E kaya na iVolatabu ni o Setani e “vakaisina na vuravura taucoko.” (Vakatakila 12:9, VV) E sega ni taleitaka o Setani kei na nona ilala timoni meda vakabauta na Vosa ni Kalou, na iVolatabu. Era saga mera lawakitaki keda meda vakabauta nira se bula tiko na mate ena vuravura ni yalo. Meda raica mada se ra cakava vakacava oya.

E levu na lotu era vakavuvulitaka ni tamata kece e tiko na yalodra e lako yani ina vuravura ni yalo ni sa mate na yago. Era kaya ni mate ga na yago, na yalo e sega. Era kaya tale ga ni sega ni dau mate na yalo, ni tawamate rawa.

Ia e sega ni ivakavuvuli ni Vosa ni Kalou oya. Ke o wilika tasevu na iVolatabu, o na sega vakadua ni wilika kina na vosa “yalo tawamate rawa” me vakaibalebaletaki vei keda na tamata. Na ivakavuvuli ni yalo tawamate rawa e sega ni ivakavuvuli ni iVolatabu. E ivakavuvuli ga i Setani kei ira nona timoni. O Jiova e cata na ivakavuvuli lasu kece ga vakalotu.—Vosa Vakaibalebale 6:16-19; 1 Timoci 4:1, 2.

Na cava ga e vakaibalebaletaka na iVolatabu ni vakamacalataka na “yalo” me ka e tiko vua na tamata?  Sa ivakadinadina beka oya ni bula na “yalo” ena gauna e mate kina na yago? Sega, e tukuna tiko ga ni oya na igunibula e tiko vei ira na ka bula kece. Na tamata kei na manumanu e tukuni ni tiko ruarua vei rau na “yalo.”—Dauvunau 3:21.

Na “yalo” e biuta na yagoda na tamata nida sa mate oya na igunibula e solia mai o koya e buli keda. E tukuni wale ga ni “lesu” vua na Kalou baleta ni o koya na iVurevure ni bula. E sega ni dua na ka e lako yani i lomalagi nida sa mate na tamata se na manumanu.—Dauvunau 12:7; vakatauvatana Luke 23:46 kei na Cakacaka 1:3, 9.

E sega ni rawa ni vosa se vakasama vakataki koya na yalo oqo baleta ni igunibula. E vaka na livaliva. Ena sega ni rogo rawa na retio ke sega na livaliva se na batiri. E vaka tale ga kina na yagoda ni na sega ni yavala ke sega na yalo oqo. (Jemesa 2:26) Na livaliva se na batiri erau sega ni vakarogoya rawa vakataki rau e dua na rorogo se ivakatagi, vakavo ga ke tiko na retio. Oqo e baleta ni livaliva e sega ni dau rorogo se me rawa ni vakatagitaka na ivakatagi. O koya gona, ni sa mate  e dua, sa sega ni qai yavalata tale tiko na yagona na igunibula, me vaka ga na cina ni boko ni sa boko na livaliva. Ni sa tu vakadua na igunibula se na “yalo” ena yago, sa mate e kea na tamata, sa suka tale ina kuvuniqele me vakataki ira ga na manumanu. (Dauvunau 3:20) Ni tukuni ni lesu vua na Kalou na yalo i koya sa mate, e kena ibalebale ga ni sa na vakatau vei Jiova na nona bula tale mai se sega o koya na tamata oya. Sa na qai lewa duadua ga na Kalou se me soli lesu se sega vei koya sa mate na yalo, se igunibula.

E dua tale na sala e veivakacalai kina o Setani oya nona vakayagataki ira na dauvakacuru. O koya e dauvakacuru e rogoca sara ga na ka era via kaya mai na yalo. E levu era vakabauta, wili kina na dauvakacuru, ni o ira na vosa tiko mai oya na yalodra na tamata era sa mate. Ia eda sa raica mai ena iVolatabu ni sega ni rawa vakadua oqo.—Dauvunau 9:5, 6, 10.

O cei ga era vosa tiko mai? O ira na timoni! E rawa vei ira na timoni mera vakaraica nona imoimoi e dua na tamata ni se bula; era kila na nona ivosavosa, na kena irairai, kei na ka e kila. E sega kina ni dredre mera vakamurimuria na tamata sa mate.—1 Samuela 28:3-19.

