Kemuni na Daukacivaka na Matanitu ni Kalou:

Raitayaloyalotaka mada ni o dua vei ratou na yapositolo, o duri tu ena Ulunivanua ni Veiolive. E lako yani vei iko o Jisu ni bera ni lako cake i lomalagi, qai kaya: “Dou na rawata na kaukaua ni sobuti kemudou na yalo tabu, dou na qai tukuni au e Jerusalemi, e Jutia taucoko, e Samaria, kei na veivanua yawa sara kei vuravura.” (Caka. 1:8) Na cava o na cakava?

De dua o na lomaleqataka na itavi levu sa lesi qo vei iko. O na rairai veinanuyaka, ‘Ena rawa vakacava me keimami vunau na ilawalawa tisaipeli lalai qo ena “veivanua yawa sara kei vuravura”?’ O na rairai nanuma na ivakasala i Jisu ena bogi ni bera nona mate: “Na bobula e sega ni uasivia na nona turaga. Ke ra vakacacani au, era na vakacacani kemudou tale ga, ke ra muria na noqu vosa, era na muria tale ga na nomudou vosa. Ia era na cakava na ka kece qo vei kemudou ena vuku ni yacaqu, nira sega ni kilai koya e talai au mai.” (Joni 15:20, 21) Ni o vakasamataka tiko qori, o na rairai taroga, ‘Au na vunau vakacava niu vakacacani se tusaqati?’

Eda dau taroga tale ga qori nikua. E noda itavi tale ga na iVakadinadina i Jiova nikua meda vunau vakavinaka ina “veivanua yawa sara kei vuravura,” vei “ira na lewe ni veivanua.” (Maciu 28:19, 20) Ena vakayacori vakacava na cakacaka qo ni yaco na veitusaqati?

Ena dikevi ena ivola na Cakacaka na nona vukei ira na yapositolo kei ira na mataveitacini o Jiova ena imatai ni senitiuri G.V., mera vakayacora nodra ilesilesi. E vakarautaki na ivola qo moni wilika kina na ivolatukutuku qai vakila na ivakarau ni yalo e tukuni kina. O na kurabui ni levu na ka eda tautauvata kina na dauveiqaravi i Jiova nikua kei ira ena imatai ni senitiuri. E okati kina na cakacaka eda cakava kei na kena tuvanaki. Ni o vakasamataka na veika qori ena vaqaqacotaka nomu vakabauta ni dusimaka tiko o Jiova na nona isoqosoqo rairai e vuravura.

Keitou nuitaka qai masulaka ni veika o wilika ena ivola qo, ena vaqaqacotaka nomu nuitaki Jiova kei na veivuke ni nona yalo tabu. Moni yaloqaqa ni “vunautaka sara vakavinaka” na Matanitu ni Kalou qai vukea eso tale mera rawata na bula.—Caka. 28:23; 1 Tim. 4:16.