iMatai ni Samuela 17:1-58
17 E soqoni vata na nodra mataivalu na kai Filisitia+ mera lako ina ivalu. Era soqoni e Soko+ ena vanua o Juta, era keba sara e Efesitamimi+ ena tadrua ni vanua o Soko kei Aseka.+
2 Era soqoni vata o Saula kei ira na Isireli mera keba ena Buca o Ela,+ ra qai tuva vakaivalu mera vakasota kei ira na kai Filisitia.
3 Era tiko na kai Filisitia ena yasa ni dua na ulunivanua, era tiko na Isireli ena yasa ni ulunivanua kadua, e tu ena kedra maliwa na buca.
4 E lako sara mai e dua na tamata dauvala ena nodra keba na kai Filisitia, na yacana o Koliaci,+ mai Kaca,+ na kena balavu e ono na kiupiti, dua na ivakarau ni iqaqalo.*
5 E vakaisala kopa na uluna, e dara tiko na isulunivalu e veitaqataqai kina na veleti kaukamea lalai. Na bibi ni isulunivalu+ kopa e 5,000 na sikeli.*
6 E kopa na isasabai ni yavana, e lili toka ena tadrua ni tabana na moto*+ kopa.
7 Na dia kau ni nona moto e vaka na nodra kau na dautali isulu,+ na yame ni nona moto kaukamea e 600 na sikeli* na kena bibi, qai liu tiko vua o koya e cola na nona isasabai.
8 E tu vakadua qai kaci yani vei ira na mataivalu ni Isireli,+ e kaya vei ira: “Na cava oni mai tuva vakaivalu kina? O yau na kai Filisitia, o kemuni na dauveiqaravi nei Saula? Ni digia e dua na nomuni tamata me lako sobu mai vei au.
9 Ke rawa ni keirau vala me mokuti au, keimami na qai nomuni dauveiqaravi. Ia keu qaqa vua meu mokuti koya, oni na neimami dauveiqaravi moni qaravi keimami.”
10 E kaya tale na kai Filisitia: “Au bolea na mataivalu ni Isireli+ ena siga qo. Ni solia mai e dua me keirau vala!”
11 Ni rogoca o Saula kei ira kece na Isireli na nona vosa na kai Filisitia, era domobula, era rere vakalevu.
12 Ia o Tevita e luve ni turaga ni Efiraca+ mai Peceliema+ e Juta, na yacana o Jese,+ e walu na luvena tagane,+ sa kenaturaga toka ena gauna i Saula.
13 Eratou muri Saula ina ivalu na tolu na luvena qase o Jese.+ Na yacadratou na luvena tagane eratou lako ina ivalu o Iliapi+ na ulumatua, na kena ikarua o Epinatapi,+ kei na kena ikatolu o Sama.+
14 E gone duadua o Tevita,+ eratou muri Saula e tolu eratou qase.
15 E dau lako yani qai lesu vei Saula o Tevita ni vakatawa tiko na sipi+ nei tamana e Peceliema.
16 Ia e dau lako yani na kai Filisitia ena veimataka kei na veiyakavi me duri tu e matadra, me 40 na siga.
17 E qai kaya o Jese vei Tevita na luvena: “Mo taura mada na efa* covuata tavu qo kei na tini na ibuli madrai qo, mo kauta vakatotolo ina keba vei ratou na tuakamu.
18 Mo kauta na tini na iwasewase jisi* qo vua na turaga ni duanaudolu, mo raica tale ga se ratou bula vinaka tiko na tuakamu qai kauta lesu mai na kena ivakadinadina.”
19 Eratou tiko vata kei Saula kei ira kece na vo ni Isireli ena Buca o Ela,+ era valuti ira tiko na kai Filisitia.+
20 E sou vakamataka o Tevita me tataunaka na sipi vua e dua qai vakasosolo me lako, me vaka ga e vakaroti koya kina o Jese. Ni yaco yani ena loma ni keba, sa lako tiko na mataivalu ina bucanivalu, ra qai kaila mera vala.
