iMatai ni Samuela 25:1-44
25 Sa dede toka qai mate o Samuela,+ era soqo vata yani na Isireli kece mera lolositaki koya, era buluti koya ena nona vale e Rama.+ Oti e tucake o Tevita me lako sobu ina vanua talasiga e Perana.
2 E dua na turaga ni Maone+ e cakacaka tiko e Kameli.*+ E turaga vutuniyau sara, e 3,000 na nona sipi, e 1,000 na nona me, ena gauna oya e kotiva tiko na nona sipi e Kameli.
3 Na yaca ni turaga qo o Nepali,+ na yaca i watina o Apikali.+ E yalewa yalomatua o koya, e matavinaka, ia e dau voravora qai ca na itovo nei tagane,+ e kawa nei Kelepi.+
4 E rogoca o Tevita mai veikau ni kotiva tiko o Nepali na nona sipi.
5 E mani tala vua o Tevita e tini na cauravou, e tukuna o Tevita vei ratou na cauravou: “Dou lako cake i Kameli, ni dou yaco vei Nepali dou taroga se vakacava tiko, ni dou cavuta na yacaqu.
6 Dou qai tukuna, ‘Mo bula balavu mada ga, mo vakacegu, mera vakacegu na lewe ni nomu vuvale, me vinaka tale ga na ka kece e nomu.
7 Au rogoca ni o kotiva tiko na sipi. Nira tiko vata kei keimami na nomu ivakatawanisipi keimami sega ni vakacacani ira,+ e sega ni dua na ka e yali vei ira ena gauna kece era tiko kina e Kameli.
8 Tarogi ira na nomu cauravou era na tukuna vei iko. Mera nanumi mada ga e matamu na noqu cauravou, ni keimami lako mai ena gauna ni marau.* Yalovinaka, solia vei ira na nomu dauveiqaravi kei na luvemu o Tevita na ka ga e tu vei iko.’”+
9 Eratou lako sara na cauravou nei Tevita vei Nepali, eratou tukuna vua na ka kece qo ena yaca i Tevita. Ni ratou vosa oti,
10 e kaya o Nepali vei ratou na tamata i Tevita: “O cei o Tevita, o cei na luvei Jese? Ena gauna qo, levu na dauveiqaravi era biuta na nodra turaga.+
11 Vakacava, meu kauta na kequ madrai, na mequ wai, kei na lewe ni manumanu au vakamatea me kedra na noqu daukotisipi, meu solia vei ira na tamata au sega sara ga ni kila na vanua era lako mai kina?”
12 Oti eratou lesu na cauravou i Tevita, eratou lai tukuna vua na vosa kece qo.
13 E kaya sara o Tevita vei ira na nona tamata: “Ni dui vauca na nomuni iseleiwau!”+ Era vauca kece na nodra iseleiwau, e vauca tale ga o Tevita na nona iseleiwau, era lako cake vata kei Tevita e rauta ni 400 na tamata, e le 200 era tiko ga kei na iyaya.
14 Ia e tukutuku e dua na dauveiqaravi vei Apikali na wati Nepali: “Raica! E talai ira mai nona italai o Tevita ena veikau mera tauca na vosa ni vakanuinui vinaka vua na noda turaga, e qai vosataki ira+ o koya.
15 Era caka vinaka vei keimami na tagane qori. Era sega ni vakacacani keimami, e sega ni dua na ka e yali vei keimami ni keimami tiko vata kei ira ena were.+
16 Era vaka ga na neimami bai e taqomaki keimami ena bogi kei na siga, ena gauna kece keimami tiko vata kina kei ira ni keimami vakatawa tiko na qelenisipi.
17 Ia qo mo lewa mada na ka mo cakava, ni sa nakiti na ka ca vua na noda turaga kei ira kece na nona vuvale,+ ni dreve na vosa vua ni rui tamata tawayaga.”*+
18 E vakatotolo sara o Apikali,+ e taura e 200 na ibuli madrai, e rua na saqa waini lelevu, e lima na sipi vakarautaki, e lima na ivakarau sia* na covuata tavu, e 100 na ibuli vuanivaini rabaraba, kei na 200 na ibuli lolo rabaraba qai vakavodoka kece ena asa.+
19 E kaya sara vei ira na nona dauveiqaravi: “Dou liu yani, au na muri kemudou.” Ia e sega ni tukuna e dua na ka vei Nepali na watina.
20 Ni vodo tiko o koya ena asa me lako sobu ena ruku ni ulunivanua, sa lako sobu tiko yani vua o Tevita kei ira na nona tamata qai sotavi ira o koya.
21 Ia e kaya tiko o Tevita: “Sega sara ga na betena niu vakatawana na ka kece e nona na tamata qo ena veikau. E sega ni yali e dua na ka e nona,+ ia e sauma na noqu caka vinaka ena ka ca.+
22 Me vakayacora mada ga na Kalou me kuria tale ga vei ira na meca i Tevita* keu vakabula e dua na nona tagane* me yacova na mataka.”
23 Ni raici Tevita ga o Apikali e sobu sara vakatotolo mai na asa me tekicuva ena mata i Tevita, e cuva ena qele.
24 E cuva o koya ena yava i Tevita, e kaya: “Kemuni na noqu turaga, meu beitaki ga o yau, me vosa mada vei kemuni na nomuni yalewa dauveiqaravi, moni rogoca na ka e tukuna na nomuni yalewa dauveiqaravi.
