Vei Kemuni na Dauwiliwili:

“Mai muri au.” (Marika 10:21) Ni cavuta na vosa ya o Jisu Karisito, sa veisureti sara tiko ga meda muri koya. Vakacava o sa vakaio ena veisureti qori? Ena tara sara ga nomu bula ke o cakava vaka kina. Na vuna?

A tala mai vuravura o Jiova na Luvena duabau me cabora nona bula me isoro. (Joni 3:16) E sega wale ga ni mai mate ena vukuda, e vakaraitaka tale ga na ivakarau ni bula meda muria. A yalodina qai vakamarautaki Tamana ena ka kece e cakava. E vakaraitaka tale ga na ka meda cakava meda ucui Tamana kina. Na ka kece a cakava o Luvena kei na ka e tukuna, e vakavotuya vinaka na itovo kei na inaki i Tamana.​—Joni 14:9.

E tukuna na iVolatabu ni o Jisu “na ivakarau,” meda “muria na weniyavana.” (1 Pita 2:21) Meda muria voleka sara na weniyavai Karisito meda toro volekati Jiova kina, me vakainaki noda bula ena gauna qo, da qai muria tiko ga na sala ina bula tawamudu.

Ena vinakati gona meda kila vinaka na ivakarau ni bula i Jisu e vuravura nida tekivuna na ilakolako qo. Meda vulica vinaka na kena itukutuku e volai ena iVolatabu. Ena yaga noda sasaga meda muri koya ke da vakasamataka vakatitobu na veika a tukuna, na veika a cakava, kei na sala eda rawa ni vakatotomuri koya kina ena tikina qo.

Me yaga mada ga na ivola qo mo vakatitobutaka kina nomu lomani Jiova kei Jisu. Me uqeti iko tale ga na loloma qori mo muria sara na weniyavana, mo vakamarautaki Jiova kina ena gauna qo me tawamudu.