iMatai ni Samuela 18:1-30
18 Ni vosa oti ga o Tevita vei Saula, erau duavata sara o Jonacani+ kei Tevita me rau veitokani voleka,* e lomani Tevita sara o Jonacani me vaka ga nona lomani koya.+
2 Me tekivu mai na siga oya e kauti Tevita o Saula, e sega ni soli koya me lesu ina vale i tamana.+
3 E veiyalayalati sara o Jonacani kei Tevita,+ ni lomani Tevita me vaka ga na nona lomani koya.+
4 E luvata o Jonacani na nona isulu balavu tabaleka e dara tiko qai solia vei Tevita, vaka kina na nona iyaya, na nona iseleiwau, na nona dakaititi, kei na nona beleti.
5 E lako yani o Tevita ena vanua kece e talai koya kina o Saula qai rawa vinaka na nona sasaga.*+ E lesi koya sara o Saula me liutaki ira na tamataivalu,+ e vinaka qo vei ira kece na tamata kei ira na dauveiqaravi i Saula.
6 Ni lesu mai o Tevita kei na so tale nira vakadrukai ira oti na kai Filisitia, era dau lako yani na yalewa mai na koro kece e Isireli mera lagasere,+ mera meke, nira tavaki Tui Saula, era qiria na tibereli+ kei na iyaya ni ivakatagi e tolu na kena wa ena levu ni nodra marau.
7 Era dau lagata na yalewa era marau tiko:
“E vakamatea o Saula e vica na udolu,Ia o Tevita e oba vakaoba.”+
8 E cudru vakalevu o Saula,+ e ca sara ga vua na sere qo, e kaya: “Era cavuta vei Tevita e oba vakaoba, ia vei au era cavuta e vica na udolu. Sa vo ga me soli vua na veiliutaki vakatui!”+
9 Tekivu mai na siga oya e dau raici Tevita vakatani o Saula.
10 Ena siga tarava e curumi Saula na yalo ca mai vua na Kalou,+ e tekivu duatani mai na nona ivalavala* ena lomanivale ni qiria tiko na api+ o Tevita me vaka e liu. E taura e ligana o Saula na moto+
11 qai cokataka na moto,+ e kaya lo tiko: ‘Au na cokai Tevita i lalaga!’ Ia e drovaki koya vakarua o Tevita.
12 E rerevaki Tevita o Saula ni tokoni koya o Jiova,+ ia sa biuti Saula.+
13 E mani talai Tevita yani o Saula, e lesi koya me nodra turaga na duanaudolu, e dau liutaka na mataivalu o Tevita ena ivalu.+
14 E rawa vinaka tiko ga na sasaga nei Tevita+ ena ka kece e cakava, e tokoni koya tale ga o Jiova.+
15 Ni raica o Saula ni rawa vinaka sara na sasaga nei Tevita, e rerevaki koya.
16 Ia era lomani Tevita kece na Isireli kei ira na Juta ni dau liutaki ira o koya ena nodra sasaga.
17 Oti e kaya vei Tevita o Saula: “Qo na luvequ yalewa ulumatua o Merapi.+ Au na soli koya me watimu.+ Ia mo vakaraitaka tiko ga vei au ni o tagane yaloqaqa, mo vala ena ivalu i Jiova.”+ E kaya lo o Saula: ‘Me kua mada ga ni tarai koya na ligaqu. Me tarai koya ga na ligadra na kai Filisitia.’+
18 E kaya vei Saula o Tevita: “O cei o yau, o cei o ira na wekaqu, na vuvale i tamaqu e Isireli meu vugona na tui?”+
19 Ena gauna me soli kina vei Tevita o Merapi na luvei Saula, sa soli oti tu o koya vei Atirieli+ na kai Meola me watina.
20 Ia e domoni Tevita o Maikali+ na luvena yalewa o Saula mani tukuni vei Saula, e taleitaka qori o koya.
21 E kaya sara o Saula: “Au na soli koya vua me coriti koya, me tarai koya na ligadra na kai Filisitia.”+ E qai kaya vei Tevita o Saula ena ikarua ni gauna: “O na bukia vei au na isema ni vakawati* nikua.”
22 E vakaroti ira tale ga na nona dauveiqaravi o Saula: “Dou tukuna lo vei Tevita: ‘Raica! E taleitaki iko na tui, era taleitaki iko tale ga na nona dauveiqaravi kece. Mo bukia mada na isema ni vakawati vua na tui.’”
23 Nira tukuna vei Tevita na vosa qo na dauveiqaravi i Saula, e kaya o Tevita: “Dou nanuma ni ka wale vei kemudou meu bukia na isema ni vakawati vua na tui, niu tamata dravudravua au qai tamata wale?”+
24 Era qai tukutuku vei Saula na nona dauveiqaravi: “Qo na ka e tukuna o Tevita.”
25 E kaya sara o Saula: “Qo na ka mo dou tukuna vei Tevita, ‘E sega ni vinakata na tui na isau ni yalewavou,+ e vinakata ga e 100 na kuliniyagodra vakatagane+ na kai Filisitia me totogitaki ira kina na kena meca na tui.’” Ni veretaki Tevita o Saula mera vakamatei koya na kai Filisitia.
26 Era lai tukuna sara vei Tevita na vosa qo na nona dauveiqaravi, e taleitaka gona o Tevita me bukia na isema ni vakawati vua na tui.+ Ni bera na gauna yalataki,
27 e lako sara o Tevita kei ira na nona tamata mera lai mokuta e 200 na kai Filisitia, e kauta sara mai o Tevita na iwiliwili taucoko ni kuliniyagodra vakatagane vua na tui me bukia kina na isema ni vakawati vua na tui. E qai solia vua o Saula na luvena yalewa o Maikali me watina.+
28 E kila o Saula ni tiko vata kei Tevita o Jiova,+ e domoni koya tale ga o Maikali na luvena.+
29 Sa qai rerevaki Tevita ga vakalevu o Saula ena ka qo, e meca tiko ga i Tevita o Saula ena vo ni nona bula.+
30 Era dau lako yani na turaga ni Filisitia ina ivalu, ia ena gauna kece era lai vala kina e rawa vinaka sara na sasaga i Tevita vei ira kece na dauveiqaravi nei Saula,+ e rogo vakalevu kina na yacana.+
iVakamacala e ra
^ Se “kabiti Tevita o Jonacani.”
^ Se “lewa maqosa.”
^ Se “vaka na parofita na nona ivalavala.”
^ Se “vugoqu.”
