Eda dau vinakata na ilavo me rawa nida vakarautaka na ka era gadreva na noda vuvale. (Vosa Vakaibalebale 30:8) E “itataqomaki na ilavo.” (Dauvunau 7:12) E sega ni rawarawa mo drau veivosakitaka vakaveiwatini na veika me baleta na ilavo. Ia me kua ni vakaleqa nomudrau vakawati qori. (Efeso 4:32) Dodonu mo drau dau veinuitaki, mo drau vakatulewataka vata na vakayagataki ni ilavo.

NA KA E TUKUNA NA IVOLATABU: “O cei vei kemuni e via tara e dua na valececere ena sega ni tiko sobu mada me cakacakataka na kena isau, me raica se sa veirauti me vakaotia kina se sega?” (Luke 14:28) E bibi mo drau dau lalawataka vata na sala me vakayagataki kina na ilavo. (Emosi 3:3) Mo drau vakatulewataka na ka drau vinakata dina mo drau volia kei na levu ni ilavo drau rawa ni vakayagataka. (Vosa Vakaibalebale 31:16) Ke tiko mada ga na ilavo me vakayagataki, sega ni tukuni sara mo drau vakayagataka. Saga mo drau kua ni dinau. Mo drau vakayagataka ga na ilavo e tiko vei kemudrau.—Vosa Vakaibalebale 21:5; 22:7.

NA KA O RAWA NI CAKAVA:

• Ke vo tiko e vica nomudrau ilavo ni cava e dua na vula, drau lewa vakaveiwatini na kena vakayagataki

• Ke lailai nomudrau ilavo, drau navuca mo drau kua ni volivoli vakalevu. Kena ivakaraitaki, vakasaqara ga na kemudrau kakana, mo drau kua kina ni lai volia

NA KA E TUKUNA NA IVOLATABU: “Qarauna me keitou dina ena mata i Jiova ena ka kece, ena matadra tale ga na tamata.” (2 Korinica 8:21) Mo tukuna vakadodonu vei watimu na levu ni ilavo o rawata kei na kena o vakayagataka.

Ke o vakatulewataka eso na ka bibi me baleta nomu ilavo, mo drau dau veivosakitaka rawa qori kei watimu. (Vosa Vakaibalebale 13:10) Ni caka qori ena vinaka tiko ga kina na nomudrau bula vakawati. Mo raica na nomu ilavo ni veisaumi me ilavo ni vuvale, sega ni nomu taudua.—1 Timoci 5:8.

NA KA O RAWA NI CAKAVA:

• Mo drau duavata ena dua na fika se levu ni ilavo drau na vakayagataka, me kua ni qai kerei se tukuni tale vei watimu

• Drau kua ni waraka sara me yaco na leqa drau qai veivosakitaka na veika me baleta na ilavo