Na vakawati e tauyavutaki kina e dua na vuvale vou. O na lomani rau tu ga nomu itubutubu, o dokai rau tale ga, ia sa na bibi duadua vei iko o watimu. Era na rairai sega ni ciqoma rawa qori nomudrau itubutubu kei ira na weka voleka. Na ivakavuvuli vakaivolatabu e rawa ni vukei iko me donu nomu rai, mo veiyaloni tiko ga kina kei ratou na wekamu qai vaqaqacotaka nomu vuvale vou.

NA KA E TUKUNA NA IVOLATABU: “Mo rokovi tamamu kei tinamu.” (Efeso 6:2) Se mani vakacava na yabaki ni nomu bula, e se vinakati ga mo rokovi rau nomu itubutubu qai dokai rau. Mo nanuma tale ga ni bibi vei watimu me dau kauaitaki rau nona itubutubu. “Na loloma e sega ni vuvu,” mo kua gona ni nanuma ni na vakaleqa nomudrau vakawati na nona veimaliwai o watimu kei na nona itubutubu.—1 Korinica 13:4; Kalatia 5:26.

NA KA O RAWA NI CAKAVA:

• Qarauna mo kua ni dau tauca na vosa va qo “Ratou dau beci au tu ga nomu vuvale” se “E sega ni dau taleitaka o tinamu na ka au cakava”

• Saga mo raica na ka mai na rai i watimu

NA KA E TUKUNA NA IVOLATABU: “Ena biuti tamana kina kei tinana o tagane, ena kabiti watina, erau na lewe dua ga.” (Vakatekivu 2:24) Ni o sa vakawati, ena rairai nanuma nomu itubutubu ni rau se lewai iko tiko ga, de dua erau na via vakatulewa ena nomu bula vakawati.

Drau na lewa sara ga vakaveiwatini na vanua erau na sega ni vakatulewa kina na nomudrau itubutubu, ia me na tukuni vakayalololoma vei rau. Me rawarawa qai caka vakadodonu na veivosaki, me kua ga ni tau vakasabalia. (Vosa Vakaibalebale 15:1) Na yalomalumalumu, yalomalua, kei na vosovoso ena vukei iko mo veimaliwai vinaka tiko ga kei ira na wekamu, mo qai “dauveivosoti” tiko ga.—Efeso 4:2.

NA KA O RAWA NI CAKAVA:

• Ke o nanuma nira sa vakatulewa tiko vakalevu ena nomudrau bula vakawati na wekamudrau, veivosakitaka sara kei watimu ena gauna veiganiti

• Drau duavata vakaveiwatini ena sala mo drau walia kina na ituvaki qori