NA CAVA o taleitaka cake, na cakacaka se na qito?— E sega ni ca na qito. E tukuna na iVolatabu ni o Jerusalemi e “oso e na gonetagane kei na goneyalewa era qito voli e na kena saqata.”​—Sakaraia 8:5.

E marautaka na Qasenivuli Levu na nona saravi ira na gone nira qito. Ni bera ni lako mai i vuravura, e kaya: “Au a qai tiko kaya [na Kalou] me matai daucakacaka . . . ka’u a marau tiko e matana.” Rau cakacaka vata kei Jiova mai lomalagi o Jisu. E kaya ni se tu mai lomalagi: “Ka’u a daumarautaki ira na luve ni tamata.” Io, me vaka daru sa vulica oti, na Qasenivuli Levu e kauaitaki keda kece, okati kina o kemuni na gone.​—Vosa Vakaibalebale 8:30, 31.

 E dau qito beka o Jisu ni se gone?— E rairai dau qito. Ni a “matai daucakacaka” ni tiko mai lomalagi, e cakacaka tale beka ga e vuravura?— E vakatokai o Jisu me “luve ni matai.” Ia e vakatokai tale ga me “matai.” Na cava e vakaraitaka oqo?— Ni vakavulici koya o Josefa, o koya e susugi koya. E matai tale ga o Jisu.​—Maciu 13:55; Marika 6:3.

E matai vakacava o Jisu?— Ni vakatokai me “matai daucakacaka” e kena ibalebale ni a maqosa sara na veika e cakava mai lomalagi. E sega beka ni kena ibalebale oqo ni na dua na matai maqosa e vuravura?— Vakasamataka mada na dredre ni cakacaka vakamatai ena gauna oya. E rairai lai musu kau  sara ga o Jisu, varovarota, colata mai vale, qai taya kina na teveli, idabedabe, kei na veiyaya tale e so.

E marautaka beka o Jisu na cakacaka oya?— O na marau beka ke o rawa ni taya e so na teveli kei na idabedabe mera vakayagataka e so?— E kaya na iVolatabu ni vinaka me dua e ‘rekitaka na nona cakacaka.’ Na marau o rawata mai na cakacaka o sega ni rawata ena qito.​—Dauvunau 3:22.

Na cakacaka e vinaka ina noda mona kei na yagoda. E levu na gone era dadabe tu ga ra qai sara retioyaloyalo se vakayagataka na video games. Oqo ena vakavuna mera sega ni marau ni na vakavuna ga mera levulevu ca ra qai malumalumu. Era na sega ni lai marau tale ga kina e so. Na cava meda cakava meda marau kina?—

Eda vulica ena Wase 17 ni ivola oqo nida na marau ga kevaka eda soli ka da qai dau veivukei. (Cakacaka 20:35) E vakatokai Jiova na iVolatabu me “Kalou mamarau.” (1 Timoci 1:11, NW) Eda wilika tale ga ena Vosa Vakaibalebale, ni o Jisu e “marau tiko e matana.” Na cava e vakavuna na marau nei Jisu?— E vakaraitaka e dua na vuna ena nona kaya: “Sa cakacaka tiko ga ko Tamaqu, ka’u sa cakacaka tale ga ko i au.”​—Joni 5:17, VV.

E sega ni cakacaka vakamatai tu ga o Jisu e vuravura. A nakita o Jiova me mai cakava o Jisu e dua na cakacaka e bibi cake. O kila se cakacaka cava oya?— E kaya o Jisu: “E dodonu me’u vunautaka tale ga na i tukutuku vinaka ni matanitu ni Kalou . . . ni sa i koya oqo na i naki ni noqu talai mai.” (Luke 4:43, VV) So e vunau vei ira o Jisu era vakabauti koya ra qai tukuna tale ga yani na veika era rogoca, me vaka na yalewa ni Samaria o raica ena iyaloyalo oqo.​—Joni 4:7-15, 27-30.