21 Era tuva sara vakaivalu na Isireli kei ira na kai Filisitia mera veiqaravi na mataivalu.
22 E biuta vakatotolo o Tevita na nona iyaya me raica tiko na ivakatawaniyaya qai cici yani ina bucanivalu. Ni yaco yani, e taroga sara se ratou bula vinaka tiko na tuakana.+
23 Ni se vosa tiko vei ratou sa lako mai na tamata dauvala na yacana o Koliaci+ na kai Filisitia mai Kaca. E lako mai na nodra mataivalu na kai Filisitia me tukuna na vosa vata ga e liu+ mani rogoca o Tevita.
24 Nira raici koya ga na Isireli kece, era drovaki koya nira domobula.+
25 Era kaya na Isireli: “Oni sa bau raica na tagane e lako tiko mai qo? E lako mai me bolei Isireli.+ Na tagane e mokuti koya ena vakavutuniyautaki koya vakalevu na tui, ena solia vua na luvena yalewa+ qai vagalalataka* na vuvale i tamana e Isireli.”
26 E kaya sara o Tevita vei ira na tagane era duri volekati koya tu: “Na cava ena caka vua na tamata e mokuta na kai Filisitia oya, me kauta tani na irogorogo ca kei Isireli? O cei na kai Filisitia tawacili qo me bolea na mataivalu ni Kalou bula?”+
27 Era qai tukuna vua na tamata na ka ga era kaya e liu: “Qo na ka ena caka vua na tagane e mokuti koya.”
28 Ni rogoca o Iliapi na tuakana qase+ duadua ni vosa tiko vei ira na tamata, e cudruvi Tevita, e kaya: “Na cava o lakova sobu mai? O tataunaka tu vei cei na vica na sipi e tiko mai veikau?+ Au kila vinaka na nomu viavialevu kei na ca ni lomamu, ni o lako sobu ga mai mo raica na ivalu.”
29 E kaya sara o Tevita: “Na cava au cakava? Au taro wale tiko ga!”
30 Oti e vakanadakui koya me vosa vua e dua tale, e taroga na ka vata ga oya,+ ra qai tukuna vua na tamata na ka vata ga e liu.+
31 E rogo na vosa e cavuta o Tevita mani tukuni vei Saula. E qai talatala o Saula me lako mada yani.
32 E kaya vei Saula o Tevita: “Me kua sara ni vakayalolailaitaka e dua o koya. Ena lako na nomuni dauveiqaravi me vala kei na kai Filisitia qo.”+
33 Ia e kaya o Saula vei Tevita: “O na sega ni valuta rawa na kai Filisitia qo ni o se gone+ ga, e dauvala o koya mai na gauna se cauravou kina.”
34 E kaya tale vei Saula o Tevita: “A vakatawa tiko na qelenisipi i tamaqu na nomuni dauveiqaravi qai lako mai e dua na laione+ kei na dua na bea, erau dui kauta e dua na sipi mai na qelenisipi.
35 Au muria yani, au mokuta, au vakabula na sipi mai gusuna. Ni golevi au mai au qai dreta na vutina,* au mokuta, au vakamatea sara.
36 E vakamatea ruarua na laione kei na bea na nomuni dauveiqaravi, ia na kai Filisitia tawacili qo ena vaka ga e dua vei rau, ni bolea na mataivalu ni Kalou bula.”+
37 E kaya tale o Tevita: “O Jiova a vakabulai au mai na liga ni laione kei na bea, o koya ga ena vakabulai au mai na ligana na kai Filisitia qo.”+ E kaya sara vei Tevita o Saula: “Mo lako, me tokoni iko mada ga o Jiova.”
38 E qai vakaisulutaki Tevita o Saula ena nona isulu. E vakaisalataki koya ena isala kopa, oti e vakaisulutaki koya ena isulunivalu.
39 E vauca sara o Tevita na nona iseleiwau ena nona isulu qai saga me lako sa sega ni rawa, ni sega ni matau vua. E kaya vei Saula o Tevita: “Au sega ni lako rawa ena ka qo niu sega ni matau kina.” E mani luvata o Tevita.
40 E taura sara na nona ititoko e ligana, e digia e lima na vatu dravia mai uciwai,* e biuta ina nona kato ni vakatawa sipi qai taura toka e ligana na nona irabo.+ E torova sara yani na kai Filisitia.
