iMatai ni iVola Vei Ira mai Korinia 15:1-58
15 Ia qo raveitacini, au via vakaraitaka tale vei kemuni na itukutuku vinaka au a tukuna vei kemuni,+ oni a ciqoma, oni tudei tale ga kina.
2 Na itukutuku vinaka oni rogoca qo vei au oni sa na vakabulai tiko kina ke oni taura matua. Ke sega ena sega ni yaga na nomuni vakabauta.
3 E dua vei ira na ka bibi au vakadewataka vei kemuni, au a ciqoma tale ga, oya ni mate na Karisito ena vuku ni noda ivalavala ca me vaka e kaya na iVolatabu,+
4 e bulu,+ io, e vakaturi+ ena ikatolu ni siga+ me vaka e kaya na iVolatabu,+
5 e rairai sara vei Kifa*+ qai tarava vei ratou na le Tinikarua.+
6 Oti ya sa qai rairai vei ira na 500 vakacaca na veitacini ena dua ga na gauna,+ e levu vei ira oya era se bula tiko qo, ia eso era sa moce, oya era sa mate.
7 Oti sa qai rairai vei Jemesa,+ tarava sara vei ratou kece na yapositolo.+
8 Kena iotioti, e qai rairai vei au+ me vaka ga au sucudole.
9 O yau na imurimuri sara ni yapositolo, e sega mada ga ni ganita meu vakatokai meu yapositolo niu dau vakacacana na ivavakoso ni Kalou.+
10 Ia ena loloma soli wale ga ni Kalou, au mai yacova kina na vanua au sa tu kina qo. E sega tale ga ni maumau na nona loloma soli wale vei au, niu ogaoga sara vakalevu vei ira kece, ia e sega ni o yau, na loloma soli wale ga ni Kalou vei au.
11 O koya gona seu vunau o yau se o ira, qo na sala keimami vunau kina, qo tale ga na ivakarau ni nomuni vakabauta.
12 Ke vunautaki ni sa vakaturi mai na mate o Karisito,+ era qai tukuna vakacava eso vei kemuni nira sega ni vakaturi na mate?
13 Ke ra sega dina ni vakaturi na mate, kena ibalebale ni a sega ni vakaturi na Karisito.
14 Ia ke sega ni vakaturi na Karisito, sa tawayaga na noda vunau, sa tawayaga tale ga na noda vakabauta.
15 Kena ikuri, ke ra sega dina ni vakaturi na mate, eda sa na wili tale ga meda ivakadinadina lasu ni Kalou,+ nida vunautaka tiko ni sa vakaturi Karisito na Kalou,+ ia a sega ni vakaturi koya na Kalou.
16 O koya gona, ke ra sega ni vakaturi na mate, a sega tale ga ni vakaturi na Karisito.
17 Kena ikuri, ke sega ni vakaturi na Karisito, e sa tawayaga na nomuni vakabauta, oni se okati tiko ga moni valavala ca.+
18 O ira tale ga na tisaipeli i Karisito era moce tu, oya nira sa mate, era sa na yali vakadua.+
19 Ke da vakanuinui tiko vei Karisito ena bula ga qo, eda sa tamata vakaloloma dina.
20 Ia qo sa vakaturi mai na mate na Karisito me kedra isevu na moce tu, oya o ira na mate.+
21 Ni vakavuna na mate e dua na tamata,+ na nodra vakaturi tale ga na mate e rawati ena vuku ni dua na tamata.+
22 Era mate tiko na tamata kece ena vuku i Atama,+ ena bula vaka kina na tamata kece ena vuku i Karisito.+
23 Ena veitaravi ga: E isevu o Karisito,+ ra qai tarava yani o ira era nona ena gauna e sa tiko kina.+
24 Oti ya na icavacava, ni sa vakamalumalumutaka vakadua na matanitu kece, lewa kece, kei na kaukaua kece,+ sa na qai solia lesu na veiliutaki ni Matanitu vua na nona Kalou na Tamana.
25 Ni dodonu me veiliutaki tiko vakatui me yacova nira sa vakamalumalumutaki kece na meca e ruku ni yavana.+
26 Na iotioti ni meca me vakamalumalumutaki o mate.+
27 Na Kalou sa “vakamalumalumutaka na ka kece e ruku ni yavana.”+ Ia ni kaya, ‘sa vakamalumalumutaki na ka kece,’+ e macala ga ni sega ni wili eke o koya e vakamalumalumutaka vua na ka kece.+
28 Ni sa na vakamalumalumutaki na ka kece vua, ena qai vakamalumalumutaki koya tale ga na Luvena vei koya a vakamalumalumutaka na ka kece vua,+ me rawa ni ka kece ga na Kalou vei ira na tamata kece.+
29 Ke sega, na cava era na cakava o ira na papitaisotaki mera mate?+ Ke ra sega sara ga ni vakaturi na mate, na cava mera papitaisotaki kina mera mate?
