LESONI 59
O Rawa ni Vosota na Veivakacacani
Sa voleka meda tusaqati na lotu vaKarisito kece, se vakacacani. Vakacava e dodonu meda kidroataka?
1. Na cava meda namaka kina na veivakacacani?
E tukuna vakamatata na iVolatabu: “O ira kece era via qarava na Kalou ena vuku i Karisito Jisu era na vakacacani tale ga.” (2 Timoci 3:12) E vakacacani o Jisu ni sega ni via tokona na vuravura i Setani. Nida cakava tale ga qori, eda na sega ni kidroataka gona na nodra vakacacani keda na veimatanitu.—Joni 15:18, 19.
2. Eda na vakarautaki keda vakacava ena veivakacacani?
E bibi meda vaqaqacotaka na noda nuitaki Jiova ena gauna qo. Me tiko na gauna meda masu kina vua e veisiga qai wilika na iVolatabu. Meda dau tiko wasoma tale ga ena soqoni. Qori ena vukei iko mo yaloqaqa, ke ra vakacacani iko mada ga na nomu lewenivuvale. E dau vakacacani na yapositolo o Paula, e vola: “E dau vukei au o Jiova, au na sega ni rere.”—Iperiu 13:6.
Eda na yaloqaqa tale ga nida dau vunau wasoma. Nida vunau vakalevu, ena vakavulici keda meda dau nuitaki Jiova da qai sega ni rerevaka na tamata. (Vosa Vakaibalebale 29:25) Ke o sa yaloqaqa rawa qo na vunau, o na vunau tiko ga ke vakatabuya mada ga na matanitu na noda cakacaka.—1 Cesalonaika 2:2.
3. Ena yaga vakacava nida vosota na veivakacacani?
E dau mosimosi na veivakacacani, ia nida vosota ena qai kaukaua ga na noda vakabauta. Eda volekati Jiova nida vakila na nona veitokoni ena gauna eda yalolailai kina. (Wilika Jemesa 1:2-4.) E mositi Jiova nida rarawa, ia e marau nida vosota. E kaya na iVolatabu: “Ke oni vosota na ka rarawa ena vuku ni nomuni caka vinaka, na nomuni vosota e vinaka vua na Kalou.” (1 Pita 2:20) Ke da vosota tiko ga ena yalodina, ena vakalougatataki keda o Jiova ena bula tawamudu ena vuravura vou, sa na sega ni dua me tusaqata na sokalou dina.—Maciu 24:13.
VAKEKELI
Dikeva na vuna o rawa ni yalodina tiko ga kina vei Jiova ni o vakacacani kei na kena yaga.
4. O rawa ni vosota nodra veitusaqati na lewenivuvale
E kila vinaka o Jisu ni so noda lewenivuvale era na cata noda qaravi Jiova. Wilika Maciu 10:34-36, qai veivosakitaka na taro qo:
-
Cava e rawa ni yaco ke dua na lewenivuvale e vakatulewataka me qaravi Jiova?
Mo raica e dua na kena ivakaraitaki, sarava na VIDIO, qai veivosakitaka na taro tarava.
-
Na cava o na cakava ke dua na wekamu se itokani e via tarova nomu qaravi Jiova?
Wilika Same 27:10 kei na Marika 10:29, 30. Ni wiliki oti na tikinivolatabu yadua, veivosakitaka na taro qo:
-
Ena yaga vakacava vei iko na vosa ni yalayala qori ni o tusaqati vei ira nomu lewenivuvale se itokani?
5. Qaravi Jiova tiko ga ni o vakacacani
E vinakati na yaloqaqa meda qaravi Jiova tiko ga ke ra saga eso mera tarovi keda. Sarava na VIDIO, qai veivosakitaka na taro tarava.
-
E vakayaloqaqataki iko vakacava na vidio qo?
Wilika Cakacaka 5:27-29 kei na Iperiu 10:24, 25. Ni wiliki oti na tikinivolatabu yadua, veivosakitaka na taro qo:
-
Na cava e bibi kina meda qaravi Jiova tiko ga ke vakatabui na cakacaka vakavunau se na soqoni?
6. Ena vukei iko o Jiova mo vosota
Era tusaqati na iVakadinadina i Jiova e duidui na nodra yabaki kei na nodra isususu, ia era yalodina tiko ga vei Jiova. Mo kila na ka e vukei ira, sarava na VIDIO, qai veivosakitaka na taro tarava.
-
Ena vidio, era vosota vakacava na iVakadinadina?
Wilika Roma 8:35, 37-39 kei na Filipai 4:13. Ni wiliki oti na tikinivolatabu yadua, veivosakitaka na taro qo:
-
O vakadeitaka vakacava ena tikinivolatabu qo ni o rawa ni vosota na veivakatovolei?
Wilika Maciu 5:10-12, qai veivosakitaka na taro qo:
-
Na cava mo marau tiko ga kina ke o vakacacani?
E vicavata na milioni era qaravi Jiova, era vosota ena yalodina na veivakacacani. O rawa tale ga ni cakava qori!
KA ERA KAYA ESO: “Au sa sega ni rawa ni vosota na veivakacacani.”
-
Na tikinivolatabu cava o rawa ni vakayaloqaqataki ira kina?
KA O VULICA
E kauaitaka o Jiova na noda sasaga meda qaravi koya nida vakacacani. Ena nona veivuke eda rawa ni vosota ena yalodina!
Railesuvi
-
Na cava meda namaka kina na lotu vaKarisito na veivakacacani?
-
O na rawa ni vakarautaki iko vakacava ena gauna qo ena veivakacacani?
-
O na nuidei vakacava ni o rawa ni qaravi Jiova ke o vakatovolei?
IKURI
Sarava na nona vukea e dua na tacida itabagone o Jiova me vosota e valeniveivesu.
Dikeva na nodrau yalodina tiko ga e dua na veiwatini ni rau vakacacani.
Vulica na sala mo vosota kina na veivakacacani.
“Mo Vakarautaki Iko ena Veivakacacani” (Na Vale ni Vakatawa, Julai 2019)
Meda raica vakacava nodra veitusaqati na lewenivuvale? Eda na vosota vakacava?