E raica vakacava o Jisu na cakacaka oqo? E taleitaka beka?— E kaya o Jisu: “A qau kakana me’u kitaka na loma i koya sa talai au  mai; ka me’u vakaotia na nona cakacaka.” (Joni 4:34) E vakacava na levu ni nomu via kania na kakana o taleitaka?— O rawa ni vakila e keri na levu ni nona taleitaka o Jisu na cakacaka e tukuna na Kalou me cakava.

E buli keda na Kalou meda marautaka na noda vulica e dua na cakacaka. E kaya o Koya ni nona isolisoli vua na tamata me “rekitaka na nona cakacaka.” O koya gona, ke o vulica mo dau cakacaka ni o se gone, o na marautaka na nomu bula.​—Dauvunau 5:19.

E sega ni kena ibalebale oqo ni rawa ni cakava nona cakacaka na tamata qase na gone, ia e rawa meda cakacaka kece. Rau na cakacaka beka na nomu itubutubu e veisiga me rawa mai kina na ilavo me ivoli ni kemudou kei na isau ni nomudou vale. O kila tale ga ni levu sara na cakacaka e gadrevi me caka e vale me rawa ni savasava tu ga kina.

Na cakacaka cava o rawa ni cakava ena yaga vei kemudou kece e vale?— O rawa ni vakarautaka na teveli ni kana, sava iyaya ni kana, kauta na kava ni benu, samaka nomu rumu, se maroroya nomu iyaya ni vakatatalo. De o sa cakava tiko e so na cakacaka oqo. Era na marautaka dina na lewe ni nomu vuvale na veicakacaka oqori.

Daru raica mada na yaga ni cakacaka vaka oya. E dodonu me maroroi na iyaya ni vakatatalo ni oti na vakatatalo. Na cava o nanuma e bibi kina oya?— Ena savasava kina na vale, ena sega tale ga ni yaco kina na vakacalaka. Ke o sega ni maroroya nomu iyaya ni vakatatalo, e rawa ni tacaqe kina o tinamu ena dua na siga. E rawa ni bale qai mavoa sara. De dua ena kau i valenibula. Ena sega beka ni ca oya?— O koya gona ke o maroroya nomu iyaya ni vakatatalo, era na marau kece na lewe ni vuvale.

E tu e so tale na nomuni cakacaka na gone. E kena ivakaraitaki na vuli lesoni. E vulici na wilivola mai koronivuli. So na gone era  taleitaka na wilivola, ia e so e dredre vei ira. Ke mani dredre nomu tekivu wilivola, o na qai marau e muri ke o vulica mo wilivola vinaka. Ke o sa kila na wilivola, ena levu sara na ka vinaka o rawa ni vulica. Ena rawa sara mada ga mo wilika na Vosa ni Kalou, na iVolatabu. O koya gona, ena yaga sara vakalevu na nomu gumatua ena vuli lesoni, se vakaevei?—

So era sega ni dau via cakacaka. De o kila beka e dua. Ni buli keda na Kalou meda dau cakacaka, e dodonu meda vulica meda marautaka na cakacaka. E vakacava na levu ni nona marautaka na Qasenivuli Levu na nona cakacaka?— E vaka sara ga na kakana e dau taleitaka. Na cakacaka cava beka oya?— Nona vakamacalataki Jiova na Kalou vei ira tale e so kei na nona vakaraitaka na sala mera rawata kina na bula tawamudu.

Oqo na ka e rawa ni vukei keda meda marautaka na cakacaka. Tarogi iko, ‘Na cava e gadrevi kina na cakacaka oqo?’ O na marautaka mo cakava e dua na cakacaka ke o kila ni gadrevi me caka. Ke levu se lailai, cakava vinaka ga na cakacaka oya. Ke o cakava oqori, o na marautaka nomu cakacaka, me vakataki koya na Qasenivuli Levu.