Raitayaloyalotaka mada na ituvaki qo: Se sega ni dede nona yaco yani ena pati o Karen sa rogoca e dua na domo mai dakuna.

Ni raivuki o Karen, e raici Jessica na nona itokani ni taura tu e rua na tavaya alakaolo. E laveta cake e mata i Karen o Jessica e dua na tavaya qai kaya: “E cava o se gone, o sega ni rawa ni gunu kina?”

E via vakasega o Karen, ia e sega ni vinakata me vakacacani na nodrau veitokani kei Jessica. E goneyalewa vinaka tale ga o Jessica. Ke sa gunu o koya, kena irairai ni sega ni dua na kena leqa. E kaya lo o Karen, ‘Na gunu wale ga qo, e sega ni wainimate gaga.’

Na cava o na cakava ke o tu ena ituvaki ya?

E okati ena ka o kilai tani kina na ka o vakabauta kei na ivakavuvuli o muria. Ke matata vei iko na rua na ka ya, o na doudou ni vorata na veitemaki, o na vakatulewa vakataki iko ra qai sega ni lewai iko eso tale.—1 Korinica 9:26, 27.

Ena veivuke tale ga na nomu sauma e va na taro e tiko ena ulutaga qo.

O na nuidei ke o kila ni tiko eso na nomu itovo vinaka, e tiko tale ga na veika o rawa ni cakava.

IVAKARAITAKI VAKAIVOLATABU: A vola na yapositolo o Paula: “Keu sega mada ga ni madila ena vosa, ia e duatani sara na ka au kila.” (2 Korinica 11:6) Ni kila vinaka o Paula na iVolatabu, a dei tiko ga nira saqati koya eso tale qai sega ni vakayalolailaitaki koya na veika ca era tukuna.—2 Korinica 10:10; 11:5.

DIKEVA NA KEMU ITUVAKI: Vola e ra e dua na nomu taledi, se dua na ka o kila vinaka na kena icakacaka.

Vola e dua na itovo o kilai kina. (Kena ivakaraitaki, o dau veikauaitaki? lomasoli? nuitaki? cakava na ka ena kena gauna?)

E vinaka mo kila na nomu malumalumu. Qori ena vukei iko mo vorata na veitemaki ena vakaleqa na nomu itovo se na ka o vakabauta.

IVAKARAITAKI VAKAIVOLATABU: A kila o Paula ni tiko na nona malumalumu ni a vola: “E vu dina mai lomaqu noqu marautaka na lawa ni Kalou, au qai raica ni dua tale na lawa e tiko ena yagoqu e veivala tiko kei na lawa ni noqu vakasama qai vakabobulataki au ina lawa ni ivalavala ca.”—Roma 7:22, 23.

DIKEVA NA KEMU ITUVAKI: Na cava e dua na ka o nanuma ni dodonu mo vakavinakataka?

Ni o vodo motoka, vakacava o na tukuna vei draiva me wavokita tiko ga e dua na vanua me yacova ni sa maca na waiwai? Ena ka vakalialia qori, ena vakalusi ilavo tale ga!

Dua na ka o rawa ni vulica ena ivakaraitaki qori. Ena vakainaki na nomu bula ke tiko na nomu isausau. O na sega ni veilecayaki ni sa matata tu vei iko na veika mo sasagataka, kei na ka mo cakava mo rawata kina nomu isausau.

IVAKARAITAKI VAKAIVOLATABU: A vola o Paula: “Ena noqu ivakarau ni cici, au sega ni cici tu vakaveitalia.” (1 Korinica 9:26) A sega ni veilecayaki o Paula ena ka me cakava ena nona bula, ni a tiko na nona isausau qai saga sara me rawata.—Filipai 3:12-14.

DIKEVA NA KEMU ITUVAKI: Vola e ra e tolu na isausau o na via rawata ena loma ni dua na yabaki.

E bibi mo kila na ka o vakabauta mo rawa ni vakatulewa vakataki iko. Ke sega, o na vaka ga e dua na mataqali moko e dau veiveisau na rokana. O na veiveisautaka tale ga na nomu ivakarau ni bula mera taleitaki iko kina nomu icaba. Qori e vakaraitaka ni sega ni matata vei iko na ka o vakabauta.

Ia ke o yavutaka na nomu vakatulewa ena ka o vakabauta, o na dei mo cakava na ka e dodonu se mani cava era cakava eso tale.

IVAKARAITAKI VAKAIVOLATABU: A talairawarawa ina lawa ni Kalou na parofita o Taniela, dina ga ni yawa mai vei ratou na nona vuvale. A rairai “nakita e lomana” me cakava qori ni se itabagone. (Taniela 1:8) A matata vinaka tu vei Taniela na ka e dodonu me cakava, qai dei ena ka e vakabauta.

DIKEVA NA KEMU ITUVAKI: Na cava o vakabauta? Kena ivakaraitaki: O vakabauta na Kalou? Na cava o vakabauti koya kina? O vakadinadinataka vakacava ni bula tiko na Kalou?

Vakacava o vakabauta ni na yaga na nomu muria na ivakatagedegede ni Kalou? Ke vaka kina, na cava o vakabauta kina qori?

Na cava o vinakata? Mo vaka na draunikau e veicaginayaki ni mudre malua mada ga na cagi, se mo vaka na vunikau e sega ni bale rawa ni laba na cagi? O na vaka ga na vunikau ke o dei ena veika o vakavulici kina, kei na ka o vakabauta. O na sauma rawa tale ga kina na taro, Na cava soti au kilai tani kina?