30 Na cava meda bolea tiko kina na rarawa e veigauna?+
31 Au voleka ga ni mate e veisiga. E ivakadei ni ka qo na levu ni noqu marautaki kemuni na taciqu, na noqu marautaki Karisito Jisu tale ga na noda Turaga.
32 Keu vala kei ira na manumanu kila mai Efeso me vaka era cakava eso,*+ na cava na betena vei au? Ke ra na sega ni vakaturi na mate, “meda kana ga, da gunu, nida na mate nimataka.”+
33 Ni kua ni vakaisini kemuni. Na ilala ca e vakacacana na itovo vinaka.+
34 Ni yadra mai moni cakava na ka e dodonu, ni kua ni cakava na ka ca nira sega ni kila na Kalou eso. Au kaya qo moni madua kina.
35 Ia ena kaya e dua: “Era na vakaturi vakacava na mate? Na yago cava era na tucake mai kina?”+
36 O sa leqa sara ga o iko! Na ka o kaburaka ena sega ni tu tu ga e bula, ena mate mada e liu.
37 Me baleta na ka o kaburaka, o sega ni kaburaka na kau,* o kaburaka ga na sorena, na soreniwiti se dua tale na sorenikau,
38 ia na Kalou e solia na yago ni sorenikau yadua me vaka ga na nona lewa, e vakarautaka na yago era dui kilai kina.
39 E duidui na yago, e tiko na yago ni tamata, e duatani na yago ni bulumakau, e duatani tale na yago ni manumanuvuka, e duatani tale ga na yago ni ika.
40 E tiko na yago vakalomalagi,+ e tiko tale ga na yago vakavuravura.+ E duatani na lagilagi ni yago vakalomalagi, e duatani tale ga na lagilagi ni yago vakavuravura.
41 E duatani na lagilagi ni matanisiga, e duatani na lagilagi ni vula,+ e duatani tale ga na lagilagi ni kalokalo. Na kalokalo mada ga era sega ni tautauvata ena kedra lagilagi.
42 E vaka kina nodra vakaturi na mate. E vuca ni tei, ena sega tale ni vuca ni sa vakaturi.+
43 E beci ni se kaburaki, e lagilagi ni sa vakaturi.+ E malumalumu ni se kaburaki, e kaukaua ni sa vakaturi.+
44 E kaburaki ena yago vakayago, e vakaturi ena yago vakayalo. Ke sa tiko na yago vakayago, ena tiko tale ga na yago vakayalo.
45 Me vaka ga e volai: “Na imatai ni tamata o Atama e tamata bula.”+ Na iotioti ni Atama e qai yaco me kabula vakayalo, me vu ni bula.+
46 Ia e sega ni liu na ka vakayalo, na ka vakayago ga, sa qai muri na ka vakayalo.
47 E vu e vuravura na imatai ni tamata, e buli ena kuvuniqele,+ na ikarua ni tamata e vu mai lomalagi.+
48 O ira era vu e vuravura era vakataki koya ga e buli ena kuvuniqele, o ira era vakalomalagi era vakataki koya ga e vu mai lomalagi.+
49 Me vaka ga na noda ucui koya e vu mai na kuvuniqele,+ eda na ucui koya tale ga e vu mai lomalagi.+
50 Ia au kaya vei kemuni raveitacini, na yago kei na dra ena sega ni rawata na matanitu ni Kalou, na ka tale ga e vuca sa na sega tu ga ni rawa ni veisau me tawavuca.
51 Ia ni rogoca meu tukuna vei kemuni e dua na ka vuni tabu: Eda na sega ni moce kece, oya meda mate, ia eda na veisau kece,+
52 vakasauri me vaka na sauriva ni mata, ni tagi tiko na iotioti ni biukila. Ni sa na rogo na biukila,+ era na qai vakaturi na mate mera tawavuca, eda na veisau tale ga.
53 Na ka e vuca qo e sa na tawavuca,+ na ka e mate qo e sa na tawamate.+
54 Ia ni sa na vuki na ka vuca qo me tawavuca, me vuki tale ga na ka mate qo me tawamate, sa na qai dina na ka e volai: “Sa na tilomi vakadua o mate.”+
55 “O iko mate, i vei na nomu qaqa? O iko mate, i vei na nomu bati gaga?”+
56 Na bati gaga ni mate na ivalavala ca,+ ia na kaukaua ni ivalavala ca e toka sara ga ena Lawa.+
57 Eda vakavinavinaka vua na Kalou ni vakavuna noda qaqa ena vuku ni noda Turaga o Jisu Karisito!+
58 O koya gona, kemuni na taciqu lomani, ni tudei,+ kua ni yavala, dau vakaitavi vakalevu+ ena cakacaka ni Turaga ni sega ni ka wale+ na nomuni veiqaravi ena cakacaka ni Turaga.
iVakamacala e ra
^ E kilai tale ga me o Pita.
^ Se rawa ni, “mai na rai vakatamata.”
^ Kir., “na yago.”
