A2
iVakamacala ni Vakadewa Qo
A sevutaki ena 1950 na ilavelave vakavalagi ni Vakadewa ni Vuravura Vou ni iVolatabu vaKirisi vaKarisito, qai tabaki ena 1961 na iVolatabu taucoko. Tekivu mai na gauna qori sa yaga sara na vakadewa qo vei ira na vica vata na milioni na dauwiliwili ena 210 vakacaca na vosa, ni donu na kena vakadewataki mai na vosa taumada qai matata na wilika.
E kila na Komiti ni Vakadewa iVolatabu na Vuravura Vou, ni bibi me vakayagataki sara ga na vosa ni gauna qo ni na uqeta na lomadra na dauwiliwili. Qo eso na yavu e taurivaki ena vakadewa qo:
-
Vakayagataki na vosa ni gauna qo, e kilai rawarawa. Kena ivakaraitaki, e kilai levu ni “lomakatakata” e tautauvata ga kei na “yalokatakata,” sa mani taurivaki na vosa “yalogu” ni vakavotuya donu na vakasama e vinakati. (Aisea 9:7) Na vosa “qaqa sodrosodro” sa veisau me “domoqa.” (2 Timoci 3:4) Na “druma” sa veisau me “lecaika.” (Vosa Vakaibalebale 12:1) Na “daubole” e sosomitaki ena “tukutukuni ira.” (2 Timoci 3:2)
E wili tale ga ena vosa makawa era veisautaki na “pulumokau.” E taurivaki na vosa kilai levu ena gauna qo na “bulumakau.” (Vakatekivu 12:16) Sa sosomitaki tale ga na yaca “Kolaiaci” me “Koliaci” ni kilai levu, e matau tale ga ni cavuti. (1 Samuela 17:4) Na “kapiteni” sa veisau me “iliuliu ni mataivalu.” (Vakatekivu 21:22) Na “tepeli” me “teveli” (Maciu 15:27), kei na so tale.
-
Vakamatatataki na vosa vakaivolatabu. E sagai me vakamacalataki na ibalebale ni vica na vosa e tiko ena ilavelave vakavalagi. Kena ivakaraitaki, na vosa vakaIperiu na “Seoli” kei na vosa vaKirisi na “Etesi” e vakayagataki ena iVolatabu me dusia na ibulubulu ni kawatamata. Levu era sega ni kila na vosa ruarua qo. E rua tiko na ibalebale ni vosa na “Etesi” ena itukuni vaKirisi. Era vakaibalebaletaka na dauvola iVolatabu na vosa ruarua qo me “iBulubulu,” qai biu ga ena ivakamacala e ra na vosa “Seoli” kei na “Etesi.”—Same 16:10; Cakacaka 2:27.
E vaka kina na vosa “ivi,” e vakayagataki ni dusia na tikiniyago. Ia ni vakatakarakarataka e dua tale na ka, me vaka ena Same 7:9, 26:2 kei na Vakatakila 2:23, e biu ena tikinivolatabu qo na kena ibalebale, oya na “veika titobu au dau vakila” se “na vakanananu titobu,” qai biu ena ivakamacala e ra na “ivi.”
Eso tale na vosa me vaka na “uro,” na “lewemu,” kei na “ileu” e vakadewataki tale ga va qori, me vakatau ena lewe ni ivakamacala. (Vakatekivu 45:18; Dauvunau 5:6; Jope 16:15) Eso na vosa qo e vakamacalataki ena “iVakamacala ni Vosa ena iVolatabu.”
E qarauni vinaka na veisau kece e caka ena tikinivolatabu ni salavata kei na masu, qai dokai vakalevu na itavi e qarava na Komiti taumada ni Vakadewa iVolatabu na Vuravura Vou.
