O NA marau beka ke o rawa ni lewa ga na ka o cakava? Bau so na gauna o dau diva me kua ni dua e tukuna vei iko na ka mo cakava? Tukuna mada mai vakadodonu na ka o nanuma.—

Ia e vei e vinaka vei iko? E vinaka beka mo lewa ga na veika o vinakata? Se e vinaka cake mo talairawarawa vei tamamu kei tinamu?— E vinakata na Kalou mo talairawarawa vei rau na nomu itubutubu, ena tiko na vuna vinaka mo talairawarawa kina. Meda raica mada se cava e vuna.

O sa yabaki vica?— O kila sa yabaki vica o tamamu?— Sa yabaki vica o tinamu, se na nomu bubu se tukamu?— Sa dede cake na nodratou bula. Na dede ga ni nona bula e dua, na dede tale ga ni nona vuli tiko. Ena veiyabaki, ena levu cake na veika e rogoca, raica, qai cakava. E rawa gona vei ira na gone mera vuli vei ira na sa qase.

O bau kila e dua e gone vei iko?— E levu cake beka na ka o kila mai vua?— Na cava e vuna?— E baleta ni sa dede cake na nomu bula. E levu cake na gauna o vulica kina na veika ni vakatauvatani kei na dua e gone vei iko.

 O cei e dede cake nona bula vei keda?— Na Kalou o Jiova. E levu cake sara na ka e kila mai vei iko se o au. Ni tukuna vei keda na ka meda cakava, eda kila ni oya e dodonu me caka, dina ga ni rairai dredre na kena caka. O bau kila ni a dredre tale ga vua na Qasenivuli Levu me talairawarawa?—

Dua na gauna a tukuna na Kalou vei Jisu me cakava e dua na ka dredre. E qai masulaka o Jisu, me vaka eda raica e ke. E kaya ena nona masu: “Kevaka ko ni sa vinakata, ni kauta tani vei au na bilo oqo.” E vakaraitaka o Jisu ena qaqanimasu oqori ni sega ni dau rawarawa tu ga na vakayacori ni loma ni Kalou. Ia e qai tinia vakacava o Jisu na nona masu? O kila?—

E tinia vakaoqo o Jisu: “Me kakua ni yaco na noqu lewa, me yaco ga na nomuni lewa.” (Luke 22:41, 42) Io, e vinakata ga me yaco na loma ni Kalou, sega ni lomana. E mani vakayacora ga na ka e vinakata na Kalou, sega ni ka e nanuma o koya ni vinaka cake.

Na cava eda vulica kina?— Eda vulica ni dodonu ga meda cakava na ka e kaya na Kalou, dina ga ni dredre ena so na gauna. Eda vulica tale ga e dua tale na ka. O kila se cava oya?— Eda vulica ni rau duidui na Kalou kei Jisu, rau sega ni duabau me vaka era kaya e so. E dede cake nona bula qai levu cake na ka e kila na Kalou o Jiova vei Jisu na Luvena.

Eda vakaraitaka nida lomana na Kalou nida talairawarawa vua. E kaya na iVolatabu: “Sai koya oqo na loloma vua na Kalou, me da muria na nona vunau.” (1 Joni 5:3) O rawa ni  raica e keri ni dodonu meda talairawarawa vua na Kalou. O bau vinakata mo talairawarawa tale ga vua?—

Daru dolava mada na nodaru iVolatabu me daru raica se cava e kaya na Kalou mera cakava na gone. Daru na wilika na ka e kaya na iVolatabu ena Efeso wase 6, tikina e 1, 2, kei na 3. E kaya: “Oi kemudou na gone, dou talairawarawa vei ira na nomudou qase e na ka sa vinaka vua na Turaga: ni sa dodonu oqo. Mo vakarokoroko vei rau na tamamu kei na tinamu; (oqo na vunau taumada sa dua kina na vosa ni yalayala); mo vinaka kina, mo bula vakadede talega e vuravura.”

