1, 2. Na cava e cakava o Jisu ena iotioti ni bogi e tiko kina kei iratou nona yapositolo, na cava e bibi kina vua na gauna ya?

 E KILA tiko o Jisu ni sa nona iotioti ni bogi kei iratou nona yapositolo na bogi eratou soqoni vata kina ena dua na tabavale e cake e Jerusalemi. Sa roro mai na gauna me lesu kina vei Tamana. Sa vo ga e vica na aua me vesu kina, ena qai vakatovolei nona yalodina ena ivakatagedegede se sega ni bau vakila. Ia e kauaitaka tiko ga o Jisu na veika me baleti iratou nona yapositolo, dina ni sa vakarau vakamatei.

² Sa tukuna oti vei iratou na nona yapositolo ni sa na vakarau biuti iratou, ia se vo tiko e vica na ka me vakayaloqaqataki iratou kina ena veika dredre eratou na sotava. E vakavulici iratou gona ena so na ivakavuvuli bibi ena gauna lekaleka qori me ratou na yalodina tiko kina. Ni vakatauvatani kei na vo ni gauna eratou dau veivosaki kina, e duatani toka na vosa e tauca ena gauna qo, ni talaucaka sara ga na lomana qai uqeti iratou. Na cava e sega ni nanumi koya ga kina o Jisu ena gauna qori ia e kauaitaki iratou vakalevu nona yapositolo? Na cava e bibi kina vua na iotioti ni vica na aua e tiko kina kei iratou? Ena saumi qori ena dua ga na vosa, loloma. E lomani iratou vakalevu na nona yapositolo.

3. Eda kila vakacava ni a sega ni waraka o Jisu me qai vakaraitaka ga nona lomani iratou nona imuri ena iotioti ni bogi?

³ A uqeti na yapositolo o Joni ni sa oti e vica na yabaki me vola na ka a yaco ena bogi ya: “Ena nona kila ni bera na solevu ni lakosivia ni sa voleka nona gauna me biuti vuravura kina me lako vei Tamana, sa qai lomani iratou ga vakalevu me yacova sara na iotioti.” (Joni 13:1) A sega ni  waraka o Jisu me qai vakaraitaka ga ena bogi ya na nona lomani iratou na “nona imuri.” Ia ena gauna kece ni nona cakacaka vakaitalatala e levu na gauna e vakaraitaka kina ni lomani ira nona tisaipeli. Ena vinaka meda veivosakitaka mada eso na kena ivakaraitaki. Ke da vakatotomuri koya, eda na vakaraitaka nida nona tisaipeli dina.

4, 5. (a) Na cava me vosoti iratou kina nona tisaipeli o Jisu? (b) Na cava a cakava o Jisu ni ratou sega ni yadra tiko na tolu nona yapositolo ena iteitei o Kecisemani?

⁴ Erau veisemati na loloma kei na vosota. “Na loloma e vosota vakadede,” e tukuni ena 1 Korinica 13:4. Na vosota vakadede qo e okati kina na noda dau veivosoti. Vinakati beka vei Jisu me yalovosovoso ni tiko kei iratou nona tisaipeli? Io! Eda raica ena Wase 3 ni berabera nodratou bucina na yalomalumalumu na nona yapositolo. Eratou dau veibataka se o cei e levu duadua. Na cava a cakava o Jisu? A cudru beka qai cati iratou? Sega a dau vakamacala ga vakayalovinaka, wili kina na nodratou “veibataka” tale se o cei e levu duadua ena iotioti ni bogi e tiko kina kei iratou!​—Luke 22:24-30; Maciu 20:20-28; Marika 9:33-37.

