Eda na rairai sega ni taqea rawa ena so na gauna na veivakatovolei kei na nuiqawaqawataki ni bula, eda lai yalolailai kina da qai sasaga meda toso tiko ga. Ia eda na rawa ni vakaukauataki ena gauna va qori nida vakasamataka na raivotu matata i Isikeli ena kena vakalesui mai na ka kece. Na vuna? Eda rawa ni vulica ena parofisai qo ni tu vua na Kalou na kaukaua me vakabula tale mai na sui mate, e rawa gona ni solia vei keda na kaukaua eda gadreva meda vosota kina na dredre, na kena mada ga e dredre ena rai vakatamata.​—Wilika Same 18:29; Fpai. 4:13.

Eda na rairai nanuma lesu na gauna ni bera sara na siga i Isikeli, a tukuna kina na parofita o Mosese ni sega wale ga vei Jiova na kaukaua, e vinakata sara ga me vakayagataka qori ena vukudra na nona tamata. E vola o Mosese: “E ivakaruru na Kalou mai na gauna makawa sara, e tabei kemuni na ligana tawamudu.” (Vkru. 33:27) Ke da goleva gona na noda Kalou ena gauna ni rarawa, ena tabei keda na ligana dauloloma, ena vakaduri keda qai vukei keda meda toso tale.​—Isik. 37:10.