KATO NI VEIVAKAVULICI 19B
Yaco na Wai Lailai me Uciwai Levu!
E raica o Isikeli e dua na wai lailai ni drodro mai na tikina tabu i Jiova, e lai yaco sara me titobu ena loma ni dua vakacaca ga na maile! Sa bau dua dina na cakamana. Ena batiniuciwai, e raica ni vuataka na veivunikau bulabula na kakana, e veivakabulai tale ga. Na cava e kena ibalebale kece qori?
E Veivakalougatataki na Uciwai
GAUNA MAKAWA: Nira lesu ga ena nodra vanua na kau vakavesu, era vakalougatataki sara nira vakaitavi ena sokalou savasava ena valenisoro
GAUNA QO: E vakalesui mai na sokalou savasava ena 1919, e sega ni vakatauvatani rawa na levu ni nodra vakalougatataki na tamata yalodina i Jiova
GAUNA SE BERA MAI: Ni oti na Amaketoni, ena veivakalougatataki vakayago, vakayalo o Jiova
Wai ni Bula
GAUNA MAKAWA: Dua na ka nona vakalougatataki ira na nona tamata yalodina o Jiova, e tubu tiko ga na kedra iwiliwili, era vuavuaivinaka vakayalo
GAUNA QO: Ena parataisi vakayalo sa vakatorocaketaki tiko qo, sa qai tubu tiko ga na kedra iwiliwili o ira na vakila na yaga ni ka dina ena iVolatabu, era vulici Jiova kina ra qai veitomani ena sokalou e vakadonuya
GAUNA SE BERA MAI: O ira na bula sivia na Amaketoni era na tomani ira na milioni vakamilioni na vakaturi mai, ena qai vuabale na veivakalougatataki i Jiova
Veivunikau me Kakana me Veivakabulai
GAUNA MAKAWA: O Jiova e vakani ira nona tamata ena ka dina vakayalo, e vakarawarawataka vei ira mera sokaloutaki koya ena sala e vakadonuya. E vukei ira tale ga mera kua ni qaravi matakau se dua na ka e sema ena sokalou lasu
GAUNA QO: Sa tu e levu na kakana vakayalo e vukei ira na dauveiqaravi ni Kalou mera yalodina tiko ga, mera kua ni valavala ca bibi, mera cata tale ga kina na itovo ca ni vuravura qo
GAUNA SE BERA MAI: O Karisito kei ira na 144,000 na veiliutaki kei koya era na vukei ira kece na tamata yalodina mera uasivi, mera marautaka tawamudu na bula!