iMatai ni Samuela 9:1-27
-
Rau sota o Samuela kei Saula (1-27)
9 E dua na turaga vei ira na Penijamini na yacana o Kisi+ na luvei Epieli, na luvei Sirori, na luvei Pikoraci, na luvei Efia na Penijamini,+ e turaga vutuniyau sara.
2 E dua tiko na luvena tagane na yacana o Saula,+ e cauravou matavinaka, e sega tale ni dua na tagane vei ira na Isireli e matavinaka me vakataki koya, e balavu sara vei ira kece na tamata mai tabana i uluna.
3 Ni yali na asa* nei Kisi na tamai Saula, e kaya o Kisi vei Saula na luvena: “Yalovinaka lako vata kei na dua na dauveiqaravi, mo drau vaqara na asa.”
4 Erau lakosivita na veiulunivanua e Ifireimi kei na vanua o Salisa, erau sega ni kunea. Erau lakova na vanua o Salimi, e yali e kea na asa. Erau lakova na nodra vanua taucoko na Penijamini, erau sega ni kunea.
5 Erau yaco sara ina vanua o Sufi, e kaya o Saula vua na nona dauveiqaravi e tomani koya tiko: “Lako mai me daru lesu, de leqataki kedaru o tamaqu qai sega ni leqataka na asa.”+
6 Ia e kaya na dauveiqaravi: “Raica, e tiko ena koro qo e dua na tamata ni Kalou, e turaga dokai. E dau yaco dina na ka kece e tukuna.+ Me daru lako kina. De tukuna vei kedaru na sala me daru muria.”
7 E kaya sara o Saula vua na nona dauveiqaravi: “Ke daru lako, na cava me daru kauta vua? E sega na madrai ena nodaru kato, e sega ni dua na iloloma me daru kauta vua na tamata ni Kalou dina. Na cava e tu vei kedaru?”
8 E tukuna tale vei Saula na dauveiqaravi: “Raica! E tiko e ligaqu e dua na iwase* ni sikeli* siliva. Au na solia qori vua na tamata ni Kalou dina, ena tukuna vei kedaru o koya na sala me daru muria.”
9 (Ena gauna e liu e Isireli, qo na ka e dau tukuna na tamata e lai qara na Kalou: “Lako mai meda lai raica na dauraivotu.”+ Na parofita ena gauna qo e vakatokai me dauraivotu ena gauna e liu.)
10 E kaya o Saula vua na nona dauveiqaravi: “Donu na ka o tukuna. Daru lako.” Rau lako sara ina koro e tiko kina na tamata ni Kalou dina.
11 Ni rau lako cake tiko ena icabecabe ina koro, rau sotava eso na goneyalewa era lai taki wai. Erau tarogi ira sara: “E tiko eke na dauraivotu?”+
12 Era sauma: “E tiko eke. Raica, e tiko e liu vei kemudrau. Drau totolo ni na lako mai nikua ina koro, nira na vakacaboisoro+ nikua na lewenivanua ena vanua cecere.+
13 Ni drau yaco ga ina koro drau na raici koya ni bera ni lako cake ina vanua cecere me kana. Era na sega ni kana na lewenivanua me yaco mada yani, ni o koya ga ena vakavinavinakataka na isoro. Oti oya mera kana o ira na sureti. Drau lako cake ga qo, drau na raici koya.”
14 Erau lako cake sara ina koro. Ni rau yaco ina lomanikoro, sa lako tiko mai o Samuela me tavaki rau ni lako cake ina vanua cecere.
15 Ni vo e dua na siga me lako mai o Saula, e tukuna vei Samuela o Jiova:
16 “Rauta na gauna vata qo nimataka, au na tala yani vei iko e dua na tamata mai na nodra vanua na Penijamini.+ Mo lumuti koya me liutaki ira na noqu tamata na Isireli,+ ena vakabulai ira na noqu tamata mai na ligadra na kai Filisitia. Niu sa raica na nodra rarawa na noqu tamata, sa yaco mai vei au na nodra tagi.”+
17 Ni raici Saula o Samuela, e kaya vua o Jiova: “Qo na tamata au a tukuna vei iko, ‘O koya qo ena lewai ira na noqu tamata.’”+
18 E torovi Samuela o Saula ena loma ni matamata, e kaya: “Tukuna mada vei au, i vei na nona vale na dauraivotu?”
19 E kaya vei Saula o Samuela: “O yau na dauraivotu. Mo liutaki au yani ina vanua cecere, drau na kana vata kei au nikua.+ Au na talaci iko ena mataka, au na qai tukuna vei iko na ka kece o via kila.*
20 Kua ni leqataka na asa e yali ena tolu na siga sa oti,+ ni sa kune. O cei e nona na ka talei kece qo e Isireli? Vakacava e nomu kei na vuvale taucoko i tamamu?”+
21 E kaya o Saula: “O yau e dua na Penijamini ena yavusa lailai e Isireli,+ e sega tale ga ni kilai na noqu vuvale ena yavusa o Penijamini. Na cava oni tukuna kina qori vei au?”
22 E qai kauti Saula kei na nona dauveiqaravi o Samuela ina valenikana, e biuti rau ena tikina dokai vei ira na sureti, e rauta nira le 30.
23 E kaya o Samuela vua na dauvakasaqa: “Kauta mai na iwasewase au a solia vei iko, au qai kaya vei iko, ‘Maroroya tiko.’”
24 E mani taura cake na dauvakasaqa na yava ni manumanu kei na ka e toka kina me biuta e mata i Saula. E kaya sara o Samuela: “Na ka e maroroi tu sa biu e matamu. Mo kania, nira maroroya tu me kemu ena siga qo. Niu kaya vei ira, ‘Au sureta eso na vulagi.’” E kana sara o Saula kei Samuela ena siga oya.
25 Oti eratou biuta na vanua cecere+ me ratou lako sobu ina koro, e vosa tiko ga vei Saula o Samuela ena delanivale.
26 Erau yadra sara vakamataka, ni kida ga na mataka e qai kacivi Saula o Samuela ena delanivale, e kaya: “Mo vakarau meu talaci iko.” E vakarau o Saula rau qai lako yani i tuba kei Samuela.
27 Ni ratou siro sobu tiko ina ibili ni koro, e kaya sara vei Saula o Samuela: “Tukuna vua na dauveiqaravi+ me liu vei kedaru,” mani liu o koya. “Ia o iko mo tu vakadua, meu vakarogoya vei iko na vosa ni Kalou.”
