iMatai ni Tui 10:1-29
10 E rogoca na ranadi ni Sipa na itukutuku me baleti Solomoni ena vuku ni yaca i Jiova,+ e mani lako yani me vakatovolei koya ena taro dredre.*+
2 E yaco yani e Jerusalemi kei na dua na matailakolako levu,+ kei na kameli e kauta tiko na waiwai vakaisaluaki,+ e levu na koula kei na vatutalei. E lako sara o koya vei Solomoni me tukuna vua na ka kece e tu e lomana.
3 E sauma kece o Solomoni na nona taro. E sega sara ni dredre* vua na tui me vakamacalataka vua e dua na ka.
4 Ni raica na ranadi ni Sipa na vuku kece i Solomoni,+ na vale e tara,+
5 na kakana ena nona teveli,+ na nodra idabedabe na nona dauveiqaravi, na nodra cakacaka na nona dauveiqaravi ena teveli kei na nodra isulu, o ira na kauta na mena, kei na nona isoro kama e cabora wasoma ena vale i Jiova, e vakamalumalumutaki* koya sara ga.
6 E mani tukuna vua na tui: “E dina na ka au rogoca ena noqu vanua ena ka oni rawata* kei na nomuni vuku.
7 Ia au sega ni vakabauta na itukutuku, niu mai raica e mataqu dina au sa qai vakabauta. Raica! E lailai ga na ka e tukuni vei au. Oni sa rui vuku, oni rawati kemuni ni vakatauvatani kei na itukutuku au rogoca.
8 Era marau na nomuni tamata, era marau tale ga na nomuni dauveiqaravi era tu e matamuni ena veisiga mera rogoca na nomuni vuku!+
9 Me vakacaucautaki mada ga o Jiova na nomuni Kalou,+ o koya e taleitaki kemuni qai vakatikori kemuni ena idabedabe vakaturaga e Isireli. Ni lomani ira tiko ga na Isireli o Jiova e lesi kemuni moni tui, moni lewa vakadodonu, moni cakadodonu.”
10 E qai solia o koya vua na tui e 120 na taledi* koula, e levu sara na waiwai vakaisaluaki+ kei na vatutalei.+ E sega tale na waiwai vakaisaluaki e kau mai me tautauvata na kena levu a solia na ranadi ni Sipa vei Tui Solomoni.
11 E usana mai na koula mai Oferi+ eso na waqa nei Airami, era kauta tale ga mai Oferi e levu sara na kau yasi+ kei na vatutalei.+
12 Sa qai cakava na tui ena kau yasi na duru lalai ni vale i Jiova kei na valenitui, na api kei na ivakatagi vakawa me nodra na daulagasere.+ E sega ni kau tale yani na kau yasi va qo se me laurai me yacova mai na siga qo.
13 E solia tale ga o Tui Solomoni vua na ranadi ni Sipa na ka kece e taleitaka se kerea, me ikuri ni ka e solia vua ena nona lomasoli.* Oti qori e biubiu sara o koya me lesu ina nona vanua kei ira na nona dauveiqaravi.+
14 Na bibi ni koula e dau kau vei Solomoni ena dua na yabaki e 666 na taledi koula,+
15 e sega ni wili na kena era solia na dauveivoli, na tubu era rawata na dauvolivolitaki, o ira na tui kece e Arapea, kei ira na kovana ni vanua.
16 E cakava o Tui Solomoni e 200 na isasabai lelevu ena koula+ veiwaki (e 600 na sikeli* na koula ena dua na isasabai)+
17 kei na 300 na isasabai lalai* ena koula veiwaki (e tolu na mina* na koula ena dua na isasabai lailai). Sa qai biuta na tui ena Vale ni Veikau ni Lepanoni.+
18 E cakava tale ga na tui e dua na idabedabe levu vakaturaga+ ena tabua qai botana ena koula savasava.+
19 E ono na ikabakaba ina idabedabe vakaturaga, e mokimokiti na ulu ni idabedabe vakaturaga, e vakaitavatavaniliga na yasa ruarua ni idabedabe, e duri volekata na itavatavaniliga e rua na laione.+
20 E 12 na laione e duri tu ena ono na ikabakaba qori, e yadua ena mua ni ono na ikabakaba. E sega ni dua tale na matanitu e cakava qo.
21 E koula kece na bilo ni gunu nei Tui Solomoni, e koula dina na iyaya kece ni Vale ni Veikau ni Lepanoni.+ E sega ni dua na ka e caka ena siliva, ni ka wale sara na siliva ena gauna i Solomoni.+
22 E tu e wasawasa eso na nona waqa ni Tasisi na tui+ kei na so na waqa nei Airami. Vakadua ena tolu na yabaki era dau kauta mai na waqa ni Tasisi na koula, na siliva, na tabua,+ na maqe, kei na pikoki.
23 E uasivi ira kece na tui e vuravura o Solomoni ena iyau+ kei na vuku.+
24 Era via raici Solomoni na lewe i vuravura kece mera rogoca na nona vuku e biuta i lomana na Kalou.+
25 Era dui kauta yani na nodra iloloma e veiyabaki, na iyaya siliva, na iyaya koula, na isulu, na iyaragi, na waiwai vakaisaluaki, na ose kei na meule.
26 E kumuna tiko ga o Solomoni e levu na qiqinivalu kei na ose,* e 1,400 na qiqinivalu kei na 12,000 na ose,*+ e biuti ira tiko ga ena koro ni qiqinivalu me volekata na tui e Jerusalemi.+
27 E cakava vakalevu na tui na siliva e Jerusalemi me vaka na vatu, e levu na kau sitari me vaka na vunilolo ena Sefila.+
28 E voli mai Ijipita na ose nei Solomoni, era volia na dauveivoli ni tui na qeleniose* ena dua ga na isau.+
29 E 600 na tikinisiliva na isau ni dua na qiqinivalu e voli mai Ijipita, na isau ni dua na ose e 150, era qai volitaka vei ira kece na nodra tui na Itaiti+ kei ira na tui Siria.
iVakamacala e ra
^ Se “vatavatairalago.”
^ Ipe., “sega ni dua na ka e vuni vua.”
^ Ipe., “yali nona lomadei.”
^ Se “tukuna.”
^ Ipe., “me vaka na liga i Tui Solomoni.”
^ Qo na isasabai lalai era dau kauta na dauvanataka na dakaititi.
^ Dua na mina ena iVolatabu vakaIperiu e tautauvata kei na 570 na karamu (18.35 na onisi). Raica na iKuri B14.
^ Se “dauvodo ose.”
^ Se “dauvodo ose.”
^ Se rawa ni, “mai Ijipita kei Kue, era volia na ose na nona dauveivoli na tui mai Kue,” de dusi Silisia.
