E kidacala o Annette ni sa kolotaki koya e ra e dua. E kaya: “Au cakava na ka kece au vakasamataka rawa. Au kaila, ia e sega ni rogo na domoqu. Au biligi koya, kadruvi koya, au caqe, vacu tale ga. Ia gauna au vakila kina na yame ni isele e yagoqu, au sa sega ni cakava rawa tale e dua na ka.”

Cava o na cakava ke o sotava na ituvaki va ya?

Ke o dau qaqarauni mada ga ni o gole ina dua na vanua ena bogi, e se rawa tiko ga ni yaco na leqa. E kaya na iVolatabu: “[E]ra sega ni qaqa tu ga ena veitau na yavatotolo . . . se ra vakadonui tu ga o ira na kilaka, ni dau yacovi ira kece na gauna kei na ka e sega ni namaki.”—Dauvunau 9:11.

Me vakataki Annette ga, eso na itabagone era sega ni kilai koya e vakasagai ira. Eso tale na itabagone era kilai koya e vakasagai ira, se dua ga na lewe ni nodra vuvale e cakava vei ira na ivakarau qori. A vakasagai Natalie e dua na cauravou eratou tiko veitikivi ga ni se qai yabaki tini. E kaya: “Na levu ni noqu rere kei na madua, e toka lo ga kina vei au na ka e yaco.”

E se ora tu ga na lomai Annette ena veika a yaco vua. E kaya: “Au sega ni guilecava rawa na ka e yaco ena bogi ya. De dua a sega ni kaukaua sara noqu sasaga. Ia ena gauna au lausua kina, au sa malumalumu wale ga ena levu ni noqu rere. Au sega ni cakava rawa tale e dua na ka, ia au dau nanuma ena so na gauna ni dodonu meu saga eso tale na ka.”

O Natalie tale ga e se rarawataka tu ga na veika e yaco vua. E kaya: “Sa sivia tale noqu veivakabauti. Erau dau tukuna noqu itubutubu me keirau qito ga kei na taciqu, ia au sega ni vakarorogo. De dua au a vakavuna ga nona vakasagai au na cauravou keitou tiko veitikivi. E tarai ratou sara ga na noqu vuvale na veika a yaco, au kila niu vakamosia dina na yalodratou. Qori na ka au rarawataka vakalevu.”

Ke dau vakataki Annette se Natalie na nomu rai ena so na gauna, nanuma tiko ni o koya e kucuvi e sega ni vinakata me caka vua ya. Eso era raica vakamamada na ituvaki va qori ena nodra kaya nira vakavuna ga o ira na kucuvi me vakayacori vei ira na ivalavala ya. Ia e sega ni dodonu me kucuvi e dua. Ke a vakayacori vei iko na ivalavala torosobu ya, e sega ni bale vei iko!

E rawarawa na kena tukuni ni sega ni bale vei iko na ka e yaco, ia e dredre toka me vakabauti. Eso era dau kubuta lo tu ga na ka e yaco, qori sa qai vakavuna ga na ora se vusolo ni lomadra. Kena ibalebale e sega ni vinaka mo galuvaka na veika e yaco. Na cava ga mo cakava?

E vakamacalataki ena iVolatabu ni gauna e rarawa tu kina o Jope, a kaya: “Au na vakatusa na mosi ni yaloqu!” (Jope 10:1) E macala ga ni na vusolo na lomamu ni o dau vakasamataka na ka e yaco. E vinaka kina mo talaucaka na lomamu vua e dua na nomu itokani nuitaki. O na vakila kina na vakacegu.

A vakadinadinataka qori o Annette. E kaya: “Keirau veitalanoa kei na dua noqu itokani voleka, qai tukuna meu lai raici ratou na qase ni ivavakoso. Au marau sara ga niu a cakava ya. Gauna kece keitou veitalanoa kina, eratou dau kaya meu kua ni beitaki au ena ka e yaco. E sega ni bale vei au. E veivakacegui dina na ka eratou tukuna ya.”

O Natalie a veitalanoa kei rau na nona itubutubu. E kaya: “Erau dau tokoni au. Rau uqeti au tale ga meu talaucaka na lomaqu, meu kua ni rarawa se cudru kina vakasivia.”

A vakacegui Natalie tale ga na masu. E kaya: “Gauna e dredre kina noqu talaucaka na lomaqu vua e dua tale, au sa talaucaka ga vua na Kalou. E rawarawa meu vosa ena gauna au masu kina. Au dau lomavakacegu sara ga.”

Toso na gauna, o na vakadinata ni tiko na “gauna ni veivakabulai.” (Dauvunau 3:3) Qarauna na nomu bula, dau vakacegu vinaka. Saga mo valuta na rai cala, qai vakasamataka ga na veika vinaka. E bibi sara mo nuitaki Jiova, na Kalou e dau vakacegui keda ena ka kece.—2 Korinica 1:3, 4.

Ke o dua na goneyalewa o qai vakasaurarataki mo cakava e dua na ivalavala tawakilikili, tukuna vakadodonu: “Kua ni cakava qori!” se “Kua ni tarai au!” Kua ni via vakalomavinakataka ga nomu itau ni o leqataka ni sa na sega ni taleitaki iko. Ke tagutuva nomudrau veibuku o nomu itau ni o sega ni vakamalumalumu ina ka e vinakata, kua ni yalolailai! E vinaka cake mo vakawatitaka na tagane e rokova na yagomu kei na ka o vakabauta.

“Niu se vuli tiko ena paraimari, era dau dreta na tagane na wa ni noqu ivakamoko qai dau vakasisila na nodra ivosavosa. Kena ivakaraitaki, era dau kaya niu na marau vakalevu keu veiyacovi kei ira.”—Coretta.

Cava o nanuma nira cakava na cauravou ya vei Coretta?

1. Veivakanini?

2. Wede?

3. Veivakasagai?

“E tarai au qai tukuna vei au eso na ka vakasisila e dua na cauravou e loma ni basi. Au sabica na ligana, au tukuna vua me toso. Au kidava ena irairai ni matana vei au, ni nanuma niu lialia.”—Candice.

Cava o nanuma e cakava na cauravou ya vei Candice?

1. Veivakanini?

2. Wede?

3. Veivakasagai?

“E vuki tukuna vei au e dua na cauravou ena yabaki sa oti ni taleitaki au, e vinakata me keirau veitau. Au sa vakasega oti vua, ia e sasaga tiko ga. So na gauna e dau yamoca na ligaqu. Au tukuna vua me kua, ia e cakava tiko ga. Dua na gauna niu vesuka tiko na wa ni noqu ivava, e qai mokuta na butaqu.”—Bethany.

Cava o nanuma ni cakava na cauravou ya?

1. Veivakanini?

2. Wede?

3. Veivakasagai?

Na isau tolutolu ni taro qori na C.

E duidui vakacava mai na wede kei na veivakanini na veivakasagai?

E marautaka ga na veivakasagai o koya e cakava na ivalavala qori, sega ni o koya e caka vua. Ke tukuni vua e veivakasagai me muduka na nona ivakarau, ena cakava tiko ga.

Me kua ni raici vakamamada na veivakasagai ni rawa ni tini ena kucu.