iMatai ni Tui 19:1-21
19 E tukuna sara o Eapi+ vei Jesepeli+ na ka kece e cakava o Ilaija, ni vakamatei ira na parofita kece ena iseleiwau.+
2 E mani tala e dua na italai o Jesepeli vei Ilaija, e kaya: “Mera cakava mada ga vei au na kalou mera kuria tale ga, keu sega ni cakava vei iko ena gauna vata qo nimataka me vaka e caka vei ira!”
3 Dua na ka nona rere, e tucake sara me dro.+ E yaco i Pieri-sepa,+ na vanua vakaJuta,+ e biuti nona dauveiqaravi e kea.
4 E lako sara o koya ina vanua talasiga ena dua na siga taucoko, e lai dabe sara ena ruku ni dua na vuninokonoko, e mani kerea me mate. E kaya: “Sa rauti au! Kemuni Jiova, moni kauta tani na noqu bula,+ niu sega ni uasivi ira na tukaqu.”
5 E qai davo e ruku ni vuninokonoko mani mocelutu. Ia e tarai koya vakasauri e dua na agilosi,+ e kaya vua: “Duri mo kana.”+
6 Ni rai yani, e toka volekata na uluna e dua na ibuli madrai mokimokiti e tavu ena vatu katakata kei na dua na saqa wai. E kana o koya, e gunu qai davo tale.
7 E lesu mai ena ikarua ni gauna na agilosi i Jiova, e tarai koya qai kaya: “Duri mo kana, ni rui balavu na nomu ilakolako.”
8 E mani duri me kana me gunu, e tauri koya tiko na kaukaua ni kakana qori me 40 na siga kei na 40 na bogi me yaco yani i Orepi, na ulunivanua ni Kalou dina.+
9 E curu ena dua na qaravatu+ e kea me moce kina ena bogi, ia raica! e vosa vua o Jiova, e kaya: “Na cava o cakava tiko eke Ilaija?”
10 E kaya o koya: “Dua na ka noqu yalogu ena vuku i Jiova na Kalou ni lewe vuqa,*+ nira biuta na Isireli na nomuni veiyalayalati,+ era vakarusa na nomuni icabocabonisoro, era vakamatea na nomuni parofita ena iseleiwau,+ au sa qai vo ga o yau. Ia qo era via vakamatei au.”+
11 E kaya o koya: “Mo curu i tuba, lai duri ena ulunivanua ena mata i Jiova.” Raica! E lako yani o Jiova,+ e sea na ulunivanua na cagi levu qai kaukaua, e voroka na vatu ena mata i Jiova,+ ia e sega ni tiko o Jiova ena cagi. Oti na cagi e qai uneune,+ ia e sega ni tiko o Jiova ena uneune.
12 Oti na uneune e qai dua na bukawaqa,+ ia e sega ni tiko o Jiova ena bukawaqa. Oti na bukawaqa e rogo mai e dua na domo malumu, e rogo lailai.+
13 Ni rogoca ga qori o Ilaija, e ubia sara na matana ena nona isulu ni parofita,+ e lako yani me duri ena gusu ni qara. E tarogi koya e dua na domo: “Na cava o cakava tiko eke Ilaija?”
14 E kaya o koya: “Dua na ka noqu yalogu ena vuku i Jiova na Kalou ni lewe vuqa, nira biuta na Isireli na nomuni veiyalayalati,+ era vakarusa na nomuni icabocabonisoro, era vakamatea na nomuni parofita ena iseleiwau, au sa qai vo ga o yau. Ia qo era via vakamatei au.”+
15 E kaya vua o Jiova: “Mo lesu, mo lako ina vanua talasiga e Tamasiko. Ni o yaco yani mo lumuti Eseli+ me tui Siria.
16 Mo lumuti Jeu+ na makubui Nimesai me tui Isireli, mo lumuti Ilaisa* tale ga na luvei Safati mai Epeli-meola me parofita me sosomitaki iko.+
17 O koya e drovaka na iseleiwau nei Eseli+ ena vakamatea o Jeu,+ o koya e drovaka na iseleiwau nei Jeu ena vakamatea o Ilaisa.+
18 Au se vakavoca tiko e 7,000 e Isireli,+ era sega ni tekiduru kece vei Peali+ qai sega ni reguci koya na gusudra.”+
19 E mani biuta mai na vanua oya o Ilaija qai raici Ilaisa na luvei Safati ni siviyara tiko ena 12 na bulumakau tagane era vakaisa era liu tiko vua, e tiko o koya ena kena ika12 ni isa bulumakau. E lako yani vua o Ilaija qai biuta vua na nona isulu ni parofita.+
20 E biuta na bulumakau tagane o Ilaisa qai cicimuri Ilaija, e kaya: “Meu lai reguci tamaqu mada kei tinaqu. Au na qai muri iko.” E kaya vua: “Mo lako mo lesu, na cava meu tarovi iko kina?”
21 E mani lesu o koya, e kauta e rua na bulumakau tagane me vakacabora, e vakayagataka na iyaya ni siviyara me vakasaqara na lewe ni bulumakau qai solia vei ira na tamata mera kania. Oti qori e tucake o koya me muri Ilaija, me qaravi koya.+
