iMatai ni Samuela 14:1-52
14 Ena dua na siga e kaya o Jonacani+ na luvei Saula vua na dauveiqaravi e cola tiko na nona iyaragi: “Lako mai me daru lako ina nodra kebanivalu na Filisitia e tiko ena tai kadua.” Ia e sega ni tukuna vei tamana.
2 E tiko o Saula ena ibili kei Kipea+ ena ruku ni vunipomekaraneti e Mikironi, era tomani koya e rauta ni 600 na tagane.+
3 (E tokara tiko na efoti+ o Eaija na luvei Etupi,+ na tuakai Ikapoti,+ na luvei Finiasi,+ na luvei Ilai+ na bete i Jiova e Sailo.)+ Era sega ni kila na tamata ni sa lako o Jonacani.
4 E tiko ena maliwa ni vanua e via muria o Jonacani me yacova yani na nodra kebanivalu na Filisitia e dua na vatu e vaka na bati ena dua na yasana, e dua tale na vatu e vaka na bati ena yasana adua, na yaca ni dua na vatu o Posesi, na yaca ni kena ikarua o Sene.
5 E duri tu e dua na vatu me vaka na duru ena vualiku me qara i Mikimasi, e dua tale e tiko ena ceva me qara i Kipa.+
6 E kaya sara o Jonacani vei koya e dau cola na nona iyaragi: “Lako mai me daru lako ina nodra kebanivalu na sega ni cili qo.+ De dua ena tokoni kedaru o Jiova, ni sega ni dredre vei Jiova me veivakabulai nira lewe levu se ra lewe vica ga.”+
7 E kaya vua o koya e dau cola na nona iyaragi: “Mo cakava ga na ka e guta na lomamu. Mo lako ina vanua o via lako kina, au na muri iko ena vanua ga e guta na lomamu.”
8 E qai kaya o Jonacani: “Daru na lako yani vei ira na tamata oya, me daru vakaraitaki kedaru vei ira.
9 Ke ra kaya vei kedaru, ‘Drau tu vakadua me keimami lako yani vei kemudrau!’ daru na tu ga ena vanua daru duri tu kina, daru kua ni lako cake vei ira.
10 Ia ke ra tukuna, ‘Drau mai valuti keimami!’ daru na lako cake ni na soli ira o Jiova e ligadaru. Qo na nodaru ivakatakilakila.”+
11 Oti erau vakaraitaki rau ena nodra kebanivalu na Filisitia. Era kaya na kai Filisitia: “Raica! Rau sa lako mai qo na Iperiu rau vuni tiko ena qara.”+
12 Era kaya sara na tamata ena keba vei Jonacani kei koya e dau cola na nona iyaragi: “Drau lako cake mai vei keimami, drau na kila na nomudrau cala!”+ E kaya sara o Jonacani vei koya e dau cola na nona iyaragi: “Muri au mai, ni na soli ira o Jiova e ligadra na Isireli.”+
13 E cabe cake o Jonacani e ligana kei na yavana, e muri yani o koya e dau cola na nona iyaragi, era tekivu bale na kai Filisitia e mata i Jonacani qai vakamatei ira mai muri o koya e dau cola na nona iyaragi.
14 Na imatai ni nodrau ravuravu o Jonacani kei koya e dau cola na nona iyaragi erau vakamatea kina e rauta ni 20 na tamata ena loma ni vanua e kena balavu e rauta ni veimama na eka na qele.
15 Era domobula o ira na keba tiko ena vanua kei ira kece na tamata era tiko ena kebanivalu, era domobula tale ga na dauvakacaca.+ E yavavala na qele, e vakavuna na Kalou mera domobula.
16 Era raica na yadra nei Saula mai Kipea+ nei Penijamini nira sa maue na veiyasana kece.+
17 E kaya o Saula vei ira na tamata era tiko vata kei koya: “Moni wiliwili mada, me laurai o cei e sega ni tiko vata kei keda.” Nira wiliwili, era raica ni rau yali o Jonacani kei koya e dau cola na nona iyaragi.