E dua tale na sala e dau vakabulabulataka kina o Setani na vakasama cala me baleti ira na mate oya ena italanoa lasutaki. Na italanoa vaka oya e dau vakasesea na tamata mai na ka dina e volai ena iVolatabu.—2 Timoci 4:4.

E levu na italanoa e dau rogo mai Aferika me baleti ira na sa mate nira laurai nira sa bula tale. Ia vakalevu ga mera dau raici ena vanua e yawa sara mai na nodra itikotiko e liu. O koya gona mo tarogi iko mada: ‘Ke tiko na kaukaua vua e dua me bula tale mai na mate, ena lai vakaitikotiko beka ena dua na vanua yawa sara, e yawa mai vei iratou nona vuvale kei ira nona itokani?’

De lakolako o koya e laurai erau veiucui ga kei koya na tamata sa mate? Me vaka mada oqo, mai Aferika, erau liaca e rua na italatala vakarisito erau vunau voli ni muri rau tiko ena vica na aua e dua na kena turaga. Ni rau tarogi koya, rau qai kila ni nanuma na qase oya ni dua vei rau e tacina a sa mate ena vica na yabaki e liu. E dina ni cala nona nanuma, ia a sega ga ni via vakadinata ni cala. Sa na wacava na italanoa i naqase vei ira na nona itokani kei na wekana!

De o sa dau rogoca nodra kaya e so nira raica, rogoca, se tadra e so na ka vakatani. Dua na ka na nodra dau domobula kina. E dau rogoca o Marein, e tiko mai na Ra kei Aferika, na domo i buna sa mate ni kacivi koya tiko ena bogi. Dau kaila o Marein ena levu ni nona domobula, eratou yadra kece kina nona vuvale. A yaco me ca sara kina na uluna.

Kevaka mera bula dina tu na mate, ena ka vakalialia mera mai vakarerei ira na wekadra lomani, se vakaevei? O ira ga na timoni era vakavurea tiko mai na itukutuku ca vaka oya.

Ia vakacava na itukutuku e vaka me yaga qai dau veivakacegui? Me vaka mada oqo, e tauvimate o Gbassay, e marama ni Sierra Leone. Mani tadrai tamana sa mate. E tukuna vua me lako ina dua na vunikau, vetia e dua na drauna, vusoya ena wai, qai gunuva. Ia me kua sara ni tukuna vua e dua na ka oqo ni se bera ni cakava. E muria o koya na ka e tukuni, mani bula kina.

E dua tale na yalewa e kaya ni rairai vua ena dua na bogi na watina sa mate. E kaya ni totoka na irairai i watina, qai rairai vinaka dina na isulu e tokara.

 Na itukutuku vaka oya kei na raivotu e vaka me dau yaga qai vinaka. Ia era lako mai vua na Kalou? Sega. O Jiova na “Kalou daudina.” (Same 31:5) E sega sara ni lomana meda lawakitaki se lasutaki. O ira ga na timoni era dau cakava oya.

Ia era tiko na timoni vinaka? Sega. E dina ni vaka mera dau via veivuke ena so na gauna, ia era ca kece ga. Ni sa vosa vei Ivi na Tevoro, e vosa me vaka e nona itokani. (Vakatekivu 3:1) Ia na cava e yacovi koya ni sa rogoci Setani qai cakava na ka e kaya? A mate.

Eda kila vinaka ni tamata inaki ca ena via vakaraitaka ni o koya e nodra itokani na tamata e saga tiko me lawakitaki ira. E kaya e dua na ivosavosa mai Aferika, “Bati vulavula, uto loaloa.” Qai kaya na Vosa ni Kalou: “Sa vakamataliataki koya ko Setani me agilose ni rarama.”—2 Korinica 11:14.

Sa sega ni qai veitaratara tale tiko na Kalou kei keda na tamata e vuravura ena vuku ni tadra, raivotu, se na domo e dau rogo mai na vuravura ni yalo. E dusimaki keda, e vakasalataki keda mai na iVolatabu, o koya e rawa ni vakarautaka e dua “ki nai valavala vinaka kece ga.”—2 Timoci 3:17.

Ni vakasalataki keda gona o Jiova meda qarauna na ilawaki ni Tevoro, e cakava oya baleta ni lomani keda. E kila nira meca rerevaki sara na timoni.