⁵ Ena bogi vata ga ya, a vakatovolei tale na vosovoso i Jisu ni ratou tomani koya na le 11 na yapositolo yalodina ina iteitei o Kecisemani. E biuti iratou mai na le walu, qai kauti Pita, Jemesa, kei Joni e loma ni iteitei. E kaya vei iratou: “Sega ni tukuni rawa na rarawa ni lomaqu. Dou tiko eke me datou yadra tiko.” E toso vakalailai i liu qai masu vagumatua mai vu ni lomana. A balavu toka nona masu, oti sa qai lesu vei iratou na le tolu? Na cava e raica ni lesu yani? Ena gauna dredre ni veivakatovolei qo, e lutu sara tu ga nodratou moce! Vakacava a karaci iratou? Sega, e vosota ga qai vakauqeti iratou. Na nona vosa vakayalovinaka e vakaraitaka ni kila na nodratou nuiqawaqawa kei  na nodratou malumalumu. * E kaya: “E gu na yalo, ia sa malumalumu ga na yago.” Ena gauna tolutolu a lesu yani kina o Jisu, eratou moce tiko ga na nona yapositolo, ia a vosoti iratou tiko ga!​—Maciu 26:36-46.

6. Eda na vakatotomuri Jisu vakacava ena ka eda cakava vei ira eso tale?

⁶ E veivakayaloqaqataki dina ni nuitaki iratou tiko ga nona yapositolo o Jisu. E yaga na nona vosota ni ratou vulica kina na tagane yalodina ya na bibi ni yalomalumalumu kei na yadrayadravaki. (1 Pita 3:8; 4:7) Eda na vakatotomuri Jisu vakacava ena ka eda cakava vei ira eso tale? Bibi mera dau vosota na qase ni ivavakoso. De sotava na leqa e dua na tacida qai lai raica e dua na qase ena gauna sara ga e oca kina se lomaleqataka tiko e dua na ka. Ena so na gauna, ena berabera mera muria na ivakasala o ira na kerea na veivuke. Ia na qase ni ivavakoso e vosota, ena veivakavulici ena “yalomalua” qai “lomana na qelenisipi.” (2 Timoci 2:24, 25; Cakacaka 20:28, 29) Ena yaga tale ga mera muria na itubutubu na vosovoso i Jisu, ni na berabera ena so na gauna na nodra muria na gone na ivakasala se na veivakadodonutaki. Ke ra dauloloma ra qai dau vosota, era na sega ni soro na itubutubu nira vakavulici luvedra. Ena vakaicocovitaki gona na vosota.​—Same 127:3.

7. E kauaitaka vakacava o Jisu na veika vakayago eratou gadreva nona tisaipeli?

⁷ Ena laurai na loloma nida sega ni nanumi keda ga. (1 Joni 3:17, 18) Eda na ‘sega ni kauaitaka ga na ka me baleti keda.’ (1 Korinica 13:5) E uqeti Jisu na loloma me  kauaitaka na veika vakayago eratou gadreva nona tisaipeli. Ni bera ni ratou tukuna na ka eratou gadreva, sa dau vakaliuliu o Jisu me vakacegui iratou. Ena gauna e raica kina ni ratou sa oca, e vakatura me ratou lako vata ‘ena dua na vanua lala me ratou vakacegu mada vakalailai.’ (Marika 6:31) E vakani iratou kei na vica vata na udolu era rogoci koya ni kila nira viakana.​—Maciu 14:19, 20; 15:35-37.

8, 9. (a) Na cava e vakaraitaka ni kila o Jisu na veika vakayalo eratou gadreva nona tisaipeli, qai vakacegui iratou vakacava? (b) E vakaraitaka vakacava o Jisu ni kauaitaka vakalevu na veika me baleti tinana ena gauna sa lauvako tu kina ena kaunirarawa?

⁸ E vakacegui iratou tale ga nona tisaipeli ena veika vakayalo eratou gadreva. (Maciu 4:4; 5:3) E dau kauaitaki iratou vakalevu ena nona veivakavulici. Dua na inaki bibi ni nona vunau ena ulunivanua me ratou vuli kina na nona tisaipeli. (Maciu 5:1, 2, 13-16) Ni vakayagataka na vosa vakatautauvata ena nona veivakavulici, “e dau qai vakamacalataka na kena ibalebale vei iratou na nona tisaipeli.”  (Marika 4:34) E sa tukuna oti tu o Jisu ni na digia na “dauveiqaravi e yalodina e vuku” me vakani ira vinaka vakayalo na nona imuri ena iotioti ni veisiga. Na dauveiqaravi qo e vakatayaloyalotaka e dua na ilawalawa lailai era taci Jisu era lumuti ena yalo tabu. O ira qo era bula tiko e vuravura era “vakani ira” tiko na imuri i Jisu “ena kena gauna donu” me tekivu sara mai ena 1919 S.K.​—Maciu 24:45.

