1. Vakamacalataka na ka era cakava na lewenivanua ena Soqo ni Penitiko.

 ERA maue na tiko ena gaunisala e Jerusalemi. a E kuvu cake na kubou mai na icabocabonisoro ena valenisoro nira lagata tiko na same na Livai (Same 113 ina 118). Era oso e gaunisala na vulagi. Era lako sara mai vakayawa mai na veivanua me vakataki Ilama, Mesopotemia, Kapatosia, Ponito, Ijipita, kei Roma. b Na soqo cava qo? Na Penitiko, e vakatokai tale ga me ‘siga e tamusuki kina na isevu ni ka e kaburaki.’ (Tiko 28:26) Na soqo vakayabaki qo e mai cava kina na tamusuki varile, e tekivu tale ga na tamusuki ni witi. Qo e siga marautaki.

2. Na ka veivakurabuitaki cava e yaco ena Penitiko 33 G.V.?

² Rauta na ciwa na kaloko ena mataka, ni se malumu tu na draki ena vulaitubutubu ni 33 G.V., e yaco e dua na ka ena sega ni guilecavi me vica vata na senitiuri. E vakasauri ga ni rogo mai lomalagi e dua na “rorogo e vaka na cagi kaukaua” se “vaka na cagi vakacevaruru.” (Caka. 2:2; International Standard Version) E vakasinaita na rorogo qori na lomanivale era soqoni tiko kina e rauta ni 120 na tisaipeli i Jisu. E qai yaco e dua na ka veivakurabuitaki. E laurai na veika e vaka na yameyame ni buka ni toka ena buradeladra na tisaipeli. c E “sobuti ira kece na yalo tabu,” era tekivu vosataka na vosa ni vanuatani! Nira biuta na vale na tisaipeli, era kurabuitaka na vulagi era sota e gaunisala nira vosataka na nodra vosa! Io, era rogoca “nira vosataka tiko na nodra dui vosa.”—Caka. 2:1-6.

3. (a) Na veisau levu cava e yaco ena sokalou dina ena Penitiko 33 G.V.? (b) E veisemati vakacava na ivakamacala i Pita kei na “ki ni Matanitu”?

³ Na itukutuku veivakauqeti qo e dusia e dua na veisau levu ena sokalou dina, na kena tauyavutaki na matanitu o Isireli vakayalo, oya na ivavakoso lotu vaKarisito lumuti. (Kala. 6:16) Ia e sega ni yaco ga eke. Ni  vosa vei ira na lewenivanua o Pita ena siga oya, e vakayagataka na imatai ni tolu na “ki ni Matanitu” ena dolavi kina eso na itavi bibi vei ira na lewenivanua ena duidui vanua. (Maciu 16:18, 19) Na imatai ni ki e rawa kina vei ira na Jiu kei ira na tavuki ina lotu vakaJiu mera ciqoma na itukutuku vinaka qai lumuti ena yalo tabu ni Kalou. d Era na wili mera Isireli vakayalo e nodra inuinui mera veiliutaki vakatui, mera bete tale ga ena Matanitu vakaMesaia. (Vkta. 5:9, 10) Ni toso na gauna, era sureti tale ga na kai Samaria kei ira na Veimatanitu ena itavi bibi qori. Na cava eda vulica na lotu vaKarisito nikua ena veisau levu e yaco ena Penitiko 33 G.V.?

4. E veisemati vakacava na ivavakoso ena 33 G.V., kei na ivavakoso lotu vaKarisito nikua?

⁴ E tekivu na ivavakoso vaKarisito nira “tiko kece ena dua na vanua” e rauta ni 120 na tisaipeli era lumuti ena yalo tabu, ena rumu ni tabavale e cake. (Caka. 2:1) Ena siga ya e tubu na kedra iwiliwili na papitaiso ena ivavakoso qori me vica vata na udolu. Qori e itekitekivu ga ni kena tubu tiko e dua na isoqosoqo me yacova mai nikua! Io, e dua na isoqosoqo era lewena na tagane kei na yalewa era doka na Kalou, oya na ivavakoso vaKarisito ni gauna qo, e kena inaki me ‘vunautaka na itukutuku vinaka ni Matanitu ni Kalou ena veiyasa i vuravura me ivakadinadina ina veimatanitu kece’ ni bera na ivakataotioti ni veika ni vuravura qo.—Maciu 24:14.

