iMatai ni iVola Vei Timoci 5:1-25
5 Kua ni vakalewa vakaca e dua e sa kenaturaga.+ Ia vakamasuti koya ga me vaka e tamamu, vei ira na cauravou me vaka era tacimu,
2 vei ira na kenamarama me vaka era tinamu, vakamasuti ira na goneyalewa me vaka era ganemu ena yalo e savasava sara.
3 Dau nanumi* ira na yada era yada dina.*+
4 Ia ke dua na yada e vakaluveni se vakamakubuni, mera vakaraitaka mada o ira qo na nodra qarava na Kalou ena nodra dui vuvale,+ mera sauma tale ga na nodra dinau vei ira na nodra itubutubu kei ira na tukadra kei na budra,+ qo e dodonu ena mata ni Kalou.+
5 Me baleti koya e yada dina qai dravudravua sara, e sa na vakanuinui tu ga vua na Kalou,+ qai masu tiko ga kei na cikecike ena bogi kei na siga.+
6 Ia o koya e dau vakaceguya ga na nona gagadre ca vakayago e sa okati me mate, e dina ni se bula tiko.
7 O koya gona, mo vakasalataki ira tiko ga ena ka qo, mera kua kina ni beitaki ena dua na ka.
8 Qo na ka dina, ke dua e sega ni qaravi ira na kainona, vakabibi o ira na lewe ni nona vuvale, e sa cakitaka na vakabauta, ena ca sara o koya, e vinaka cake e dua e sega ni vakabauta.+
9 Me volai na yaca ni yada e yabaki 60 lako cake, a dua ga na watina,
10 e kilai ena nona dau caka vinaka,+ ke dauveisusu vinaka,+ ke dau vakacegui ira na vulagi,+ ke dau vuya na yavadra na yalosavasava,+ ke dau vakacegui ira na rarawa,+ ke dau vakaogai koya ena cakacaka yaga kece.
11 Ena yasana adua, me kua ni volai na yacadra na yada gone, ni gauna ena gole tani kina na lomadra vei Karisito ena vuku ni gagadre ni veiyacovi, era na via vakawati.
12 Era na qai lewai nira sa sega ni dina ena nodra vakabauta e liu.*
13 Ena gauna vata qori, era vakamatauna na bula ni vakasavuliga, era veilakoyaki ina veivale, era sega ni vakasavuliga wale ga, era dau kakase tale ga, ra qai siova na ka e sega ni nodra,+ era talanoataka na ka e sega ni dodonu mera talanoataka.
14 O koya gona, au vinakata mera vakawati na yada gone,+ mera vakaluveni,+ mera qarava nodra vuvale, me kua ni solia vua na dauveitusaqati e dua na gauna me veivakalewai kina.
15 Eso mada ga vei ira era sa gole tani mera muri Setani.
16 Ke dua na yalewa vakabauta e yada na wekana, me qarava sara, me kua ni vakaicolacolataki na ivavakoso. Me rawa ni qaravi ira ga na yada dina*+ na ivavakoso.
17 Mera rokovi vakalevu+ na qase era qarava vinaka na nodra itavi,+ vakabibi o ira na gumatua ena nodra tukuna kei na nodra vakavulica na vosa ni Kalou.+
18 Ni kaya na iVolatabu, “Mo kua ni tabonaka na gusu ni bulumakau ena gauna e butu covuata tiko kina,”+ e kaya tale ga, “E dodonu me saumi na tamata dau cakacaka.”+
19 Kua ni vakabauta na ka e beitaki kina e dua na qase, vakavo ke rua se tolu na kena ivakadinadina.+
20 Vunauci+ ira na valavala ca tiko ga+ e matadra kece, mera rere kina na kena vo.
21 Au vakaroti iko ena mata ni Kalou, ena mata i Karisito Jisu, kei na matadra na agilosi digitaki, mo muria tiko ga na ka kece qo ena nomu dau vakadeuci ira vinaka ni bera ni o vakatulewa, mo kua ni veitovaki.+
22 Mo kua sara ni vakatotolotaka nona tabaki e dua e ligamu,+ mo kua ni okati ena nodra ivalavala ca eso tale, me savasava tiko ga na nomu itovo.
23 Kua ni gunu wai tale tiko, gunuva vakalailai na waini ena vuku ni ketemu kei na mate e dau tauvi iko.
24 E dau laurai e matanalevu na nodra ivalavala ca eso, qo era na lewai sara ga kina, ia na nodra ivalavala ca eso tale e dau qai laurai malua.+
25 Ena laurai tale ga e matanalevu na cakacaka vinaka,+ na kena mada ga e tabogo ena sega ni vunitaki tiko ga.+
iVakamacala e ra
^ Kir., “Rokovi.”
^ Se “yada era gadreva dina na veivuke,” oya ni sega ni dua me vukei ira.
^ Se “nodra inaki taumada.”
^ Se “yada era gadreva dina na veivuke,” oya ni sega ni dua me vukei ira.