⁹ E veilauti dina na nona kauaitaka o Jisu na nodra bula vakayalo na wekana ena siga e mate kina. Raitayaloyalotaka mada qo. Sa vako tu ena kaunirarawa, dua na ka na kena mosi. Me rawa ni cegu, ena vinakati me vakayagataka na yavana me tosoi koya cake. E macala ga ni na mosi sara qori, ni na vakilai ena vanua e vako tu e yavana na kena bi ena gauna e sasaga cegu kina. Ena mosi tale ga ni rau veimasi kei na kau na dakuna mavoa. Ena dredre tale ga me vosa, ena vutu vakalevu ni na vinakati me cegu. Ia ni vakarau cavuka nona icegu, se tukuna ga na ka e vakaraitaka ni lomani tinana vakalevu, o Meri. Ni raici Meri kei Joni ni rau duri voleka tu, mani kaya vei tinana ena domolevu era rogoca tale ga na tu e kea:  “Raica! Na Luvemu!” E qai kaya vei Joni: “Raica! Na tinamu!” (Joni 19:26, 27) E kila o Jisu ni na sega wale ga ni qarava na nona yapositolo yalodina na veika vakayago me baleti Meri, na veika vakayalo tale ga. *

10. Era na vakatotomuri Jisu vakacava na itubutubu ena nodra vakarautaka na veika me baleti ira na luvedra?

¹⁰ Ena yaga mera dau vakasamataka na itubutubu yalololoma na ivakaraitaki i Jisu. Na tama e lomani ira dina nona vuvale ena vakarautaka na veika vakayago me baleti ira. (1 Timoci 5:8) Ena raica tale ga o ulunivuvale me tiko na gauna ni nodratou vakacegu se me ratou vakaitavi ena ka ni veivakamarautaki. E bibi sara mera vakarautaka na itubutubu lotu vaKarisito na veika vakayalo era gadreva na luvedra. Era na cakava vakacava? Mera tuvanaka na vuli iVolatabu vakavuvale e veimacawa, ra qai saga me veivakayaloqaqataki, me marautaki tale ga. (Vakarua 6:6, 7) Ena nodrau ivakaraitaki kei na veika erau tukuna na itubutubu, era na vulica kina na gone na bibi ni cakacaka vakaitalatala, era na kila tale ga ni tiki bibi ni noda sokalou na vakavakarau kei na tiko ena soqoni.​—Iperiu 10:24, 25.

11. Na cava e vakavulica o Jisu vei iratou nona imuri me baleta na veivosoti?

¹¹ Na veivosoti e ivakaraitaki tale ga ni noda dau loloma. (Kolosa 3:13, 14) E kaya na 1 Korinica 13:5 ni “sega ni katona na ca” na loloma. Sa vakavulici ira vakavica vata nona imuri o Jisu ni bibi na veivosoti. E kaya “me kua ni vakavitu” ga nodra veivosoti, “ia me vakavitusagavulukavitu”​—kena ibalebale me kua ni yalani. (Maciu 18:21, 22) E vakavulica ni dodonu me vosoti o koya e veivutunitaka nona ivalavala ca ni vunauci. (Luke 17:3, 4) E bulataka sara ga o  Jisu na ka e vakavulica, e duidui gona vei ira na Farisi dau veivakaisini nira dau vosa wale ga. (Maciu 23:2-4) Meda raica mada na nona yalorawarawa o Jisu me vosota e dua sara ga na nona itokani voleka e vakararawataki koya.

12, 13. (a) Na cava a cakava o Pita ena bogi a vesu kina o Jisu? (b) Na cava a cakava o Jisu ni oti nona vakaturi me vakaraitaka kina ni sega wale ga ni vunautaka na veivosoti, e cakava sara ga?