5. Eda na vakalougatataki vakacava nida veimaliwai ena ivavakoso vaKarisito nikua, me vakataki ira ga ena imatai ni senitiuri?

 ⁵ Era na vakayaloqaqataki vakayalo na lotu vaKarisito lumuti kei ira na ‘so tale na sipi’ ena ivavakoso vaKarisito. (Joni 10:16) E vakavinavinakataka o Paula na nodra veitokoni na lewe ni ivavakoso ni vola vei ira na lotu vaKarisito e Roma: “Au diva meu raici kemuni meu bau vota vei kemuni eso na isolisoli vakayalo moni vakaukauataki kina, se meda veivakayaloqaqataki ena vuku ni noda vakabauta, oya na nomuni vakabauta kei na noqu tale ga.”—Roma 1:11, 12.

6, 7. Era vakayacora vakacava na ivavakoso vaKarisito nikua na ivakaro i Jisu mera vunau ena veivanua kece?

⁶ Ena gauna qo e tautauvata tiko ga na inaki ni ivavakoso vaKarisito me vaka ga ena imatai ni senitiuri. E sega ni rawarawa na itavi era lesi kina na tisaipeli i Jisu, ia era marautaka. E tukuna vei ira: “Moni vakavulici ira na lewe ni veivanua kece ga mera tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.”—Maciu 28:19, 20.

⁷ Na ivavakoso vaKarisito ni iVakadinadina i Jiova e qarava na cakacaka qori nikua. E sega ni rawarawa meda vosa vei ira e duidui na nodra vosa. Ia era sa tabaka na iVakadinadina i Jiova na ivola vakaivolatabu ena sivia na 1,000 na vosa. Ke o dau tiko ena soqoni, o vakaitavi ena vunautaki ni Matanitu ni Kalou, o vakavulica tale ga eso mera tisaipeli, e dodonu mo marau. O sa maliwai ira tiko na lewe vica ga e vuravura e nodra itavi mera vunautaka sara vakavinaka na yaca i Jiova!

8. E yaga vakacava vei keda na ivavakoso vaKarisito?

⁸ E vakarautaka na Kalou o Jiova na mataveitacini e vuravura raraba mera vukei keda meda vosota qai marau tiko kina ena gauna dredre qo. E vola o Paula  vei ira na lotu vaKarisito Iperiu: “Meda dau veinanumi nida veivakauqeti ena loloma kei na caka vinaka, meda kua ni biuta na noda soqoni vata me vaka e nodra ivalavala eso, ia meda veivakayaloqaqataki, io me vakalevu nida raica ni sa voleka mai na siga.” (Iper. 10:24, 25) E vakarautaka o Jiova na ivavakoso vaKarisito meda veivakauqeti kina. Meda volekati ira na tacida vakayalo. Meda kua gona ni biuta na soqoni vaKarisito!

9, 10. Na cava era cakava eso mera vunau kina vei ira e duatani na nodra vosa?

⁹ Vakasamataka mada na levu ni nodra marau na Jiu kei ira na tavuki ina lotu vakaJiu era soqo vata ena Penitiko 33 G.V. Levu vei ira na tiko qori era rairai vosa vaKirisi se vakaIperiu. Ia qo era sa “rogoci ira na tisaipeli nira vosataka tiko na nodra dui vosa.” (Caka. 2:6) E lauti ira sara ga na itukutuku vinaka era rogoca ena nodra vosa. E sega ni soli vakacakamana vei ira na lotu vaKarisito nikua mera vosataka e dua tale na vosa. Ia e levu era soli ira mera vakatetea na itukutuku ni Matanitu ni Kalou vei ira na matatamata kece. Ena sala cava? Eso era vulica e dua tale na vosa mera veiqaravi kina ena kena ivavakoso, se ra toki ina dua tale na vanua. E levu era qoroya na nodra sasaga.

