iMatai ni Joni 4:1-21
4 Kemuni na wekaqu lomani, ni kua ni vakabauta na itukutuku kece e nanumi ni vu vakalou,+ ni vakatovolea mada moni kila kina ke ra vu dina vakalou,+ ni levu na parofita lasu era sa basika e vuravura.+
2 Oni na kila na itukutuku e vu vakalou ena tikina qo: Na itukutuku kece e vakadinadinataka ni a mai tamata o Jisu Karisito e vakavuna na yalo tabu ni Kalou.+
3 Ia na itukutuku kece e sega ni vakadinadinataki Jisu e sega ni vu vakalou.+ Kena ikuri, qo na itukutuku e kacivaka na meca i Karisito, na itukutuku oni a rogoca ni lako tiko mai,+ sa tu qo e vuravura.+
4 Oni tovata kei na Kalou ragone, oni sa vakamalumalumutaki ira tale ga na parofita lasu,+ ni o koya e duavata kei kemuni+ e uasivi koya e duavata kei vuravura.+
5 Era tovata kei vuravura,+ oya na vuna era tukuna kina na ka e vu e vuravura qai rogoci ira o vuravura.+
6 Eda tovata kei na Kalou. O koya e kila na Kalou e rogoci keda,+ o koya e sega ni tovata kei na Kalou e sega ni rogoci keda.+ Qo na sala eda kila kina na parofisai dina kei na parofisai lasu.+
7 Kemuni na wekaqu lomani, meda veilomani tiko ga+ baleta ni ivurevure ni loloma na Kalou, o koya yadua e dau loloma e luve ni Kalou, e kila tale ga na Kalou.+
8 O koya e sega ni dau loloma e sega ni kila na Kalou, baleta ni Kalou ga na loloma.+
9 E kilai na loloma ni Kalou ena ka e yacovi keda ni tala mai vuravura na Kalou na Luvena e duabau ga e vakatubura,+ meda vakabulai kina ena vukuna.+
10 Na loloma qo e sega ni vakatau ena noda lomana na Kalou, o koya ga e lomani keda qai tala mai na Luvena me isoro ni noda ivalavala ca+ meda veiyaloni kina kei koya.+
11 Kemuni na wekaqu lomani, ke sa va qo na nona lomani keda na Kalou, e dodonu meda veilomani tale ga.+
12 E sega ni dua e se bau raica na Kalou ena dua na gauna.+ Ke da veilomani tiko ga, ena tiko vata kei keda na Kalou, ena qai taucoko sara na noda vakaraitaka na nona loloma.+
13 Ena sala qo eda kila kina nida duavata tiko ga kei koya, e duavata tale ga kei keda o koya, ni sa sobuti keda na yalona.
14 Kena ikuri, keitou raica keitou vakadinadinataka tale ga ni tala mai na Luvena o Tamana me ivakabula kei vuravura.+
15 O koya yadua e vakatusa ni Luve ni Kalou o Jisu,+ ena duavata tiko ga kei koya na Kalou, ena duavata tale ga kei na Kalou o koya.+
16 Keitou sa mai kila, keitou vakabauta tale ga na nona lomani keitou na Kalou.+
Na Kalou ga na loloma,+ o koya e dau loloma ena duavata tiko ga kei na Kalou, na Kalou tale ga ena duavata tiko ga kei koya.+
17 Ena sala qo e vakataucokotaki kina na noda loloma, meda rawa ni doudou ni vosa+ ena siga ni lewa, me vakataki Jisu Karisito ga, meda vaka tale ga kina o keda ena vuravura qo.
18 E sega ni rerere na loloma,+ na loloma e taucoko e biuta tani na rere ni dau veivakaleqai na rere. O koya e dau rere e sega ni taucoko na nona loloma.+
19 Eda veilomani baleta ni a liu sara ga na nona lomani keda na Kalou.+
20 Ke dua e kaya, “Au lomana na Kalou,” ia e cata tiko na tacina, e lasulasu o koya.+ Ke sega ni lomana na tacina+ e raica, me qai lomana vakacava na Kalou e sega ni raica?+
21 Qo na nona ivakaro vei keda, o koya e lomana na Kalou, me lomana tale ga na tacina.+
