Era kaya eso ni vakadewa vosa yadua ena rawarawa vua e wiliwili me kila vinaka na ibalebale ni ka e volai ena vosa taumada. Ia e sega ni dina ena levu na gauna. Qo eso na vuna:

• Ena sega ni tautauvata na lawa ni rua na vosa, na iwiliwili ni vosa, kei na ituvatuva ni iyatuvosa. E vola e dua na parofesa ni vosa vakaIperiu, o S. R. Driver, ni “sega ni duidui wale ga na kena ituvatuva kei na kena yavu, e duidui tale ga . . . na ivakarau e buli kina na vakasama ena dua na iyatuvosa.” Ni duidui na vosa, e duidui tale ga na ivakarau ni vakasama. E tomana o Parofesa Driver, “E sega gona ni tautauvata na tuvai ni iyatuvosa ena dui vosa.”

• E sega ni dua na vosa ena gauna qo me tautauvata vinaka sara kei na iwiliwili ni vosa kei na ituvatuva ni vosa vakaIperiu, vakaArame kei na vaKirisi e volai kina na iVolatabu. O koya gona, na vakadewa vosa yadua ni iVolatabu ena buawa, se na vakadewataka cala na kena ibalebale ena so na gauna.

• Ena duidui na ibalebale ni vosa se matavosa ni laurai na ikotokoto e vakayagataki kina.

O koya e vakadewa e rawa ni vakadewataka yadua na vosa taumada ena so na vanua, ia me vakasamataki vakavinaka qo.

Qo eso na ivakaraitaki ni kena tauri cala na vakasama ena vakadewa vosa yadua:

• E volai ena iVolatabu na vosa “moce” kei na “sa qai moce” me  dusia ruarua na moce kei na moce ni sa mate. (Maciu 28:13; Cakacaka 7:60, ivakamacala e ra) Ni volai na matavosa va qo ena ikotokoto e dusia na mate, era vakayagataka na dauvakadewa iVolatabu na vosa me vaka na ‘moce ni mate,’ mera kua ni veilecayaki kina na dauwiliwili ena gauna qo.​—1 Korinica 7:39; 1 Cesalonaika 4:13; 2 Pita 3:4.

• E cavuta na yapositolo o Paula e dua na matavosa ena Efeso 4:14 e rawa ni vakadewataki ga vakadodonu me “viritaki na daisi ni tamata.” Na ivosavosa makawa qo e vakaibalebaletaka na nodra dau lawakitaki eso ni vakayagataki na daisi. Ena levu na vosa, e sega ni vakaibalebale ni vakadewataki vakadodonu na matavosa qo. E matata sara ni vakadewataki ga me “ilawaki ni tamata.”

• Ena Roma 12:11 e volai kina e dua na matavosa vaKirisi, ni vakadewataki vakadodonu e kena ibalebale “me buebue na yalo.” Ia e sega ni vakavotuya na kena ibalebale e tiko ena vakavalagi, e vakadewataki gona ena iVolatabu qo me “uqeti kemuni ga na yalo tabu.”

• Ena iVunau rogo nei Jisu ena Ulunivanua e tukuna kina e dua na matavosa e dau vakadewataki me “Sa kalougata ko ira sa yalomalumalumu.” (Maciu 5:3, Ai Volatabu) Ia ena levu na vosa, e buawa ni vakadewataki vakadodonu na matavosa qo. Ena so na gauna ni vakadewataki na vosa yadua, “ko ira sa yalomalumalumu” e rawa ni kena ibalebale ni sega ni tu vinaka nodra vakasama, se ra sega ni bulabula, era gogo. Ia e vakavulici ira na lewenivanua o Jisu ni vakatau nodra marau nira muria na veidusimaki ni Kalou, sega ni nodra vakaceguya na ka era gadreva vakayago. (Luke 6:20) Na matavosa me vaka “o ira na kauaitaka nodra bula vakayalo” se “o ira na kila ni bibi me dusimaki ira na Kalou” e dusia na ibalebale donu ni matavosa taumada.​—Maciu 5:3; The New Testament in Modern English.

• Ena levu na tikinivolatabu, na vosa vakaIperiu e vakadewataki me “vuvu” e salavata kei na ibalebale ni vosa vakavalagi, oya na nona cudruvaka e dua ni sega ni dina e dua erau veivolekati, se vuvutaka na ka era taukena eso. (Vosa Vakaibalebale 6:34; Aisea 11:13) Ia na vosa vakaIperiu vata ga qori e dusia tale ga na ka vinaka. Me kena ivakaraitaki, e rawa ni vakadewataki me “yalogu” i Jiova se nona gumatua me taqomaki ira nona  dauveiqaravi, se ni vinakata “me qaravi duadua ga.” (Lako Yani 34:14; 2 Tui 19:31; Isikeli 5:13; Sakaraia 8:2) Rawa tale ga ni dusia nodra “yalogu” na dauveiqaravi yalodina ni Kalou kei na nodra sokalou, se nira ‘sega ni vakalaiva na itovo veibeci’ me caka vua.​—Same 69:9; 119:139; Tiko Voli Mai na Lekutu 25:11.

