iMatai ni Samuela 22:1-23
22 E biubiu sara mai kea+ o Tevita me dro ina qara e Etulama.+ Ni ratou rogoca na tuakana kei na vuvale taucoko nei tamana, eratou lako sobu vua.
2 Era soqoni yani vua o ira kece era vakasaurarataki, o ira na dinau tu, kei ira na rarawa voli, e nodra iliuliu o koya. E rauta ni le 400 era tiko vata kei koya.
3 Oti e biubiu mai kea o Tevita me lako i Misipe e Moapi, e tukuna vei tui Moapi:+ “Yalovinaka me tiko mada vei kemuni na tamaqu kei na tinaqu, meu kila mada na ka ena cakava vei au na Kalou.”
4 E biuti rau sara vei tui Moapi, erau tiko vata kei koya ena gauna kece e tiko kina o Tevita ena idrodro.+
5 E qai kaya vei Tevita na parofita o Kata:+ “Mo kua ni tiko ga ena idrodro. Mo biubiu mai keri, mo lako ina vanua o Juta.”+ E mani biubiu o Tevita me lako ina veikau mai Ereci.
6 E rogoca o Saula ni sa kune o Tevita kei ira na tomani koya. E dabe tiko o Saula ena ruku ni vunitamarisi* ena dua na vanua cecere e Kipea,+ e taura tiko na nona moto, era tu volekati koya na nona dauveiqaravi.
7 E qai tukuna o Saula vei ira na nona dauveiqaravi era tu volekati koya: “Moni vakarorogo mada na Penijamini. Vakacava, ena solia tale ga vei kemuni kece na luvei Jese+ na were kei na loganivaini? Ena lesi kemuni kece moni turaga ni vica vata na udolu, moni turaga ni vica vata na drau?+
8 Oni veretaki au kece! E sega ni dua e tukuna vei au ni veiyalayalati na luvequ kei na luvei Jese!+ E sega ni dua vei kemuni e lomani au me tukuna vei au ni uqeta na noqu dauveiqaravi o luvequ me nakicataki au, me vaka e yaco tiko qo.”
9 E mani kaya+ o Toeki+ na kai Itomi e tiko e kea, e liutaki ira na dauveiqaravi i Saula: “Au raica na luvei Jese ni lako mai Nopi vei Eimeleki na luvei Etupi.+
10 E tarogi Jiova ena vukuna qai solia vua na ivaqa. E solia mada ga vua na iseleiwau i Koliaci na kai Filisitia.”+
11 E talatala sara na tui me kacivi mai o Eimeleki na luvei Etupi na bete kei ira kece na bete ena vuvale i tamana era tiko mai Nopi. Era mani lako kece vua na tui.
12 E kaya sara o Saula: “Mo vakarorogo mada o iko na luvei Etupi!” e kaya lesu yani: “O yau qo, noqu turaga.”
13 E kaya vua o Saula: “Na cava drau veretaki au kina, o iko kei na luvei Jese, ni o solia vua na madrai kei na dua na iseleiwau, o taroga tale ga na Kalou ena vukuna? E saqati au qai toka vuni me waraki au me vaka e yaco tiko qo.”
14 E kaya sara o Eimeleki vua na tui: “O cei vei ira kece na nomuni dauveiqaravi e nuitaki* me vakataki Tevita?+ E vugona na tui,+ e nodra iliuliu na nomuni matayadra qai rokovi ena nomuni vale.+
15 Vakacava, qo ga na imatai ni gauna au taroga kina na Kalou ena vukuna?+ E dredre meu cakava na ka oni tukuna tiko qori! Me kua sara ni beitaka na tui na nona dauveiqaravi kei na vuvale taucoko i tamaqu, ni sega ni kila na nomuni dauveiqaravi e dua na ka me baleta na ka qo.”+
16 Ia e kaya na tui: “O na mate sara ga+ Eimeleki, o iko kei na vuvale kece i tamamu.”+
17 E qai kaya na tui vei ira na yadra* era toka volekati koya: “Moni vuki moni vakamatei ira na bete i Jiova nira tokoni Tevita! Era kila ni dro tiko ra qai sega ni tukuna vei au!” Ia era sega ni via dodoka na ligadra na dauveiqaravi ni tui mera mokuti ira na bete i Jiova.
18 E qai kaya na tui vei Toeki:+ “Vuki mo mokuti ira na bete!” Sega ni bera ni vuki o Toeki na kai Itomi+ me mokuti ira na bete. E vakamatea ena siga oya e 85 na tagane era tokara tiko na efoti lineni.+
19 E ravuti Nopi+ tale ga na nodra koro na bete ena iseleiwau, e vakamatei ira na tagane kei na yalewa, na gone kei na gonedramidrami, na bulumakau, na asa, kei na sipi ena iseleiwau.
20 Ia e dro me muri Tevita e dua na luvei Eimeleki, na luvei Etupi, na yacana o Epaiaca.+
21 E kaya vei Tevita o Epaiaca: “E vakamatei ira na bete i Jiova o Saula.”
22 E kaya sara o Tevita vei Epaiaca: “Au kila ena siga oya,+ ni a tiko e kea o Toeki na kai Itomi ni na tukuna dina vei Saula. Sa baleti au sara ga na nodra mate o ira kece ena vuvale i tamamu.
23 Me daru tiko vata ga. Kua ni rere, ni o koya e vaqarai iko e vaqarai au, au na taqomaki iko.”+
iVakamacala e ra
^ Dua na vunikau drokadroka drau lalai, e piqi se vulavula na sena.
^ Se “yalodina.”
^ Ipe., “daucici.”
