“Au a susu ena dua na korolailai ena vualiku,” e kaya o Dauda mai Sierra Leone. “Niu se lailai, keitou a veiletitaka e dua na tikiniqele kei na dua tale na vuvale. Sega ni dua e via vakamalumalumu. Me macala na kena dina, e lai kau mai e dua na daurairai. E solia na daurairai na iloilo vua tale e dua na tagane qai ubi koya ena isulu vulavula. Sega ni dede, sa sautaninini qai bunolevu o koya e ubi no. Ni rai ina iloilo, sa qai kaya mai: ‘E dua na kena turaga sa lako tiko mai qo! E vakaisulu vulavula. E turaga balavu, sa qase sara, e sikoa na drauniuluna, e via vakalairoro toka.’

“E vakamacalataki Tukaqu sara tiko ga! Sa qai kaci mai ena levu ni nona rere: ‘Ke dou sega ni vakabauti au, dou mai raica sara ga!’ Ia keitou rava kece! Qai vakamalumutaki koya na daurairai ena nona kureitaka vua na wai e veiwaki kei na so na draunikau e tawa tu ena dua na dari.

“Sa qai vosa mai o ‘Tukaqu’ vei koya e rai tiko ina iloilo, qai tukuna ni qele oya e neitou. E tukuna vei buqu me vakayagataka ga na qele. E ciqoma na vakatulewa oya na vuvale adua. Mai vakameautaki na veileti.”

 Na veika vaka oqo e dau yaco vakalevu mai na Ra kei Aferika. Mai kea vaka kina ena veiyasa i vuravura tale e so, era vakabauta e vica vata na milioni nira dau dewa yani ina vuravura ni yalo o ira na mate, ra qai cakayaco mai kea vei ira na tamata era se bula tu e vuravura. E dina na vakabauta oqo? Era bula dina tu na mate? Kevaka e sega, o cei ga era lasutaka voli nira yalodra na sa mate? E rui bibi me kilai na isau dodonu ni veitaro oqo. Ni vauci kina na bula kei na mate.