Ena iVolatabu na vu vakaIperiu na na·vaʼʹ, e vakadewataki me “parofisai,” e dusia vakabibi na kena kacivaki na itukutuku uqeti vakalou, veilewai, ivakavuvuli se nona ivakaro na Kalou. E rawa ni dusia tale ga na kena vakatakilai na itukutuku ni Kalou ni dua na ka e vakarau yaco. Na ka kece qori era okati ena parofisai i Isikeli.​—Isik. 3:10, 11; 11:4-8; 14:6, 7; 37:9, 10; 38:1-4.

• RAIVOTU

• VOSA VAKATAUTAUVATA

• MATANATAKI

E vakaraitaki ena ivola i Isikeli na raivotu, vosa vakatautauvata kei na kena matanataki na itukutuku ni parofisai.

Eso na gauna na parofisai i Isikeli e rawa ni vakayacori ena levu na sala. Kena ivakaraitaki nodra lesu ena Vanua Yalataki na tamata ni Kalou, a vakayacori taumada kina na parofisai ni nodra vakalesui. Ia me vaka ena vakamacalataki ena Wase 9 ni ivola qo, e levu na parofisai qori era na vakayacori nikua, vaka kina ena gauna se bera mai.

Eda sa raica mai ena veigauna sa oti e levu na parofisai i Isikeli me yavu ni itukutuku ni iVolatabu kei na kena vakaibalebaletaki vakaparofisai. Ia na ivola qo ena sega ni vakamacalataka na ka vakaparofisai e dusia na tamata, dua na ka, vanua se ituvaki ena yaco nikua, vakavo ke matata na kena yavu vakaivolatabu. * Ena rabailevu ga na kena vakamacalataki na vakayacori ni levu na parofisai i Isikeli. Ena vulici tale ga ena ivola qo na nona itukutuku, na ka tale ga e cavuta me baleti ira na tamata, vanua kei na ka era yaco.