¹² E yapositolo dau loloma o Pita, e yalototolo tale ga ena so na gauna ia erau veivolekati sara kei Jisu. E vakacolati koya ena so tale na itavi o Jisu ni raica vua eso na itovo vinaka. Eso na cakamana eratou raica ga o Pita, Jemesa, kei Joni, eratou sega ni raica na vo ni yapositolo. (Maciu 17:1, 2; Luke 8:49-55) Eda sa raica mai ni o Pita sara ga e dua vei iratou na yapositolo a lako vata kei Jisu ina iteitei o Kecisemani ena bogi a vesu kina. Ena bogi vata qori, eratou a biuti Jisu na yapositolo, wili kina o Pita. Ia a yaloqaqa o Pita me mai duri tu e tuba ena gauna e veilewaitaki tiko kina vakatawadodonu o Jisu. Ena levu ni nona rere a qai cakava o Pita e dua na cala bibi, e cakitaki Jisu vakatolu! (Maciu 26:69-75) Na cava a qai cakava o Jisu? Na cava o na cakava ke cakitaki iko va ya e dua na nomu itokani voleka?

¹³ A tu vakarau o Jisu me vosoti Pita. E kila ni rarawataka vakalevu o Pita na nona cala. Ena nona veivutuni “e sega ni kinoci koya rawa . . . ena nona sa tabalaka na tagi.” (Marika 14:72) A rairai vei Pita o Jisu ena siga e vakaturi kina, de dua me vakayaloqaqataki koya. (Luke 24:34; 1 Korinica 15:5) Ni oti tale e rauta ni rua na vula, a vakadonuya o Jisu me liutaka sara ga o Pita na vunau vei ira na ilala levu era tiko e Jerusalemi ena siga ni Penitiko. (Cakacaka 2:14-40) Kua ni guilecava ni sega tale ga ni yalocataki iratou na vo ni yapositolo o Jisu ena nodratou drovaki koya. Ni vakaturi oti se kacivi iratou tiko ga “taciqu.” (Maciu 28:10) E macala ni sega wale ga ni vunautaka o Jisu na veivosoti, e cakava sara ga.

14. Na cava meda veivosoti kina, eda na yalorawarawa vakacava ni cakava qori?

 ¹⁴ Nida tisaipeli i Karisito, e dodonu meda dau veivosoti. Na vuna? Eda sega ni uasivi me vakataki Jisu, era sega tale ga ni uasivi o ira era cala vei keda. Eda na tarabe gona ena so na gauna ena ka eda tukuna kei na ka eda cakava. (Roma 3:23; Jemesa 3:2) Me vosoti keda na Kalou, e bibi meda vosoti ira era cala vei keda ke tiko na kena yavu vinaka. (Marika 11:25) Eda na vakaraitaka vakacava nida yalorawarawa meda veivosoti? Levu na gauna ena uqeti keda na loloma meda raibaleta na cala lalai kei na nodra malumalumu na so. (1 Pita 4:8) Ni veivutuni dina o koya e cala vei keda me vakataki Pita, e dodonu meda vakatotomuri Jisu ena nona yalorawarawa me veivosoti. E ka vakayalomatua gona meda kua ni katona na cala, meda cavuraka mai lomada. (Efeso 4:32) Nida cakava ya, eda na uqeta na veiyaloni ena ivavakoso, eda na lomavakacegu, ena galala noda vakasama.​—1 Pita 3:11.

15. Na cava e nuitaki iratou tiko ga kina nona tisaipeli o Jisu, dina ni ratou dau cala?

¹⁵ Erau salavata na loloma kei na veinuitaki. Na loloma e “vakabauta na ka kece.” * (1 Korinica 13:7) E uqeti Jisu na loloma me nuitaki iratou tiko ga nona tisaipeli, dina ni tiko nodratou malumalumu. E nuitaki iratou qai vakabauta ni ratou lomani Jiova mai vu ni lomadratou, eratou via cakava tale ga na lomana. Ena gauna mada ga eratou cala kina, a donu tu ga na rai i Jisu. Dua mada qo, na nodrau vakayagataki tinadrau o Jemesa kei Joni me kerea vei Jisu me rau dabe vata kei koya ena nona Matanitu, a sega ni vakatitiqataka o  Jisu na nodrau yalodina, se vakatalai rau me rau kua ni yapositolo.​—Maciu 20:20-28.

16, 17. Na itavi cava e lesia vei iratou nona tisaipeli o Jisu?