18 E mani kaya o Saula vei Eaija:+ “Kauta voleka mai na Kato ni Kalou dina!” (Ni tiko na Kato ni Kalou dina vei ira na Isireli ena gauna oya.*)
19 Ni vosa tiko o Saula vua na bete sa qai rogo levu ga na maue ena nodra keba na kai Filisitia. E qai kaya vua na bete o Saula: “Sa rauta na ka o cakava tiko.”*
20 E soqoni yani o Saula kei ira kece na tomani koya tiko mera lako ina ivalu, era raica sara nira veivakamatei ga vakataki ira na kai Filisitia ena nodra iseleiwau, era veilecayaki vakalevu.
21 O ira tale ga na Iperiu era to tu e liu vei ira na kai Filisitia, era lako cake vata kei ira ina keba, era sa lako vei ira na Isireli mera tokoni Saula kei Jonacani.
22 Era rogoca kece na Isireli era vuni+ toka ena veiulunivanua e Ifireimi nira sa dro na kai Filisitia, era cicimuri ira tale ga ena ivalu.
23 E mani vakabulai Isireli ena siga oya+ o Jiova, e dewa sara yani na ivalu i Peciaveni.+
24 Era lomaleqa vakalevu na Isireli ena siga oya, ni tukuna o Saula mera bubuluitaka na tamata: “Ena cudruvi o koya e kania e dua na ka* ni bera na yakavi meu totogitaki ira mada na kequ meca!” E sega gona ni dua vei ira na tamata e kania e dua na kakana.+
25 Era gole kece i veikau na tamata,* e toka ena qele na denioni.
26 Nira lako e loma ni veikau na tamata, era raica ni sa tiri tu na denioni, e sega ga ni dua e biuta na ligana i gusuna nira rerevaka na ka era bubuluitaka.
27 Ia e sega ni rogoca o Jonacani ni tukuna o tamana mera bubului+ na tamata, mani dodoka na mua ni nona ititoko e tiko e ligana me tonia ena denioni. Ni lokia na ligana me biuta e gusuna, e serau na matana.
28 E kaya sara e dua vei ira: “E tukuna o tamamu mera bubului na tamata, e kaya, ‘Ena cudruvi o koya e kania e dua na kakana nikua!’+ Oya na vuna era malumalumu kina na tamata.”
29 Ia e kaya o Jonacani: “E kauta mai o tamaqu na leqa levu ena vanua. Raica mada ni serau na mataqu niu tovolea vakalailai na denioni qo.
30 Sa na wacava na kena vinaka ke ra kania wale+ nikua na tamata na nodra itokinivalu na meca era raica! Ke levu sara na kai Filisitia era vakamatei.”
31 Ena siga oya era mokuti ira tiko ga na kai Filisitia mai Mikimasi me yaco i Eijaloni,+ era malumalumu vakalevu na tamata.
32 Era cici yani vakatotolo na tamata mera taura na itokinivalu, era kauta na sipi, na bulumakau, kei na luvenibulumakau mera vakamatea ena qele, era qai kania vata na kena dra.+
33 Era kaya vei Saula: “Raica! Era sa valavala ca vei Jiova na tamata nira kania vata na lewe ni manumanu kei na dra.”+ E kaya sara o koya: “Oni sa sega ni yalodina. Moni vaqiqica mai vakatotolo vei au e dua na vatu levu.”
34 Oti e kaya o Saula: “Moni lako yani vei ira na lewenivanua moni kaya vei ira, ‘Moni dui kauta mai na nomuni bulumakau kei na nomuni sipi moni mai vakamatea eke moni kania. Moni kua ni valavala ca vei Jiova ni oni kania na lewe ni manumanu kei na kena dra.’”+ Era dui kauta yani na tamata na nodra bulumakau ena bogi oya mera vakamatea e kea.