41 E toro volekati Tevita yani na kai Filisitia, e liu tiko vua o koya e cola tiko na nona isasabai.
42 Ni rai yani na kai Filisitia me raici Tevita, e beci koya sara ga ni gone damudamu qai musudonu.+
43 E mani kaya vei Tevita na kai Filisitia: “O yau na koli,+ ni o taura tu ga mai na kau mo mai valuti au?” Oti e vosavakacacataki Tevita na kai Filisitia qo ena yaca ni nona kalou.
44 E kaya vei Tevita na kai Filisitia: “Lako mai vei au, au na solia na lewemu vei ira na manumanuvuka ni lomalagi kei ira na manumanu ni vanua.”
45 E kaya o Tevita vua na kai Filisitia: “O mai valuti au ena iseleiwau kei na rua na moto,*+ ia au lai valuti iko ena yaca i Jiova ni lewe vuqa,*+ na nodra Kalou na mataivalu ni Isireli o bolea.+
46 Ena siga ga qo ena soli iko e ligaqu+ o Jiova, au na mokuti iko, au na tamusuka na ulumu. Ena siga tale ga qo au na solia na yagodra mate na mataivalu ni Filisitia vei ira na manumanuvuka ni lomalagi kei na manumanu kila ni vanua, mera kila kina na tamata kece e vuravura ni tiko na Kalou e Isireli.+
47 Mera kila o ira kece na tiko qo* ni sega ni veivakabulai+ o Jiova ena iseleiwau se na moto, ni nei Jiova na ivalu,+ ena soli kemuni kece ina liga i keimami.”+
48 E toso voleka yani na kai Filisitia me tavaki Tevita, ia e cici yani vakatotolo o Tevita ina bucanivalu me rau sota kei na kai Filisitia.
49 E tatara o Tevita ina nona kato, e taura mai kina e dua na vatu qai rabotaka. E lauta na yadrena na kai Filisitia, e coba vinaka sara ga na vatu e yadrena qai lutu vakatoboicu ina qele.+
50 E mani vakadruka na kai Filisitia o Tevita ena irabo kei na dua na vatu. E mokuta qai vakamatea na kai Filisitia o Tevita, ia e sega e ligana na iseleiwau.+
51 E cici tiko ga o Tevita lai duri sara e yasana. E qai taura na nona iseleiwau na kai Filisitia,+ e ucuna mai na kena itawatawa qai vakamatea ni tamusuka na domona. Nira raica na kai Filisitia ni sa mate na nodra qaqa, era dro.+
52 Era tucake mera kaila na Isireli kei ira na Juta ra qai cicimuri ira na kai Filisitia mai na buca+ me yacova na matamata e Ekironi,+ era balemate ga na kai Filisitia ena gaunisala mai Sareimi+ me yaco sara i Kaca kei Ekironi.
53 Oti era lesu na Isireli ena nodra cicimuri ira vakavoleka na kai Filisitia, ra qai kovea na nodra keba.
54 E taura o Tevita na uluna na kai Filisitia qai kauta i Jerusalemi, ia e biuta na nona iyaragi na kai Filisitia ena nona valelaca.+
55 Ia ni raici Tevita ga o Saula ni lai tavaka na kai Filisitia, e kaya sara vei Apineri+ na iliuliu ni mataivalu: “Apineri, na luvei cei na gone qo?”+ E kaya o Apineri: “Me vaka ni oni bula dina tiko na tui, au sega ni kila!”
56 E kaya na tui: “Mo vaqaqa se luvei cei na gonetagane qo.”
57 Ni lesu ga mai o Tevita ni vakamatea oti na kai Filisitia, e kauti koya sara o Apineri vei Saula ni taura tiko e ligana na uluna na kai Filisitia.+
58 E tukuna vua o Saula: “O cei na tamamu, cauravou?” e sauma o Tevita: “O yau na luvena na nomuni dauveiqaravi o Jese+ na turaga ni Peceliema.”+
iVakamacala e ra
^ Se “moto mamada.”
^ Ipe., “sucu.”
^ Oya me kua ni saumi ivakacavacava se veiqaravi.
^ Se “galegalena.” Ipe., “kumina.”
^ Se “waimaca.”
^ Se “kei na moto kei na moto mamada.”
^ Qo na mataivalu vakalomalagi.
^ Ipe., “ivavakoso kece qo.”
