EDA vinakata kece meda marau, se vakacava?— Ia e levu era sega ni mamarau. O kila na vuna?— Baleta nira sega ni kila se e rawati vakacava na marau. Era nanuma nira na marau ke levu nodra iyau. Ia ena sega ga ni dei na nodra marau ke levu na nodra iyau.

Oqo e dua na sala bibi e rawati kina na marau. E kaya na Qasenivuli Levu: ‘Eda na marau vakalevu nida soli ka mai na noda taura na ka.’ (Cakacaka 20:35) O koya gona, ena rawati vakacava na marau?— Io, nida soli ka da qai cakava na ka ena vukudra tale e so. O sa kila tiko oya?—

Daru vakasamataka tale mada na vosa oya. A kaya beka o Jisu ni na sega ni marau o koya e soli vua na iloloma?— Sega, e sega ni tukuna oqori. O dau marautaka na iloloma, se vakacava?— Eda marautaka  kece. Eda marau ni soli vei keda na veika vinaka.

Ia e tukuna o Jisu nida na marau vakalevu nida soli ka. O cei o nanuma e levu duadua na ka e solia vua na tamata?— Io, na Kalou o Jiova.

E kaya na iVolatabu ni solia na Kalou “vei keda kecega na bula, kei na [i]cegu, kei na ka kecega.” E solia vei keda na uca mai lomalagi kei na rarama ni matanisiga, me rawa kina nira bula na ka eda tea me keda. (Cakacaka 14:17; 17:25) Sa rauta me vakatokai Jiova na iVolatabu me “Kalou mamarau”! (1 Timoci 1:11, NW) E marau na Kalou ni solia na ka vei ira tale e so. Eda marau tale ga nida soli ka.

Na cava eda rawa ni solia? Na cava o nanuma?— So na gauna ena saumi na iloloma eda solia. Ke iloloma o taura mai ena sitoa, ena vinakati mo sauma. Ke o via solia na iloloma vaka oya, o na maroroi ilavo tiko me yacova na gauna o rawa ni qai volia kina na iloloma oya.

Ia e sega ni dau voli kece mai na sitoa na iloloma. Me kena ivakaraitaki, ena siga katakata, e dau gunu vinaka dina na wai batabata. Ni o solia na wai oqori vua e dua e karamaca, o na marau baleta ni o sa solia e dua na ka.

Drau vavi sikoni beka kei tinamu ena dua na siga. O rairai marautaka dina. Ia na cava o rawa ni cakava ena so na sikoni oqori mo rawa ni marau cake kina mai na nomu kania duadua?— Io, o rawa ni veisoliyaka e so vei ira na nomu itokani. O rawa beka ni cakava tale ga oya?—

E marau na Qasenivuli Levu kei iratou na nona yapositolo ni ratou  soli ka. O kila na ka eratou dau solia?— Na ka e uasivi duadua e vuravura! Eratou kila na veika dina me baleta na Kalou, ratou qai marau ni wasea vei ira tale e so. Eratou sega ni vakatara e dua me sauma vakailavo na ka eratou solia.

Dua na siga rau sotava na yapositolo o Paula kei na nona itokani vinaka na tisaipeli o Luke e dua na marama e via marautaka nona soli ka. Rau sotavi koya ena dua na bati ni uciwai. Rau lako kina o Paula kei Luke baleta ni rau rogoca ni vanua oya era dau lai masu kina. Ia ni rau yaco yani era masu toka e so na marama.

Tekivu vakamacalataka sara o Paula vei ira na marama oya na itukutuku vinaka me baleta na Kalou o Jiova kei na nona Matanitu. E vakarorogo vinaka sara o Litia, e dua vei ira na marama. Dua na gauna e muri e qai vakaraitaka kina o Litia ni taleitaka na itukutuku vinaka e rogoca. A kerei Paula kei Luke: “Ke drau vakadinata niu yalodina tiko vei Jiova, drau curu mai ina noqu vale mo drau tiko kina.” E cikevi rau sara ga me rau lako i nona vale.​—Cakacaka 16:13-15, NW.

E marautaka o Litia na nodrau tiko e nona vale na dauveiqaravi ni Kalou oya. E marautaki rau baleta ni rau vukei koya me kilai Jiova kei Jisu vaka kina na sala e rawati kina na bula tawamudu. E marau dina o Litia ni vakani rau qai vakaicilitaki rau o Paula kei Luke. E marautaka na nona soli ka baleta ni vu mai lomana. Oqo e dua na ka meda dau nanuma. De dua e lavaki vei keda na noda soli ka. Ia kevaka e sega ni lomada, eda na sega ni marautaka na noda soli ka.

Me kena ivakaraitaki, vakacava ke tiko vei iko e so na loli o vinakata ga mo gunuva? Kevaka au tukuna vei iko mo wasea vua e dua tale na gone, o na marau ni solia?— Ia vakacava ke tiko vei iko na loli, o qai sotava e dua nomu itokani dredre? Ke lomamu ga mo wasea e so na loli vua na nomu itokani, o na marautaka na nomu solia, se vakaevei?—

 So na gauna eda dau solia kece sara ga na ka vua e dua eda lomana. Ni tubu cake na noda lomana na Kalou, me vaka tale ga oya na noda via soli ka vua.

E kila na Qasenivuli Levu e dua na marama dravudravua e vaka oya na nona loloma. E raici koya ena valenisoro mai Jerusalemi. E tiko ga vua e rua na ilavo lailai; oya ga na ka e tu vua. E biuta ruarua sara ga na ilavo oqori me nona cau ina valenisoro. E sega ni dua e vakasaurarataki koya me cakava. E levu vei ira na tu e kea era sega ni kila na ka e cakava. E cakava oqori baleta ni lomani Jiova dina qai vu sara ga mai lomana na nona soli ka. E marautaka na marama dravudravua oya na nona soli ka.​—Luke 21:1-4.

E levu sara na ka eda rawa ni solia. O rawa ni vakasamataka e so?— Ke da solia na ka baleta nida vinakata, eda na marau dina. Oya na vuna e tukuna kina vei keda na Qasenivuli Levu: “Mo dou dausoli ka.” (Luke 6:38) Ke da cakava oqori, eda na vakamarautaki ira tale e so. Ia eda na marau vakalevu ga o keda!