E tukuna sara ga vei iko na Kalou o Jiova mo talairawarawa vei rau na tamamu kei na tinamu. Na cava e kena ibalebale nomu “vakarokoroko” vei rau? E kena ibalebale mo dokai rau. E yalataka na Kalou ni kevaka o talairawarawa vei rau nomu itubutubu, o na “vinaka kina.”

Meu talanoataka mada vei iko na nodra vakabulai e so na tamata baleta nira talairawarawa. O ira oqo era bula voli ena korolevu o Jerusalemi ena dua na gauna makawa. E levu na lewenikoro era sega ni vakarorogo vua na Kalou, mani tukuna vei ira o Jisu ni na vakarusa na nodra koro na Kalou. Tukuna tale ga vei ira o Jisu na sala era rawa ni vakabulai kina ke ra cakava na ka e dodonu. E kaya: ‘Nira sa yavokiti Jerusalemi na mataivalu, sa na voleka ni vakarusai na koro. Oya na gauna mo ni biuti Jerusalemi kina mo ni dro ina veiulunivanua.’​—Luke 21:20-22.

Me vaka e tukuna o Jisu, e lako mai e dua na mataivalu me mai kabai Jerusalemi. Sa mai tuva yavokita na koro na mataivalu ni Roma. Ia era qai suka tale na sotia. Levu era nanuma ni sa oti na leqa. Ra mani tu ga ena koro. Ia na cava e tukuna o Jisu mera cakava?— Na cava o na cakava ke o bula tiko e Jerusalemi?— Era biuta tu mai nodra vale o ira na vakabauti Jisu nira sa dro ina veiulunivanua e yawa mai Jerusalemi.

 E sega ni yaco e dua na ka e Jerusalemi ena imatai ni yabaki. Vaka kina ena ikarua kei na kena ikatolu ni yabaki. So era nanuma ni sa ca na uludra o ira na biuta na koro. Ia e lesu mai na mataivalu ni Roma ena ikava ni yabaki. Era mai keba yavokiti Jerusalemi tale. Sa sega ni rawa na dro. Era vakarusa na koro na mataivalu. Era mate e dua na iwase levu ni tamata, ra qai kau vakavesu na kena vo.

Na cava e yacovi ira na talairawarawa vei Jisu?— Era bula. Era sega ni vakaleqai baleta nira yawa mai Jerusalemi. E taqomaki ira na nodra talairawarawa.

O na taqomaki tale beka ga ke o talairawarawa?— De rau tukuna na nomu itubutubu mo kua ni qito e gaunisala. Na cava erau tukuna kina oya?— De coqai iko na motoka. De o kaya beka ena dua na siga: ‘E sega na motoka e gaunisala. Au na sega ni mavoa. Era dau qito e gaunisala na gone, au se sega ni raica nira mavoa.’

 E vaka tale ga oqori na nodra rai e levu na lewe i Jerusalemi. E vaka e sega ni yaco e dua na ka ni sa suka na mataivalu ni Roma. Era tu ga na vo ni lewe ni koro. Ra mani tiko tale ga. Era sa vakasalataki, ia era sega ni vakarorogo. Oqo e vakavuna sara ga na nodra vakamatei.

Da vakasamataka mada e dua tale na ivakaraitaki. O sa bau vakatatalotaka na masese?— Ena rairai maleka beka nomu raica na yameyame ni waqa toka na matanimasese. Ia e rerevaki na vakayagataki ni masese. E rawa ni vakavuna me kamayavu na vale, e rawa tale ga mo mate kina!

Nanuma, e sega ni vinakati mo talairawarawa ena so ga na gauna. O na taqomaki ke o talairawarawa ena veigauna. O cei e tukuna vei iko, “Ragone, ni talairawarawa vei ira nomuni itubutubu”?— Na Kalou. Nanuma ni tukuna na vosa oya baleta ni lomani kemuni.