevu, rau veivosaki vakadodonu, rau qai talaucaka na lomadrau kei na nodrau nanuma. Rau na raica ni bibi duadua na kedrau isa kei Jiova, sega tale ga ni dua. Rau na qarauna tale ga me rau kua ni domona tale e dua.
VAKEKELI
Dikeva na ivakavuvuli vakaivolatabu ena vaqaqacotaka na bula vakawati.
4. Tagane vakawati, mo lomani watimu qai karoni koya
E kaya na iVolatabu “vei ira na tagane vakawati mera lomani watidra me vaka ga nodra lomana na yagodra.” (Efeso 5:28, 29) Na cava na kena ibalebale? Sarava na VIDIO, qai veivosakitaka na taro tarava.
-
Na cava eso na sala ena vakaraitaka kina o tagane vakawati ni lomani watina qai karoni koya?
Wilika Kolosa 3:12, qai veivosakitaka na taro qo:
-
Ena vakaraitaka vakacava o tagane na itovo qori ena bula vakawati?
5. Yalewa vakawati, lomani watimu qai dokai koya
E tukuna na iVolatabu vei ira na yalewa vakawati mera dokai watidra ke ra qaravi Jiova se sega. Wilika 1 Pita 3:1, 2, qai veivosakitaka na taro qo:
-
Ke sega ni tiko ena dina o watimu, o na vinakata sara ga me qaravi Jiova. Na cava o nanuma ni na yaga vakalevu, na nomu vunau tiko ga vua se nomu vakaraitaka na itovo vinaka kei na nomu veidokai? Na vuna?
E rawa ni rau vakatulewa vinaka na veiwatini. Eso na gauna ena sega ni duavata kei watina o yalewa. E rawa ni tukuna na nona nanuma ena veidokai qai vosa ena yalovinaka. Ia me nanuma tiko ni o Jiova e lesi watina me vakatulewataka na ka ena vinaka ena vuvale. E dodonu me solia na nona vinaka taucoko me tokona na vakatulewa nei watina. Ni cakava qori, ena vakilai na marau ena vuvale. Wilika 1 Pita 3:3-5, qai veivosakitaka na taro qo:
-
Na cava na rai i Jiova ke dokai watina o yalewa vakawati?
6. O rawa ni walia na leqa ena bula vakawati
E sega ni dua na vakawati e totoka vakaoti. Erau na cakacaka vata gona na veiwatini me rau walia na leqa e basika. Sarava na VIDIO, qai veivosakitaka na taro tarava.
-
Ena vidio, na cava eso na ivakatakilakila e dusia ni rau sa sega ni veivolekati na veiwatini?
-
Na cava rau cakava me kaukaua tale na nodrau ivau ni vakawati?
Wilika 1 Korinica 10:24 kei na Kolosa 3:13. Ni wiliki oti na tikinivolatabu yadua, veivosakitaka na taro qo:
-
Ena vaqaqacotaki vakacava na bula vakawati ni muri na ivakasala qo?
E tukuna na iVolatabu ni dodonu meda dau veirokorokovi. E okati kina nomu doka e dua, qai vosa vakayalovinaka vua. Wilika Roma 12:10, qai veivosakitaka na taro qo:
-
E dodonu me rau veiwaraki na veiwatini se o cei me vakaraitaka e liu na veirokorokovi? Na vuna?
KA ERA KAYA ESO: “Keirau sa sega ni veivolekati me vaka e liu.”
-
O na vakamacalataka vakacava ni iVolatabu ga ena vukei ira?
KA O VULICA
Erau na marau na veiwatini ni rau veilomani, veidokai, qai muria na ivakavuvuli vakaivolatabu.
Railesuvi
-
Na cava me cakava o tagane me marau kina na vakawati?
-
Na cava me cakava o yalewa me marau kina na vakawati?
-
Ke o vakawati, na ivakavuvuli vakaivolatabu cava ena vaqaqacotaka na nomudrau vakawati?
IKURI
Dikeva na sala me marautaki kina na bula vakavuvale.
Rogoca ena sere qo na yaga ni kena muri na ivakasala vakaivolatabu ena nomu vakawati.
Dikeva na ibalebale ni nona vakamalumalumu o yalewa vei watina.
“Na Vuna Mera Vakamalumalumu Kina na Yalewa ina Veiliutaki?” (Na Vale ni Vakatawa, 15 Me, 2010)
Raica na sala rau walia kina e dua na veiwatini nodrau leqa ni bula vakawati.
E Vinaka Tale Neirau Bula Vakawati ena Veivuke ni Kalou (5:14)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
