iMatai ni Samuela 29:1-11
-
Ra sega ni nuitaki Tevita na kai Filisitia (1-11)
29 Era soqona kece na nodra mataivalu na kai Filisitia+ e Efeki, nira keba tiko na Isireli volekata na mataniwai mai Jesirieli.+
2 Era lako yani na nodra turaga na kai Filisitia kei na nodra vica vata na drau kei na vica vata na udolu, e muri tiko yani o Tevita kei ira na nona tamata, vaka kina o Akisi.+
3 Ia era kaya na nodra turaga na kai Filisitia: “Na cava era cakava tiko eke na Iperiu qo?” E kaya o Akisi vei ira na nodra turaga na kai Filisitia: “Qo o Tevita na tamata nei Tui Saula e Isireli, keirau tiko vata me dua na yabaki se sivia.+ Au sega ni raica vua e dua na ka ca ena siga e dro mai kina vei au me yacova nikua.”
4 Era qai cudruvi koya na nodra turaga na kai Filisitia, era tukuna vua: “Mo vakasuka na tamata.+ Mo tukuna vua me lako ina vanua o lesi koya kina. Me kua ni lako vata kei keimami ena ivalu, me kua ni vorati keimami ena gauna ni vala.+ Na cava me kauta me vakayalovinakataki kina na nona turaga, na uludra na noda tamata?
5 Sega ni o Tevita ga qo era lagata nira meke, era kaya:
‘E vakamatea o Saula e vica na udolu,Ia o Tevita e oba vakaoba’?”+
6 E kacivi Tevita sara o Akisi,+ e kaya vua: “Me vaka ni bula dina tiko o Jiova, o tamata yalododonu, au vinakata mo lako ina ivalu kei na noqu mataivalu,+ niu sega ni raica vei iko e dua na ka ca ena siga o lako mai kina vei au me yacova nikua.+ Ia era sega ni nuitaki iko na turaga.+
7 Mo lesu mada ena vakacegu, mo kua ni cakava e dua na ka me vakararawataki ira na turaga ni Filisitia.”
8 E kaya vei Akisi o Tevita: “Baleta, na cava au cakava? Na cala cava o raica vua na nomuni tamata ena siga au lako mai kina me yacova nikua? Na cava meu kua ni tomani kemuni kina meu valuti ira na kena meca na noqu turaga na tui?”
9 E kaya o Akisi vei Tevita: “Au kila ni o vinaka sara me vaka ga e dua na agilosi ni Kalou.+ Ia era kaya na turaga ni Filisitia, ‘Me kua ni tomani keda o koya ena ivalu.’
10 Ia mo sou ena mataka kei ira na dauveiqaravi ni nomu turaga oni lako vata mai, dou yadra vakamataka, dou biubiu sara ni sa rarama.”
11 E sou sara vakamataka o Tevita kei ira na nona tamata mera lesu ina nodra vanua na kai Filisitia, ia era lako cake na kai Filisitia i Jesirieli.+