¹⁶ E vakaraitaka o Jisu ni nuitaki iratou nona tisaipeli ena nona vakacolati iratou ena duidui itavi. Ena rua na gauna e vakarautaka kina vakacakamana na kakana, a lesi iratou nona tisaipeli o Jisu me ratou wasea yani vei ira na ilala levu era tiko e kea. (Maciu 14:19; 15:36) A talai Pita kei Joni i Jerusalemi me rau vakarautaka na veika e gadrevi ena iotioti ni kanavata ni Lakosivia. Erau vakarautaka na luvenisipi, waini, na madrai sega ni vakaleveni, na draunikau wiwi kei na so tale na ka. E bibi dina na ilesilesi qo, ni vinakata o Jisu me muri na ka e vakaroti ena Lawa a soli vei Mosese me baleta na soqo ni Lakosivia. Ena yakavi tiko ga ya, a vakayagataka o Jisu na waini kei na madrai sega ni vakaleveni me rau ivakatakarakara bibi ena gauna e tauyavutaka kina na iVakananumi ni nona mate.​—Maciu 26:17-19; Luke 22:8, 13.

¹⁷ E nuitaki iratou tale ga nona tisaipeli o Jisu me ratou cakava eso tale na ilesilesi bibi. Eda sa veivosakitaka oti ni lesia e dua na ilawalawa lailai lumuti era tiko e vuravura o Jisu mera vakarautaka na kakana vakayalo, mera wasea tale ga. (Luke 12:42-44) Meda vakasamataka tale ga ni lesi ira nona imuri ena itavi bibi ni vunau kei na nodra vakavulici eso tale mera tisaipeli. (Maciu 28:18-20) E dina ni sa veiliutaki tiko mai lomalagi da qai sega ni raici koya, ia e tataunaka nona ivavakoso e vuravura vei ira na “isolisoli tamata” era rawata na kena ivakatagedegede vakayalo.​—Efeso 4:8, 11, 12.

18-20. (a) Eda na vakaraitaka vakacava nida nuitaki ira na tacida, nida vakabauti ira tale ga? (b) Eda na vakatotomuria vakacava nona yalorawarawa o Jisu me wasea na itavi? (c) Na cava ena veivosakitaki ena wase tarava?

¹⁸ Eda na vakatotomuri Jisu vakacava ena ka eda cakava vei ira eso tale? E ivakaraitaki ni noda loloma na noda nuitaki ira na tacida, kei na noda vakabauti ira. Meda kua ni guilecava ni  o koya e loloma ena kauaitaka ga na ka era vinaka kina eso, sega ni ka era ca kina. Ena so na gauna era na vakararawataki keda eso. Ni yaco qori, na loloma ena uqeti keda me donu tiko ga na noda rai me baleti ira. (Maciu 7:1, 2) Ke da dau kauaitaka ga na veika era vinaka kina na tacida, eda na sega ni veivakayalolailaitaki, eda na veiuqeti ga.​—1 Cesalonaika 5:11.

¹⁹ Vakacava, eda na tu vakarau meda wasea na itavi me vakataki Jisu ga? Ena vinaka vei ira na liutaka na ivavakoso mera wasea na itavi veiganiti qai yaga vei ira eso tale, ra qai nuitaka nira na cakava ena nodra vinaka kece. Ke ra wasea va qori na itavi na qase ni ivavakoso era buta vinaka ena cakacaka qo, era na vakavulici ira kina na tacida tagane era “via qarava” na itavi ena ivavakoso. (1 Timoci 3:1; 2 Timoci 2:2) E yaga dina na veivakavulici qo. Ni vakatubura totolo tiko o Jiova na kedra iwiliwili na dau kacivaka nona Matanitu, ena vinakati gona mera vakavulici na tagane era rawata na ivakatagedegede ni veiqaravi.​—Aisea 60:22.

²⁰ E ivakaraitaki uasivi vei keda o Jisu ena nona dauloloma. Se mani sala cava eda vakatotomuri koya kina, e bibi duadua meda vakatotomuria na nona dauloloma. Eda na veivosakitaka ena wase tarava na ivakaraitaki levu duadua ni nona loloma—oya nona mate sara ga ena vukuda.