KATO NI VEIVAKAVULICI 19A
Uciwai ni Veivakalougatataki i Jiova
Dikeva mada eso na tikinivolatabu e vakayagataki kina na vosa “uciwai” kei na “wai” me dusia na veivakalougatataki i Jiova. Nida wiliki ira kece, ena uqeti keda na sala e dau veivakalougatataki kina o Jiova. Ena sala cava?
JOELI 3:18 E laurai ena parofisai qo ni vure mai e dua na mataniwai ena itikotiko tabu ni valenisoro. E drodro mai me vakasuasuataka na vanua mamaca ena “Buca ni vu ni Akasia.” Erau raica gona o Joeli kei Isikeli e dua na uciwai e vakabula na vanua mamaca. Na uciwai rau raica qori e drodro mai na vale i Jiova se valenisoro.
SAKARAIA 14:8 E raica na parofita o Sakaraia na kena drodro mai na koro o Jerusalemi na “wai ni bula.” Veimama ni wai e drodro ina wasa ena tokalau, se Waitui Mate, e dua tale na veimama e drodro ina wasa ena ra, se Wasa na Mediterranean. O Jerusalemi a ‘nona koro tu na Tui cecere,’ na Kalou o Jiova. (Maciu 5:35) Nona cavuta na koro qori o Sakaraia eda lai nanuma kina na veiliutaki i Jiova e veiyasa i vuravura ena gauna se bera mai. Eda sa kila ni wai ena parofisai qo e dusia ni na vakalougatataka o Jiova e rua na ilawalawa yalodina ena Parataisi, qo o ira na bula sivia na veivakararawataki levu kei ira na qai vakaturi malua.
VAKATAKILA 22:1, 2 E raica na yapositolo o Joni e dua na uciwai vakaitakarakara me vaka ga na kena a raica o Isikeli. Ia e drodro mai na idabedabe vakaturaga i Jiova, sega ni valenisoro. Na raivotu gona qo e rairai vakabibitaka na veivakalougatataki ni veiliutaki vakalou ena loma ni Duanaudolu na Yabaki.
E dua ga na duidui lailai ena veivakalougatataki e drodro mai na veiliutaki i Jiova kei na kena e drodro mai na uciwai e raivotutaka o Isikeli. E lako mai vei Jiova na veivakalougatataki kece va qori qai drodro vei ira kece na yalodina.
SAME 46:4 Dikeva mada na tikinivolatabu qo, e rairai okati ruarua kina na sokalou kei na veiliutaki. Eda raica kina e dua na uciwai e vakavu marau ena “koro ni Kalou,” e dusia na Matanitu ni Kalou kei na veiliutaki, kei “na valeniveitavaki lagilagi qai savasava i koya sa Cecere Duadua,” oya na sokalou savasava.
Nida wilika kece na tikinivolatabu qori, eda vakadeitaka kina ni o Jiova ena vakalougatataka na kawatamata ena rua na sala. Kena imatai, na nona veiliutaki kei na kena ikarua na nona ituvatuva ni sokalou savasava. Erau na yaga tawamudu. Meda vakadeitaka gona nikua nida na vakasaqara tiko ga na Kalou o Jiova kei na Luvena me baleta na “wai ni bula,” qo na loloma rau vakarautaka me rawati kina na bula tawamudu!—Jere. 2:13; Joni 4:10.
