iMatai ni Samuela 7:1-17
7 Era mani lako mai na lewe i Kiriaci-jiarimi ra qai kauta cake na Kato i Jiova ina vale i Epinatapi+ e delana, era vakatabui Eliesa na luvena me yadrava na Kato i Jiova.
2 E dede sara na gauna e tiko kina na Kato e Kiriaci-jiarimi, e 20 taucoko na yabaki me tekivu mai na siga e kau yani kina, era vaqarai* Jiova sara na vuvale kece ni Isireli.+
3 E qai kaya o Samuela vei ira taucoko na vuvale ni Isireli: “Ke oni lesu vei Jiova mai vu ni lomamuni,+ moni biuta laivi na kalou tani+ e tiko vei kemuni kei na ivakatakarakara nei Asetoreci,+ me gole vakatabakidua na lomamuni vei Jiova moni qaravi koya duadua ga,+ ena qai vakabulai kemuni mai na ligadra na kai Filisitia.”+
4 Era biuta tani sara na Isireli na kedra ivakatakarakara na Peali kei Asetoreci mera qaravi Jiova duadua ga.+
5 E mani kaya o Samuela: “Moni kumuni ira vata mai na Isireli taucoko e Misipa,+ au na masulaki kemuni vei Jiova.”+
6 Era kumuni vata e Misipa, era taki wai mera sova ena mata i Jiova, ra qai lolo ena siga oya.+ Era kaya ena vanua oya: “Keimami valavala ca vei Jiova.”+ E veiqaravi tiko e Misipa o Samuela me nodra turaganilewa+ na Isireli.
7 Nira rogoca na kai Filisitia nira sa kumuni vata na Isireli e Misipa, era lako cake sara na nodra turaga na kai Filisitia+ mera valuti ira. Nira rogoca qo na Isireli, era rerevaki ira na kai Filisitia.
8 Era kaya sara na Isireli vei Samuela: “Moni kua ni cegu na tagici Jiova na noda Kalou me vukei keda,+ me vakabulai keda mai na ligadra na kai Filisitia.”
9 E kauta sara o Samuela e dua na lami se sucu tiko vei tinana me cabora me isoro kama taucoko+ vei Jiova, e kere veivuke vei Jiova o Samuela ena vukudra na Isireli qai rogoci koya o Jiova.+
10 Ni cabora tiko na isoro kama o Samuela era toso voleka tiko yani na kai Filisitia mera valuti Isireli. E vakavuna o Jiova me vadugu levu na kurukuru+ ena siga oya vei ira na kai Filisitia, e vakasesei+ ira o koya, ra qai druka e matadra na Isireli.+
11 Era mani biuti Misipa na Isireli mera cemuri ira na kai Filisitia, era qai mokuti ira me yaco sara ena ceva kei Pecikari.
12 E taura sara o Samuela e dua na vatu+ qai biuta ena tadrua kei Misipa kei Jisana, e vakatoka me o Epenisa,* e kaya: “E vukei keda o Jiova me yacova mai qo.”+
13 Era mani vakamalumalumutaki na kai Filisitia, era sega ni lako tale ena nodra vanua na Isireli,+ e vorati ira tiko ga na kai Filisitia na liga i Jiova ena gauna kece i Samuela.+
14 Na koro tale ga era taura na kai Filisitia vei ira na Isireli e vakasukai tale vei ira na Isireli me tekivu mai Ekironi me yaco i Kaca, era taura tale na Isireli na nodra vanua mai na ligadra na kai Filisitia.
Era veisaututaki tale ga na Isireli kei ira na Amoraiti.+
15 E lewai ira tiko ga na Isireli o Samuela ena gauna kece ni nona bula.+
16 E veiyabaki e lako wavoki o koya i Peceli,+ i Kilikali,+ kei Misipa,+ e lewai ira na Isireli ena vanua taucoko qori.
17 Ia e dau lesu i Rama+ ni tiko e kea na nona vale, e lewai ira tale ga e kea na Isireli. E tara e kea e dua na icabocabonisoro vei Jiova.+