-
Rawarawa na Wilika. Ena vosa taumada e volai kina na iVolatabu, so na gauna e dau vakaduiduitaki na kena caka oti e dua na ka mai na kena caka tiko, se na kena vakarau caka. Oya na vuna e vakacurumi kina ena so na gauna na vosa “tiko ga” me vakavotui kina na vakasama e vakabibitaki ena kena vosa taumada me vaka na “kerekere tiko ga,” “vaqaqara tiko ga,” kei na “tukituki tiko ga.” (Maciu 7:7, 8) Na iVolatabu makawa e taurivaki tale ga kina eso na ituvatuva ni vosa sa sega ni taurivaki ena vosa ni veisiga ena gauna qo. Kena ivakaraitaki, e cavuti vakalevu kina na “ko,” “ki,” kei na isema ni vosa na “ka.” Na vakadewa qo e muria ga na vosa ni gauna qo ni cavuti vakalevu kina na “o,” “i,” sa sega tale ga ni cavuti vakalevu na “ka” me isema ni vosa ni veivosaki e veisiga.
So tale na ka e laurai ena iVolatabu qo:
Na vakadewa ni iVolatabu qo e vica toka na kena ivakamacala e ra. E va qo na kena wasei:
-
“Se” So tale na kena ibiubiu mai na vosa vakaIperiu, vakaArame, se vaKirisi e tautauvata ga na kena ibalebale.—Vakatekivu 1:2, ivakamacala e ra ni “igu kaukaua ni Kalou”; Josua 1:8, “wilika toka e ra.”
-
“Se rawa ni” So tale na kena ibiubiu e yavutaki vinaka, ia e duidui na vakasama e vakavotuya.—Vakatekivu 21:6, “dredre vata kei au”; Sakaraia 14:21, “kai Kenani.”
-
“Ipe.; Kir.” Na vakadewa vosa yadua mai na vosa vakaIperiu, vakaArame, se vaKirisi se na ibalebale ni vosa mai na vosa taumada.—Vakatekivu 30:22, “bukete”; Lako Yani 32:9, “yalokaukaua.”
-
Kena ibalebale kei na so tale na itukutuku Na ibalebale ni yaca (Vakatekivu 3:17, “Atama”; Lako Yani 15:23, “Mara”); ivakamacala matailalai me baleta na ivakarau bibi kei na ivakarau (Vakatekivu 6:15, “kiupiti”); so tale na kena itukutuku e tiko ena iKuri kei na iVakamacala ni Vosa.—Vakatekivu 37:35, “iBulubulu”; Maciu 5:22, “Qiena.”
Na iwasewase e liu, e kena ulutaga “Cava e Kaya na Vosa ni Kalou?” e vakamacalataki vakalekaleka kina na ivakavuvuli vakaivolatabu. Oti ga na lewe ni iVolatabu, sa tiko sara na “Veitaravi ni iVola ena iVolatabu,” na “iDusidusi ni Vosa ena iVolatabu,” kei na “iVakamacala ni Vosa ena iVolatabu.” E yaga na iVakamacala ni Vosa me kila o koya e wilika na vosa kei na vanua e vakayagataki kina. Qo na lewe ni iKuri A: “Yavu ni Vakadewa iVolatabu,” “ iVakamacala ni Vakadewa Qo,” “Mai tu Vakacava Vei Keda na iVolatabu,” “Yaca ni Kalou ena iVolatabu vakaIperiu,” “Yaca ni Kalou ena iVolatabu vaKirisi vaKarisito,” “Ira na Parofita kei na Tui Juta kei Isireli,” kei na “Veika Bibi ena Bula i Jisu e Vuravura.” Na iKuri B e tiko kina na mape, na iyaloyalo, kei na so tale na itukutuku ena yaga vei ira na gonevuli gugumatua ni iVolatabu.
E tiko ena loma ni iVolatabu na ivakamacala leleka ni wase kece ni ivola kei na kena tikinivolatabu, me kila o koya e wilika na lewe ni ivola taucoko. E tiko ena iyatu e loma ni drauniveva yadua na idusi ni tikinivolatabu veisemati.