25 Yalovinaka, me kua ni kauaitaka na noqu turaga na tamata tawayaga qo o Nepali,+ ni vaka ga na ibalebale ni yacana. Na yacana o Nepali,* e yalowai. Ia o yau na nomuni yalewa dauveiqaravi, au a sega ni raici ira na nona cauravou na noqu turaga oni tala mai.
26 Ia qo noqu turaga me vaka ni bula tiko o Jiova, oni bula tale tiko ga, o Jiova ga e tarovi kemuni+ moni kua ni vakadavedra,+ moni kua ni sauma na ca* e ligamuni. Me yacovi ira mada ga na meca kei ira era via vakamavoataka na noqu turaga na ka e yacovi Nepali.
27 Me soli vei ira na cauravou era muria tiko na noqu turaga na iloloma*+ e kauta tiko mai qo na nomuni yalewa dauveiqaravi vua na noqu turaga.+
28 Moni vosota mada na nona cala na nomuni yalewa dauveiqaravi, ni na vakataudeitaka sara ga o Jiova na vale ni noqu turaga,+ ni vala tiko na noqu turaga ena ivalu i Jiova,+ e sega ni laurai vei kemuni na ca ena gauna kece oni bula tiko kina.+
29 Ni tucake e dua me cicimuri kemuni me vakamatei kemuni, ena ologi vinaka na bula ni noqu turaga ena kato ni bula i Jiova na nomuni Kalou, ia na nodra bula na kemuni meca ena rabotaka o koya me vaka na vatu ena irabo.*
30 Ni vakayacora o Jiova vua na noqu turaga na ka vinaka kece e yalataka, e lesi kemuni moni liutaki Isireli,+
31 ena sega ni veivutuni se rarawa na lomamuni ni oni vakadavedra vakaveitalia, moni sauma na ca e ligamuni noqu turaga.+ Ni caka vinaka o Jiova vua na noqu turaga, moni nanuma na nomuni yalewa dauveiqaravi.”
32 E kaya sara vei Apikali o Tevita: “Me vakacaucautaki mada ga o Jiova na Kalou ni Isireli, ni talai iko mai nikua mo tavaki au!
33 Me vakavinavinakataki na nomu yalomatua! Mo vakalougatataki mada ga ni o tarovi au meu kua ni vakadavedra+ ena siga qo, meu kua ni sauma na ca e ligaqu.
34 Ia me vaka ni bula tiko o Jiova na Kalou ni Isireli, o koya e tarova na ligaqu meu kua ni vakaleqai iko+ ke o sega ni vakatotolo mai mo tavaki au,+ ena sega ni dua na tagane e vo vei Nepali me yacova na mataka.”+
35 E taura sara mai ligana o Tevita na ka e kauta yani, e tukuna vua: “Mo lako cake ena vakacegu ina nomu vale. Raica, au sa rogoci iko, au na vakadonuya na nomu kerekere.”
36 Oti e lesu tale o Apikali vei Nepali, e kana magiti tiko o koya ena nona vale me vaka na tui, e marau tiko o Nepali* qai mateni levu tu. E sega ni tukuna vua o Apikali e dua na ka me kida mada na mataka.
37 Ena mataka ni sa bula vinaka o Nepali, e tukuna sara vua o watina na ka kece qo. E vaka ga na tamata mate na utona* qai davo vakadua me vaka na vatu.
38 Ni oti e rauta ni tini na siga, e qai mokuti Nepali o Jiova mani mate.
39 Ni rogoca o Tevita ni sa mate o Nepali, e kaya: “Me vakacaucautaki o Jiova ni cudruvaka+ nona vosabeci au o Nepali,+ e tarova na nona dauveiqaravi me kua ni cakava na ka ca+ qai sauma ga e ulu i Nepali o Jiova na nona caka ca!” E qai talatala o Tevita me vosaki o Apikali me tauri koya me watina.
40 Eratou mani lako na tamata nei Tevita vei Apikali i Kameli, eratou kaya vua: “E talai keitou mai o Tevita me keitou kauti iko mo watina.”
41 Sega ni bera ni tucake qai tekicuva ina qele, e kaya: “Qo na nomuni yalewa dauveiqaravi, me savata na yavadra+ na nona dauveiqaravi na noqu turaga.”
42 E tucake totolo sara o Apikali+ me vodoka nona asa, eratou taubale tiko yani e muri e lima nona yalewa dauveiqaravi, e tomani ira na italai nei Tevita, e qai wati Tevita.
43 E vakawatitaki Einoami+ tale ga mai Jesirieli+ o Tevita, erau mai watina+ ruarua na yalewa qo.
44 Ia o Saula e soli luvena yalewa o Maikali+ na wati Tevita vei Paliti+ na luvei Leisi mai Kalimi.
iVakamacala e ra
^ Dua na koro e Juta, sega ni o Ulu i Kameli.
^ Ipe., “siga vinaka.”
^ Se “macawa.”
^ Se rawa ni, “vei Tevita.”
^ Ipe., “dua e suasua e lalaga.” Na ivosavosa vakaIperiu ni veibeci me baleti ira na tagane.
^ Kena ibalebale “Yalowai, Lialia.”
^ Se “veivakabulai.”
^ Ipe., “na veivakalougatataki.”
^ Se “loma ni irabo.”
^ Ipe., “loma i Nepali.”
^ Se “lomana.”
