SA BAU butakoci beka e so nomu iyaya?— E tarai iko vakacava?— O koya e taura na iyaya oya e butako, e sega ni dua e taleitaka na butako. E tekivu butako vakacava e dua? E itovo beka a sucu kaya mai?—

Daru se qai vulica ga nida sucu kaya mai na ivalavala ca. Eda sega ni tamata uasivi kece. Ia e sega ni dua e sucu mai me daubutako. O daubutako e rawa ni lewe ni dua na vuvale vinaka. E rawa nira daudina na nona itubutubu, na tacina, kei na ganena. Ia na nona garova beka na ilavo kei na ka e rawa ni volia kina e rawa sara ga ni vuki kina e dua me daubutako.

O cei o nanuma e imatai ni ka bula me butako?— Daru vakasamataka mada. E kilai koya vinaka na Qasenivuli Levu ni se tu mai lomalagi. E agilosi na daubutako oya. Ni a buli ira na agilosi na Kalou mera uasivi, e yaco vakacava na agilosi oya me daubutako?— Eda vulica ena Wase 8 ni ivola oqo ni a vinakata na agilosi oya e dua na ka e sega ni nona. O se nanuma tiko se cava e vinakata?—

Ni buli rau oti na imatai ni tagane kei na yalewa na Kalou, e vinakata na agilosi oya me rau sokalou vua. Ia e sega ni dodonu me rau sokalou vua. E dodonu ga me rau sokalou vua na Kalou. E wili gona vaka butako na nona uqeti rau o Atama kei Ivi me rau sokalou vua, ni taura vakatawadodonu o koya na ka e dodonu me nona na Kalou. E yaco kina me o Setani na Tevoro.

E vu vakacava me daubutako e dua?— Nona gadreva me taukena na ka e sega ni nona. Na gagadre oqo e rawa sara ga ni veisautaka e dua na tamata vinaka me cakava na ka ca. E so na  daubutako e dredre tale mera veisau mera vinaka. E vaka kina e dua na yapositolo i Jisu. E yacana o Jutasa Isikarioti.

E kila o Jutasa ni cala na butako baleta ni a vakavulici ena Lawa ni Kalou ni se gonetagane lailai. E kila ni a vosa sara ga mai lomalagi na Kalou me tukuna vei ira na nona tamata: “Mo kakua ni butako.” (Lako Yani 20:15) Ni sa tubu cake o Jutasa, rau sota kei na Qasenivuli Levu qai yaco tale ga me nona tisaipeli. E qai digitaki Jutasa o Jisu me dua na nona yapositolo.

Eratou dau lako vata voli o Jisu kei na nona yapositolo. Eratou kana vata. Na nodratou ilavo e maroroi voli ena dua na kato. E solia na kato o Jisu vei Jutasa me maroroya. Ia e sega ni nei Jutasa na ilavo. O kila na ka e qai cakava o Jutasa?—

E tekivu tauri ilavo mai na kato oya o Jutasa dina ga ni sega ni vakatarai vua. E dau taura lo na ilavo, qai dau qara na sala me levu mai kina na ilavo. Daru raica mada se a tini e vei na nona kocokoco ni vo ga e vica na siga me mate na Qasenivuli Levu.

E dua na gane i Lasarusa na itokani i Jisu e mai lumuta na yava i Jisu ena dua na waiwai sau levu. Ia e cudruvaka o Jutasa na ka e cakava o Meri. O kila na vuna?— E kaya ni waiwai oya e dodonu me volitaki me qai soli na ilavo e rawa mai kina vei ira na dravudravua. Ia e vinakata ga me kau mai na ilavo oya ina nodratou kato me rawa kina ni baci butakoca.​—Joni 12:1-6.

A tukuna vei Jutasa o Jisu me kua ni vakalewai Meri, baleta e cakava oya ena nona veikauaitaki. E levataka o Jutasa na ka e tukuna vua o Jisu, e mani lako kina vei ira na bete levu, o ira na meca i Jisu. Era vinakata voli mera vesuki Jisu, ia era via cakava ga ena bogi me kua ni laurai.

E tukuna vei ira na bete o Jutasa: ‘Au na tukuna vei kemudou se  e vei dou rawa ni vesuki koya kina kevaka dou saumi au. E vica dou rawa ni solia vei au?’

