iMatai ni Samuela 13:1-23
13 E tui o Saula ni sa yabaki . . .,*+ e liutaki Isireli me rua na yabaki.
2 E digia o Saula e 3,000 na tamata e Isireli, e 2,000 era tiko vata kei Saula e Mikimasi kei na veiulunivanua e Peceli, e 1,000 era tiko vata kei Jonacani+ e Kipea+ nei Penijamini. E tukuna vei ira na kena vo mera dui lako ina nodra valelaca.
3 E qai mokuta o Jonacani na matasotia ni Filisitia+ e tiko e Kipa,+ era rogoca na kai Filisitia. E vakarota o Saula me uvuci na davui*+ ena vanua taucoko, e kaya: “Moni rogoca mada na Iperiu!”
4 Era rogoca kece na Isireli na itukutuku: “E mokuta o Saula na matasotia ni Filisitia, ia qo era sa boi ca na Isireli vei ira na kai Filisitia.” Era mani kacivi na tamata mera muri Saula i Kilikali.+
5 Era kumuni tale ga na kai Filisitia mera valuti ira na Isireli, e 30,000 na qiqinivalu kei na 6,000 na dauvodo ose, e vaka na mataninuku ni matasawa+ na kedra iwiliwili na sotia. Era lako cake mera keba e Mikimasi ena tokalau kei Peciaveni.+
6 Era raica na Isireli nira sa leqa nira taqaya, era mani vuni ena qaravatu, ena qakilo, ena veivatu,+ ena rumu e lomaniqele, kei na qara.
7 Eso mada ga na Iperiu era takosova na Joritani ina vanua nei Kata kei Kiliati.+ Ia se tiko ga e Kilikali o Saula, era sautaninini na tamata kece era muri koya tiko.
8 E wawa tiko ga o koya me vitu na siga me yacova na gauna a lokuca o Samuela, ia e sega ni lako i Kilikali o Samuela ra qai biuti koya na tamata.
9 E qai tukuna o Saula: “Moni kauta mai vei au na isoro kama kei na isoro ni veiyaloni.” E cabora sara o koya na isoro kama.+
10 Ni cabora oti ga na isoro kama, sa yaco yani o Samuela. E lai tavaki koya sara o Saula qai vosa vakalougatataki koya.
11 E kaya o Samuela: “Na cava o sa cakava?” E kaya o Saula: “Au raica nira sa biuti au na tamata,+ o sega ni lako mai ena gauna lokuci, ra qai kumuni na kai Filisitia e Mikimasi.+
12 Au mani kaya lo ga, ‘Era na lako sobu mai na kai Filisitia mera mai valuti au e Kilikali, ia au se sega ni vakamasuti Jiova.’ Oya na vuna au cabora kina vakavoraki na isoro kama.”
13 E kaya sara vei Saula o Samuela: “E sesewa na nomu ivakarau. O sa talaidredre ina ivakaro i Jiova na nomu Kalou e vakaroti iko kina.+ Ke o muria, ena vakataudeitaka o Jiova na nomu matanitu mo liutaki Isireli me tawamudu.
14 Ia qo ena sega ni dei na nomu matanitu.+ Ena raica mai o Jiova e dua na tamata e donu e lomana,+ ena lesia o Jiova me liutaki ira na nona tamata+ ni o sega ni muria na ka e vakaroti iko kina o Jiova.”+
15 E mani cavutu o Samuela me biuti Kilikali me lako cake i Kipea nei Penijamini, e wiliki ira sara na tamata o Saula, e rauta ni 600 na tagane era se tiko vata kei koya.+
16 E tiko mai Kipa ena nodra vanua na Penijamini o Saula, o Jonacani na luvena,+ kei ira na tamata era se tiko vata kei rau, era keba toka e Mikimasi na kai Filisitia.+
17 Era lako yani na dauvakacaca mai na nodra keba na kai Filisitia ena tolu na iwasewase. E gole e dua na iwasewase ina gaunisala e Ofira ina vanua o Suali,
18 e gole e dua tale na iwasewase ina gaunisala i Pecioroni,+ kei na ikatolu ni iwasewase e gole ina gaunisala ina iyala ni vanua e vakanamata ina buca o Sepoimi donuya na vanua talasiga.
19 Ia e sega ni dua na matai ni kaukamea e tiko ena vanua taucoko o Isireli, nira kaya na Filisitia: “Mera kua ni bulia na Iperiu e dua na iseleiwau se na moto.”
20 Era dau lako sobu kece na Isireli vei ira na Filisitia me vagatari na nodra batinisiviyara, nodra piki, nodra matau, se na nodra iseletakelo.
21 E dua na pimi* na isau ni kena vagatari na batinisiviyara, na piki, na iyaya mataitolu, na matau, kei na moto ni bulumakau.
22 Ena siga ni ivalu e sega ni laurai e dua na iseleiwau se na moto ena ligadra na tamata era tiko vata kei Saula kei Jonacani,+ erau vakaiyaragi ga o Saula kei Jonacani na luvena.
23 E lako yani e dua na matasotia ni Filisitia ina itatakoso e Mikimasi.+
iVakamacala e ra
^ E sega ni tiko na fika ena ivola vakaIperiu.
^ Ipe., “ileu.”
^ Dua na ivakarau makawa ni bibi, rauta ni ruanaikatolu na sikeli.