¹⁰ Vakasamataki Christine mada, e vulica na vosa vaGujarati kei na vitu tale na iVakadinadina. Ni sotava e dua na goneyalewa vosa vaGujarati rau cakacaka vata, e kidavaki koya sara ena nona vosanisucu. E qoroqoro na yalewa qori qai via kila na vuna e saga kina o Christine me vulica na vosa dredre me vaka na vaGujarati. A vunau sara vua o Christine. E tukuna na yalewa qo vei Christine: “Rairai dua na itukutuku bibi o via wasea tiko.”

11. Na cava ena vukei keda meda vunautaka na itukutuku vinaka ni Matanitu ni Kalou vei ira e duatani nodra vosa?

 ¹¹ E levu vei keda e sega ni vulica rawa e dua tale na vosa. Ia se rawa tiko ga nida vunautaka na itukutuku ni Matanitu ni Kalou vei ira e duatani na nodra vosa. Ena sala cava? Dua oya, na noda vakayagataka na porokaramu na JW Language® app meda vulica kina na vosa ni veikidavaki rawarawa ni so tale na vosa e vakayagataki ena vanua o tiko kina. E rawa tale ga ni o vulica eso na vosa rawarawa ena rawa ni uqeti ira na tataleitaki era vosataka. Dusimaki ira ena jw.org, rawa tale ga ni o vakaraitaka vei ira eso na vidio kei na ivola ena nodra vosa. Nida vakayagataka na ivukevuke qori ena noda cakacaka vakaitalatala, eda na vakila tale ga na marau era vakila na tacida ena imatai ni senitiuri ena gauna era rogoca kina na itukutuku vinaka ena “nodra dui vosa.”

12. (a) Na ka veivakurabuitaki cava e tukuna na Parofita o Joeli ni na yaco ena Penitiko 33 G.V.? (b) Cava eda vakabauta kina ni na vakayacori na parofisai i Joeli ena imatai ni senitiuri?

¹² “E tucake o Pita” me vosa vei ira na duikaikai. (Caka. 2:14) E vakamacalataka vei ira kece na rogoci koya tiko ni solia na Kalou na isolisoli ni duivosavosa me vakayacori kina na parofisai e cavuta o Joeli: “Au na sovaraka na yaloqu vei ira na tamata kece.” (Joeli 2:28) Ni bera ni lako cake i lomalagi o Jisu, e kaya vei ratou na nona tisaipeli: “Au na kerei Tamaqu, ena qai solia mai o koya e dua tale na dauveivuke,” e kaya o Jisu ni qo na “yalo tabu.”—Joni 14:16, 17.

13, 14. E saga vakacava o Pita me uqeta na lomadra na rogoci koya, eda na vakatotomuria vakacava?

¹³ Ena itinitini ni vosa i Pita, e kaya vakadodonu vei ira na vakarorogo: “Me kila na vuvale taucoko e Isireli ni o Jisu oni vakamatea ena kau e lesi koya na Kalou me Turaga, me Karisito tale ga.” (Caka. 2:36) Levu na vakarogoci Pita era a  sega ni tiko ena gauna e vakamatei kina o Jisu ena kaunirarawa. Ia e vakaitavi na matanitu taucoko ena ka e yaco oya. E vosa ga ena veidokai o Pita vei ira na Jiu, e saga me uqeta na lomadra. E nona inaki tale ga me uqeti ira na vakarorogo mera veivutuni, e sega ni vakalewai ira. Vakacava, era rarawataka na vakarorogo na vosa i Pita? Sega. E “coka sara ga na lomadra.” Era taroga: “Na cava me keimami cakava?” Na veidokai ni vosa i Pita e rairai uqeta na lomadra e levu, era vinakata sara ga mera veivutuni.—Caka. 2:37.