35 E qai tara o Saula e dua na icabocabonisoro vei Jiova.+ Qo na imatai ni icabocabonisoro e tara vei Jiova.
36 Oti e kaya o Saula: “Meda muri ira sobu na kai Filisitia ena bogi meda kovei ira me yacova na kida ni mataka. Meda kua ni vakabula e dua vei ira.” Era kaya: “Moni cakava na ka ga e vinaka e matamuni.” E qai kaya na bete: “Meda torova eke na Kalou dina.”+
37 E taroga na Kalou o Saula: “Meu muri ira sobu na kai Filisitia?+ Oni na soli ira e ligadra na Isireli?” E sega ni vosa vua ena siga oya na Kalou.
38 E kaya sara o Saula: “Moni lako kece mai na nodra turaga na tamata, moni vaqaqa na ivalavala ca cava e vakayacori nikua.
39 Me vaka ni bula dina tiko o Jiova, o koya e vakabulai Isireli, ke vakavuna mada ga o Jonacani na luvequ ena vakamatei ga.” Ia e sega ni dua e tukuna vua e dua na ka.
40 E qai kaya vei ira kece na Isireli: “Oni na tiko ena dua na yasana, o yau kei Jonacani na luvequ keirau na tiko ena dua tale na yasana.” Era kaya vei Saula na tamata: “Moni cakava ga na ka e vinaka e matamuni.”
41 E qai kaya vei Jiova o Saula: “Kemuni na Kalou ni Isireli, moni sauma mai ena Camimi!”+ E dusi Jonacani sara kei Saula, era bula na tamata.
42 Ia e kaya o Saula: “Moni vakawirimadigi+ mada vei au kei Jonacani na luvequ.” E qai dusi Jonacani.
43 E mani kaya o Saula vei Jonacani: “Tukuna mai, na cava o cakava?” E kaya vua o Jonacani: “Au tovolea ga vakalailai na denioni ena mua ni noqu ititoko e tiko e ligaqu.+ O yau qo! Au sa vakarau tu meu mate!”
44 E kaya o Saula: “Me vakayacora mada ga na Kalou me kuria tale ga, ke o sega ni mate Jonacani.”+
45 Ia era kaya vei Saula na tamata: “Vakacava, me mate o Jonacani o koya e kauta mai na qaqa* levu+ qo e Isireli? Me kua sara! Me vaka ni bula dina tiko o Jiova, ena sega sara ni dua na drauniuluna me lutu ina qele, ni Kalou ga e tokoni koya ena ka e cakava ena siga qo.”+ Era mani vakabulai Jonacani na lewenivanua, e sega ni mate.
46 E sega gona ni muri ira na kai Filisitia o Saula, era lako ga na kai Filisitia ina nodra dui vanua.
47 E vakataudeitaka o Saula na nona veiliutaki vakatui e Isireli, e valuti ira kece na kena meca ena veiyasana, e valuti ira na kai Moapi,+ o ira na Amoni,+ o ira na kai Itomi,+ o ira na tui Sopa,+ kei ira na kai Filisitia.+ Na vanua kece e lakova o koya e vakadruka.
48 E yaloqaqa ni vala me mokuti ira na Amalekaiti+ qai vakabulai ira na Isireli mai ligadra na dauvakacaca.
49 O ratou na tagane na luvei Saula o Jonacani, o Isivi, kei Malikisua.+ E rua na luvena yalewa, o koya e qase na yacana o Merapi,+ o koya e gone na yacana o Maikali.+
50 Na yaca i wati Saula o Einoami, na luvei Eimasi. Na yaca ni nona turaganivalu o Apineri,+ na luvei Neri, na tata levu nei Saula.
51 Na tamai Saula o Kisi,+ ia o Neri+ na tamai Apineri na luvei Epieli.
52 E kaukaua sara na nodra valuti na kai Filisitia ena gauna kece i Saula.+ Ni raica o Saula e dua na tamata kaukaua se yaloqaqa, ena kauti koya me lewe ni nona mataivalu.+
iVakamacala e ra
^ Ipe., “siga oya.”
^ Ipe., “Vakasuka na ligamu.”
^ Ipe., “madrai.”
^ Ipe., “vanua.”
^ Se “veivakabulai.”