• Na vosa vakaIperiu e dau vakaibalebale ina liga ni tamata e levu tu na kena ibalebale. Ni vakatau ena ka e vakamacalataki tiko, e rawa ni vakadewataki me “lewa,” “lomasoli,” se “kaukaua.” (2 Samuela 8:3; 1 Tui 10:13; Vosa Vakaibalebale 18:21) E 40 vakacaca na ivakadewa ni vosa qo ena iVolatabu vakavalagi na Vakadewa ni Vuravura Vou.

Ni vakasamataki na tikina qo, e levu na ka e vauci ena vakadewa iVolatabu, e sega ni vakadewataki na vosa taumada ina dua ga na vosa ena gauna kece e basika kina. Me lewa vinaka o koya e vakadewa na vosa e digia me vakavotuya vinaka na vakasama ena vosa taumada. E vinakati tale ga me tuvana vinaka na iyatuvosa me muria na lawa ni vosa e vakadewa kina, me rawarawa na wilika.

Ia me kua ni sivia tale na kena vakamacalataki na ka e vakadewataki. Na daunivakadewa e vakalekalekataka nona vakadewa ni iVolatabu me salavata kei na ka ga e nanuma e rawa ni vakadewataka cala na kena ibalebale. Ena sala cava? O koya e vakadewa e rawa ni biuta nona vakasama me baleta na ka e nanuma ni ibalebale ni vosa taumada, se vakalutuka eso na tikina bibi e tiko ena vosa taumada. De rawarawa ni wiliki na iVolatabu e vakadewataki vakalekaleka, ia ena so na gauna ena dredre ni kila o koya e wiliwili na itukutuku dina.

E rawarawa sara ni moica nona cakacaka na daunivakadewa na ivakavuvuli e vakabauta. Me kena ivakaraitaki, e kaya na Maciu 7:13 ni “galala na sala e basika ina rusa.” Eso na daunivakadewa era vakayagataka na vosa “eli,” era sega ni vakayagataka na vosa vaKirisi e kena ibalebale dina na “rusa.” E rairai uqeti ira na ivakavuvuli era vakabauta.

Me vakasamataka tale ga o koya e vakadewa ni volai na iVolatabu ena vosa rawarawa, nodra vosa ni veisiga na lewenivanua, me vakataki ira na dauteitei, na ivakatawanisipi, kei ira na dauqoli. (Niemaia 8:8, 12; Cakacaka 4:13) O koya gona, na ivakadewa vinaka ni iVolatabu e matata na kena itukutuku vei ira na lewenivanua yalomalumalumu,  se mani vakacava nodra isususu. E vakayagataki vakalevu na vosa e matata, e kilai levu, e kilai rawarawa tale ga, sega so na vosa e vakavudua nodra vakayagataka na lewenivanua.

Levu na dauvakadewa iVolatabu era bokoca vakatawadodonu na yaca ni Kalou o Jiova ena levu na ivakadewa ni gauna qo, ia e volai na yaca qori ena ivolavivigi makawa ni iVolatabu. (Raica na iKuri A4.) E levu na vakadewa e sosomitaka na yaca qori ena icavuti, me vaka “Turaga,” eso mada ga era saga me kua ni kilai ni tiko na yaca ni Kalou. Me kena ivakaraitaki, ena so na vakadewa, e volai na masu nei Jisu ena Joni 17:26: “Au vakatakilai kemuni vei iratou,” kei na Joni 17:6, “Au vakatakilai kemuni vei iratou oni solia vei au.” Ia na vakadewa donu ni masu nei Jisu me va qo: “Au sa vakatakila vei ratou na yacamuni” kei na “Au sa vakatakila na yacamuni vei ratou oni solia vei au.”

E volai ena ivakamacala taumada ni imatai ni iVolatabu vakavalagi ni Vakadewa ni Vuravura Vou: “Keitou sega ni vakadewataka vakalekaleka na iVolatabu. Neitou sasaga me vakadewataki vakavoleka na vosa taumada ke rogo matau ena vosa vakavalagi ni gauna qo, ia me kua ni lai buawa kina na vakasama e vakavotui.” E saga gona na Komiti ni Vakadewa iVolatabu na Vuravura Vou me lewa vinaka nona vakayagataka na vosa kei na matavosa e vakadewataka donu na vosa taumada, ia e sega ni vakayagataka na vosa ena dredre me wiliki se buawa kina na vakasama e sagai me vakavotui. Io, ena rawarawa ni wiliki na iVolatabu qai nuidei o koya e wilika ni vakadewataki donu na itukutuku e uqeta na Kalou.​—1 Cesalonaika 2:13.