¹⁴ Eda rawa ni muria na iwalewale e vakayagataka o Pita me uqeta na lomadra na vakarorogo. Nida vunau meda kua ni vakalewa na rai kece e sega ni vakaivolatabu era tukuna mai na itaukeinivale. Meda veivosakitaka ga na tikina eda rawa ni duavata kina. Ni tiko na tikina eda duavata kina kei koya e rogoci keda, meda qai maqosataka na noda vakamacala mai na Vosa ni Kalou. Ni dau veivosakitaki na ka dina ena iVolatabu, ena rawarawa nira vakarorogo na yalomalumalumu.

15. (a) Na cava e tukuna o Pita, na cava e yaco kina? (b) Cava e veiganiti kina mera papitaiso e vica na udolu ena siga ga era rogoca kina na itukutuku vinaka ena Penitiko?

¹⁵ Ena siga vakairogorogo ni Penitiko 33 G.V., e kaya o Pita vei ira na Jiu kei ira na tavuki ina lotu vakaJiu: “Ni veivutuni, ni papitaiso kece.” (Caka. 2:38) Era mani papitaiso e rauta ni le 3,000, kena irairai nira papitaiso ena tobu e Jerusalemi se na vanua volekata. e Vakacava era cakava vakariri? E vakaraitaka qori ni rawa nira vakatotolotaki mera papitaiso na vuli iVolatabu kei ira na gone e lotu vaKarisito na nodra itubutubu? Sega. Nanuma ni o ira na Jiu kei ira na tavuki ina lotu vakaJiu era papitaiso ena Penitiko 33 G.V. era  gumatua ni vulica na Vosa ni Kalou, era lewe tale ga ni matanitu yalataki vei Jiova. Kena ikuri, era vakaraitaka na gugumatua, era lako sara mai vakayawa mera tiko ena soqo vakayabaki e dau caka e Jerusalemi. Nira ciqoma na dina kei na bibi ni itavi i Jisu Karisito ena vakayacori ni inaki ni Kalou, era vakarau tu mera qarava tiko ga na Kalou, ia qo mera papitaiso mera imuri i Karisito.

16. Era vakaraitaka vakacava na lotu vaKarisito ena imatai ni senitiuri na yalo ni vakuai ira?

¹⁶ E vakalougatataka dina o Jiova na ilawalawa qori. E tukuna na kena itukutuku: “Era soqoni vata o ira kece na sa mai vakabauta ena nodra wasea na ka e tu vei ira, era volitaka nodra iyau kei na ka era taukena, ra qai wasea na ka era rawata vei ira era leqa tu.” f (Caka. 2:44, 45) Eda na vinakata sara ga na lotu vaKarisito kece meda vakatotomuria na loloma kei na yalo ni vakuai keda va qori.

17. Na ikalawa bibi cava me muria e dua me rawa ni papitaiso?

¹⁷ E vica na ikalawa bibi vakaivolatabu e okati ena nona yalayala kei na nona papitaiso e dua me lotu vaKarisito. Me vulica na iVolatabu. (Joni 17:3) Me vakaraitaka nona vakabauta qai veivutunitaka na ivakarau ni nona bula e liu. (Caka. 3:19) Oti me veisau, me vakaitovotaka sara na ivalavala dodonu e salavata kei na loma ni Kalou. (Roma 12:2; Efeso 4:23, 24) Ni cakava oti qori, me yalataki koya vua na Kalou ena masu qai papitaiso.—Maciu 16:24; 1 Pita 3:21.

18. Na ka dokai cava era rawa ni cakava na tisaipeli i Karisito era papitaiso?

¹⁸ O sa yalayala qai papitaiso mo tisaipeli i Karisito? Ke vaka kina, mo marau ni ka dokai ni o sa tisaipeli i Karisito. Me vakataki ira ga na tisaipeli ena imatai ni senitiuri e sobuti ira na yalo tabu, o rawa ni vunautaka sara vakavinaka na Matanitu ni Kalou, mo cakava tale ga na loma i Jiova!