“Moni qasenivuli.” (Iper. 5:12) Raitayaloyalotaki Jiova mada na Qasenivuli maqosa duadua ena lomalagi kei na vuravura ni sureti keda meda vakavulici ira eso tale me baleti koya! E dua na itavi dokai qai bibi eda lesi kina, oya meda vakavulici ira na noda lewenivuvale, ivavakoso, kei ira na lewenivanua ena ka dina me baleti Jiova. Eda na rawata vakacava?

Na kena isau e tiko ena veivosa e vola na yapositolo o Paula vei Timoci: “Gumatua tiko ga ena wilivola e matanalevu, ena nomu veivakadreti, kei na veivakavulici.” E tukuna tale o Paula: “Ni o cakava qo o na vakabulai iko kei ira na rogoci iko.” (1 Tim. 4:13, 16) E vinakati mo wasea na itukutuku ni bula. E bibi gona mo vakavinakataka tiko ga na ivakarau ni nomu wilivola kei na veivakavulici. Ena veivuke kina na brochure qo. Dikeva eso na ka ena laurai kina.

E “Dauniveivakavulici Levu” o Jiova. (Aisea 30:20) Vakayagataka na ivola qo mo vakavinakataka kina na ivakarau ni nomu wilivola kei na veivakavulici, nanuma tiko ni qo na itukutuku i Jiova, o koya tale ga e vagolei ira mai. (Joni 6:44) Kerea wasoma na veivuke ni yalo tabu. Vakayagataka vakalevu na Vosa ni Kalou. Me vakalesui vei Jiova na veivakalagilagi, sega ni o keda. Saga mo uqeta na lomadra na vakarorogo mera lomani Jiova mai vu ni lomadra.

Oni sureti moni vakavulica na itukutuku bibi duadua vei ira na lewenivanua. Keitou nuidei ni gauna oni nuitaka kina na “kaukaua e solia na Kalou,” ena rawa vinaka na nomuni sasaga.—1 Pita 4:11.

Nomuni itokani qasenivuli,

iLawalawa Dauvakatulewa ni iVakadinadina i Jiova