iMatai ni iVola Vei Timoci 1:1-20
1 O yau o Paula na yapositolo i Karisito Jisu ena lewa ni Kalou na noda iVakabula kei Karisito Jisu na noda inuinui,+
2 vei Timoci,*+ na luvequ dina+ ena vakabauta:
Me tiko mada ga vei iko na loloma soli wale, na yalololoma, kei na vakacegu ni Kalou na Tamada, kei Karisito Jisu na noda Turaga.
3 Me vaka ga noqu uqeti iko mo tiko ga e Efeso niu vakarau lako i Masitonia, au uqeti iko tale qo, mo vakaroti ira eso mera kua ni vakavuvulitaka e duatani tale na ivakavuvuli,
4 mera kua tale ga ni vakarogoca na italanoa lasu+ kei na tuvakawa e sega ni dua na vanua e tini kina, ni vakaoti gauna wale ga+ qai vakavulomatarotaro, e sega ni veivosakitaki kina e dua na ka e baleti koya na Kalou me vaqaqacotaka na vakabauta.
5 Na inaki sara ga ni ivakaro qo me savasava kina na noda loloma,+ me vinaka na noda lewaeloma, me kua ni veivakaisini na noda vakabauta.+
6 Eso era gole tani mai na veika qo, era lai tini kina ena veivosaki tawayaga.+
7 Dua na ka na nodra via qasenivuli+ ni lawa, ia era sega mada ga ni kila na ka era vakatukuna tiko se na ile era valataka voli.
8 Eda kila ni vinaka na Lawa ke muri vakavinaka,*
9 ni a sega ni buli na lawa me baleta na tamata yalododonu, me baleti ira ga na daucaka ca+ ra qai murilomadra, o ira na sega ni doka na Kalou kei ira na ivalavala ca, o ira na sega ni yalodina,* o ira na vakacacana na ka tabu, o ira na labata na tamadra kei tinadra, ira na dauveivakamatei,
10 o ira na dau veiyacovi tawadodonu,* o ira na veimoceri vakatagane, o ira na dau butako tamata, o ira na dau lasu, o ira na dau bubului lasu, kei na ka kece e veisaqasaqa kei na ivakavuvuli dina+
11 e yavutaki ena itukutuku vinaka lagilagi ni Kalou mamarau au vakacolati kina.+
12 Au vakavinavinaka vei Karisito Jisu na noda Turaga, o koya e vakaukauataki au, ni okati au meu yalodina ni lesi au ena cakacaka vakaitalatala,+
13 e dina niu dau vosabeca na Kalou, au dau veivakacacani, au qai dau veibeci.+ Ia au lomani baleta niu a lecaika, au vakayacora na ka kece qori niu a se sega ni vakabauta.
14 Ia e qai sobuti au vakalevu na loloma soli wale ni noda Turaga, vaka kina na vakabauta kei na loloma i Karisito Jisu.
15 E nuitaki na itukutuku qo qai dodonu me ciqomi vakalevu: Oya ni lako mai vuravura o Karisito Jisu me vakabulai ira na ivalavala ca.+ Au torosobu duadua vei ira qori.+
16 Ia au a lomani me vakaraitaka kina vei au o Karisito Jisu na levu ni nona vosovoso, meu ivakaraitaki vei ira na vakabauti koya mera bula tawamudu.+
17 Ia vua na Tui ni veitabagauna,+ o koya e sega ni rusa rawa,+ e tawarairai,+ e Kalou duadua ga,+ me dokai me vakalagilagi mada ga me tawamudu. Emeni.
18 Na ivakaro qo au tataunaka vei iko, Timoci na luvequ, me salavata kei na parofisai me baleti iko, mo vala kina ena ivalu vinaka,+
19 mo tudei ena vakabauta kei na lewaeloma vinaka,+ na ka era biuta eso mani voca kina nodra vakabauta.
20 Erau va qori o Imeneo+ kei Alekisada, au sa soli rau vei Setani+ me rau vakavulici kina me rau kua ni beca na Kalou.
iVakamacala e ra
^ Kena ibalebale “Koya e rokova na Kalou.”
^ Kir., “vakalawa.”
^ Se “sega ni dei nodra loloma.”
^ Raica na iVakamacala ni Vosa.
