EDA dau veitalanoa da qai veimaliwai kei ira na noda itokani. Ia e vinakati mera itokani vinaka. O cei o nanuma e noda itokani vinaka duadua?— Io, na Kalou o Jiova.

E rawa beka me noda itokani sara ga na Kalou?— E vakaraitaka na iVolatabu ni o Eparama, e dua na turaga a bula ena gauna makawa, e “i tokani ni Kalou.” (Jemesa 2:23) O kila na vuna e vakatokai kina me itokani ni Kalou?— E vakaraitaka na iVolatabu ni o Eparama e dau talairawarawa vua na Kalou. E talairawarawa, dina ga ni dredre na ka e tukuni me cakava. Me rawa gona meda itokani ni Kalou, e dodonu meda cakava na ka e vinakata, me vaka erau dau cakava o Eparama kei na Qasenivuli Levu.​—Vakatekivu 22:1-14; Joni 8:28, 29; Iperiu 11:8, 17-19.

 E tukuna o Jisu vei iratou nona yapositolo: “Dou noqu itokani kevaka dou cakava na ka au vakarota.” (Joni 15:14, NW) Ni vu mai vei Jiova na ivakaro kece i Jisu, e tukuna tiko o Jisu nira nona itokani ga o ira na cakava na ka e vinakata na Kalou. Io, era lomana na Kalou na itokani kece i Jisu.

O iratou na yapositolo ena iyaloyalo ena tabana e 75, eratou itokani dredre ni Qasenivuli Levu. Eratou dau lako vata kei Jisu ni ratou vukei koya ena cakacaka vakavunau. E vakayagataka vakalevu o Jisu na nona gauna vei iratou. Eratou kana vata. Eratou dau veitalanoataka na veika e baleta na Kalou. Eratou cakacaka vata. Ia era tiko tale e levu na itokani i Jisu. E dau vakaicili vei ira, ra qai veilasamaki vinaka.

E dau taleitaka o Jisu me lai vakaicili vei iratou e dua na vuvale ena koro lailai o Pecani, volekata na koro levu o Jerusalemi. O kilai iratou?— Oqo o Meri, Marica, kei na ganedrau o Lasarusa. E vakatokai Lasarusa o Jisu me nona itokani. (Joni 11:1, 5, 11, VV)  E taleitaka na vuvale oqo o Jisu baleta ni ratou lomani Jiova ratou qai qaravi Koya tale ga.

E sega ni kena ibalebale oqo ni a sega ni kauaitaki ira na tamata era sega ni qarava na Kalou. E kauaitaki ira. E bau sikovi ira tale ga ena nodra vale me lai kana vata kei ira. Oqo e vakavuna mera kaya kina e so ni o Jisu e “nodra i tokani na daukumuni i vakacavacava kei ira na tamata i valavala ca.” (Maciu 11:19, VV) Ia e sega ni lakovi ira o Jisu baleta ni taleitaka na ivakarau ni nodra bula. E sikovi ira ga me lai vakamacalataki Jiova vei ira. E saga mera veisautaka na ivakarau ni nodra bula mera mai qarava na Kalou.

Oqori na ka e yaco ena dua na siga ena koro o Jeriko. E curuma na koro oqori o Jisu ena nona ilakolako i Jerusalemi. E maliwai ira na ilala levu era via raici koya o Sakiusa. Ni turaga lekaleka, e dredre me raici Jisu o Sakiusa baleta nira le levu na tu mai liu. Mani cici i liu me lai kaba ena vunikau me rawa kina ni raici Jisu vinaka ni lako yani.

Ni yaco yani o Jisu i vunikau, e rai cake qai kaya: ‘Vakatotolo, kevu sobu mai, au na tiko ena nomu vale nikua.’ Ia e vutuniyau  qai tamata ivalavala ca o Sakiusa. Na cava e via lako kina o Jisu ina nona vale na tamata ca oqo?—

E sega ni baleta ni taleitaka o Jisu na ivakarau ni nona bula. E lako i kea me lai vakamacalataka vei Sakiusa na veika e baleta na Kalou. E kauaitaka na nona sasagataka me raici koya. E kila ni na rairai vakarorogo o Sakiusa. Oqo e gauna vinaka me vakaraitaka kina vua na ivakarau ni bula e vakadonuya na Kalou.

Na cava e qai yaco?— E taleitaka o Sakiusa na ivakavuvuli i Jisu. E veivutunitaka na nona veidabuitaki ira na tamata, e yalataka me vakasuka na ilavo e taura vakatawadodonu. E qai yaco me imuri i Jisu. Oti oya rau sa qai veitokani o Jisu kei Sakiusa.​—Luke 19:1-10.

Ke da vuli vei Jisu, ena rawa beka meda sikovi ira era sega ni noda itokani?— E rawa. Ia eda na sega ni lako i nodra vale baleta nida taleitaka na ivakarau ni nodra bula. Eda na sega tale ga ni cakava vata kei ira na veika ca. Eda na sikovi ira ga meda lai tukuna vei ira na veika e baleta na Kalou.

 Ia eda na veilasamaki ga kei ira na noda itokani dredre. Me rawa nira noda itokani, e dodonu me vakadonui ira na Kalou. E so mada ga era se sega ni kilai Jiova. Ia kevaka era via vulici Jiova, e rawa meda vukei ira. Ia kevaka era sa qai lomani Jiova me vakataki keda, sa na qai rawa meda veitokani dredre.

Oqo e dua tale na sala e kilai kina se e itokani vinaka e dua se sega. Raica na veika e dau cakava. E dau cakava beka e so na veika mosimosi vei ira na tani qai dau dredrevaka? E sega ni dodonu oya, se vakaevei?— E dau sauti koya beka na ka ca e cakava? Eda sega ni vinakata meda lai coko tu kei koya, se vakaevei?— E dau nakita beka na veika ca e cakava qai qaciqaciataka na nona sega ni tobo? Ke mani sega ni tobo, ia e raica na Kalou na ka e cakava, se vakaevei?— E rawa beka me noda itokani vinaka e dua e vakayacora na veika oya?—

Cega mada na nomu iVolatabu. Daru raica mada se na cava e kaya me baleta na kena tarai keda na nodra ivalavala na noda itokani. Na 1 Korinica wase 15, tikina e 33 (VV). O sa raica?— E kaya: “Ni kakua sara ni vakacalai. Sa dau vakarusa na i vakarau vinaka ko ira na i tokani ca.” E kena ibalebale oqo ni kevaka eda veimaliwai kei ira na tamata ca, eda na ca tale ga. Ia era na vukei keda meda itovo vinaka o ira na itokani vinaka.

Meda kua ni guilecava ni o Jiova e bibi duadua ena noda bula. Eda sega ni via vakacacana na noda veitokani kei koya, se vakaevei?— Meda qarauna gona meda veitokani ga kei ira na lomana na Kalou.