iMatai ni Tui 13:1-34
13 E vosa o Jiova vua e dua na tamata ni Kalou+ me biuti Juta me lako i Peceli, ni duri tiko o Jerepoami ena yasa ni icabocabonisoro+ me cabora na isoro kubou.
2 E qai kacivaka ina icabocabonisoro na vosa i Jiova, e kaya: “iCabocabonisoro, icabocabonisoro! Qo na ka e kaya o Jiova: ‘Raica! Ena sucu e dua na gonetagane ena vuvale i Tevita, na yacana o Josaia!+ Ena cabori ira e delamu na bete ni vanua cecere era cabora tiko na isoro kubou e delamu, ena vakama e delamu na suidra na tamata.’”+
3 E tukuna e dua na ivakatakilakila ena siga oya, e kaya: “Qo na ivakatakilakila e tukuna o Jiova: Raica! Ena kavida na icabocabonisoro, ena tasova na dravusa* e toka e delana.”
4 Ni rogoca ga na tui na vosa e kacivaka na tamata ni Kalou dina ina icabocabonisoro e Peceli, e dodoka na ligana o Jerepoami mai na icabocabonisoro qai kaya: “Ni vesuki koya!”+ E mate sara na ligana e dodoka yani vua, e sega ni lokia rawa tale.+
5 E qai kavida na icabocabonisoro, e tasova na dravusa mai na icabocabonisoro me vaka na ivakatakilakila a tukuna o Jiova vua na tamata ni Kalou dina.
6 E kaya na tui vua na tamata ni Kalou dina: “Yalovinaka, mo vakamasuti Jiova na nomu Kalou, mo masulaki au me vinaka kina na ligaqu.”+ E vakamasuti Jiova sara na tamata ni Kalou dina, mani vinaka tale na ligana na tui me vaka e liu.
7 E kaya sara na tui vua na tamata ni Kalou dina: “Me daru lako vata i vale mo lai kana, meu solia vei iko e dua na iloloma.”
8 Ia e tukuna na tamata ni Kalou dina vua na tui: “Ke oni solia mada ga vei au e veimama na nomuni vale, au na sega ga ni lako vata kei kemuni meu kana madrai se gunu wai ena vanua qo.
9 Qori na ka e vakaroti au kina na vosa i Jiova: ‘Mo kua ni kana madrai se gunu wai, mo kua tale ga ni lesu ena sala o muria mai.’”
10 E mani lako ena dua tale na sala, e sega ni lesu ena sala e muria ni lako i Peceli.
11 E tiko e Peceli e dua na parofita qase, eratou lai tukuna vua na luvena tagane na ka kece e cakava ena siga oya e Peceli na tamata ni Kalou dina kei na ka e tukuna vua na tui. Ni ratou talanoataka oti vei tamadratou,
12 e tarogi ratou o tamadratou: “E muri i vei o koya?” Eratou mani vakaraitaka vua na sala e muria na tamata ni Kalou dina e lako mai Juta.
13 E kaya vei ratou na luvena tagane: “Dou vakarautaka vei au na idabedabe ni asa.” Eratou vakarautaka sara na idabedabe ni asa, sa qai vodo kina o koya.
14 E muria yani na tamata ni Kalou dina qai raici koya ni dabe tiko ena ruku ni vunikau levu. E mani kaya vua: “O iko na tamata ni Kalou dina o lako mai Juta?”+ E sauma o koya: “O yau qo.”
15 E kaya vua: “Me daru lako i vale mo lai kana madrai.”
16 Ia e kaya o koya: “Au na sega ni rawa ni lesu vata kei iko seu vakadonuya na nomu veisureti, seu kana madrai se gunu wai vata kei iko ena vanua qo.
17 Ni tukuni vei au ena vosa i Jiova, ‘Mo kua ni kana madrai se gunu wai e kea. Mo kua tale ga ni lesu ena sala o muria mai.’”
18 E qai tukuna vua: “O yau tale ga e dua na parofita me vakataki iko, e qai tukuna vei au e dua na agilosi na vosa i Jiova, ‘Mo drau lesu vata ina nomu vale me rawa ni kana madrai me gunu wai tale ga.’” (E lawakitaki koya.)
19 E mani lesu vata kei koya me kana madrai, me gunu wai ena nona vale.
20 Ni rau se dabe tiko ena teveli, e vosa o Jiova vua na parofita e kauti koya lesu mai,
21 e qai kacivaka vua na tamata ni Kalou dina e lako mai Juta, e kaya, “Qo na ka e tukuna o Jiova: ‘Ni o beca na ivakaro i Jiova o qai sega ni muria na nona ivakaro e tukuna vei iko o Jiova na nomu Kalou,
22 ni o lesu mo kana madrai mo gunu wai ena vanua e tukuni vei iko, “Mo kua ni kana madrai se gunu wai,” ena sega ni bulu na yagomu ena nodra ibulubulu na nomu qase.’”+
23 Ni kana madrai qai gunu oti na tamata ni Kalou dina, e vakarautaka sara na parofita qase na idabedabe ni asa me vodo kina na parofita a kauta mai.
24 E lako sara yani o koya mani donuya e dua na laione e gaunisala qai vakamatei koya.+ E tu ga e gaunisala na yagona, e duri toka e yasana na asa, e duri tale toka ga ena yasa ni yago mate na laione.
25 Era tasivi eso na tamata era mani raica ni tu e gaunisala na yago mate qai duri toka na laione e yasana. Era lako yani era lai tukuna ina koro e tiko kina na parofita qase.
26 Ni rogoca qori na parofita a kauti koya lesu mai, e kaya sara: “Qo ga na tamata ni Kalou dina e beca na ivakaro i Jiova,+ e soli koya gona o Jiova vua na laione me vakamavoataki koya qai vakamatei koya, me vaka na vosa i Jiova e tukuna vua.”+
27 E kaya sara vei ratou na luvena tagane: “Dou vakarautaka vei au na idabedabe ni asa.” Eratou vakarautaka sara na idabedabe.
28 E lako yani e raica sara ni davo tu e gaunisala na yago mate, e duri tu e yasana na asa kei na laione. E sega ni kania na yago mate na laione se vakamavoataka na asa.
29 E qai laveta na parofita na yagona na tamata ni Kalou dina, e biuta ena asa qai kauti koya lesu ina nona koro me tagicaki koya me buluti koya.
30 E mani vakadavora na yagona ena nona ibulubulu, era tagicaki koya tiko ga: “Oilei na taciqu!”
31 Ni buluti koya oti e tukuna sara vei ratou na luvena tagane: “Niu sa mate, mo dou buluti au ena vanua e bulu kina na tamata ni Kalou dina. Dou biuta na suiqu ena yasa ni suina.+
32 Ena yaco dina na vosa i Jiova e kacivaka o koya ina icabocabonisoro e Peceli kei na vale kece ni sokalou e tiko ena vanua cecere+ ena koro kece e Samaria.”+
33 Oti qori e sega ni veisautaka o Jerepoami na nona ivakarau ca, e lesi ira tiko ga na tamata+ mera bete ni vanua cecere. O koya ga e vinakata, e bulia sara me bete, e kaya: “Me bete ni vanua cecere o koya qo.”+
34 Na nodra ivalavala ca qo na vuvale i Jerepoami+ era vakarusai ra qai vakawabokotaki kina mai na dela i vuravura.+
iVakamacala e ra
^ Se “dravusa uro,” oya na dravusa e veiwaki kei na uro ni isoro.