‘E tolusagavulu na tiki ni siliva,’ era tukuna na bete.​—Maciu 26:14-16.

E taura na ilavo oya o Jutasa. E volitaka na Qasenivuli Levu! O rawa beka ni vakasamataka me dua e cakava na ka ca oya?— Oqori na ka e yaco ke dua e kocova na ilavo qai tini butako sara. E bibi cake nona lomana na ilavo mai na nona lomana na tamata se na Kalou sara mada ga.

De o kaya beka, ‘Ena kaukaua sara na noqu lomana na Kalou o Jiova mai na noqu taleitaka na veika tale e so.’ E vinaka ni vaka oqori nomu rai. Ni digitaki Jutasa me nona yapositolo o Jisu, e rairai vaka tale ga oqori na rai nei Jutasa. De vaka tale oqo na nodra rai e so era qai butako. Daru veivosakitaki ira mada e so.

E dua vei ira o Ekani, na dauveiqaravi ni Kalou a bula voli ni se bera sara ni qai sucu na Qasenivuli Levu. E kunea o Ekani e dua na itutuvi vinaka, dua na uma koula, kei na so na tiki ni siliva. Ia e sega ni nona. E kaya na iVolatabu ni a nei  Jiova baleta e kau mai vei ira na meca ni tamata ni Kalou. Ni vinakata vakalevu na iyau oya o Ekani, e mani butakoca.​—Josua 6:19; 7:11, 20-22.

Oqo e dua tale na ivakaraitaki. Ena dua na gauna makawa, a digitaki Tevita me nodra tui na Isireli o Jiova. Dua na siga a raici Pacisepa, e dua na yalewa matavinaka, o Tevita. E raici Pacisepa tiko ga qai vakasamataki koya tiko ni vinakata me kauti koya mai me watina. Ia e wati Uraia o koya. Na cava e dodonu me cakava o Tevita?—

E dodonu me kua ni vakasamataki Pacisepa tiko o Tevita. Ia e vakasamataki koya tiko ga. E tini kauti Pacisepa sara kina i nona vale. E qai nakita me vakamatei o Uraia. Na cava e cakava kina o  Tevita na veika ca oya?— Baleta ni vinakata tiko na yalewa e watina e dua tani na tagane.​—2 Samuela 11:2-27.

E vakabulai Tevita o Jiova baleta ni veivutuni. Me tekivu mai na gauna oya e sotava na veika dredre o Tevita. E via taura na nona itutu vakatui o luvena o Apisalomi. Nira lako mai na lewenivanua mera mai raici Tevita, e dau tauri ira qai reguci ira o Apisalomi. E kaya na iVolatabu: “Sa qai rawa [se, “butakoca,” NW] na yalodra na Isireli ko Apisalomi.” E uqeti ira na lewenivanua mera vakadonui koya me tui mera kua ni vakadonui Tevita.—2 Samuela 15:1-12.

E kaukaua beka na nomu vinakata e dua na ka me vakataki iratou o Ekani, Tevita, kei Apisalomi?— Ke dua e taukena, o qai taura vakailoa, ena wili vaka butako oya. O se nanuma tiko na ka e vinakata na imatai ni kabula e butako, o Setani?— E vinakata mera sokalou vua na tamata, mera kua ni sokalou vua na Kalou. O koya gona, e butako o Setani ni rawati rau o Atama kei Ivi me rau talairawarawa vua.

Ke dua e taukena e dua na iyaya, e lewa sara ga o koya se o cei e rawa ni vakayagataka. Me kena ivakaraitaki, de o lai qito beka ena nona vale na nomu itokani. E dodonu beka mo taura mai e dua na iyaya mai na vale oya i nomudou?— Sega, qai vakavo ga ke sa solia mai o tama se tina i nomu itokani. Ke o taura e dua na ka ni o sega ni kerea, ena wili vaka butako oya.

Ena gauna cava beka o na via butako kina?— Ke o vinakata e dua na ka e sega ni nomu. Ke sega ni dua e raica ni o taura na ka oya, o cei e raici iko tiko mai?— Na Kalou o Jiova. Meda kua ni guilecava ni sega ni vinakata na Kalou na butako. E vukei iko mo kua ni butako ke o lomana na Kalou kei ira na kai nomu.