iMatai ni Tui 20:1-43
20 E soqoni ira kece na nona mataivalu o Tui Penietati+ e Siria+ kei na 32 tale na tui, na nodra ose kei na qiqinivalu, e lako cake o koya me viribaiti+ Samaria+ qai valuta.
2 E tala eso na italai vei Tui Eapi+ e Isireli ena koro. E kaya sara vua: “Qo na ka e tukuna o Penietati,
3 ‘E noqu na nomu siliva kei na nomu koula, o ira na watimu kei ira na luvemu matavinaka.’”
4 E kaya sara na tui Isireli: “Me vaka na nomuni vosa na noqu turaga na tui, au sa nomuni kei na ka kece au taukena.”+
5 Oti era lesu mai na italai, era kaya: “Qo na ka e tukuna o Penietati, ‘Au talatala yani vei iko: “O na solia vei au na nomu siliva, na nomu koula, o ira na watimu kei ira na luvemu.”
6 Ia ena gauna vata qo nimataka au na talai ira yani vei iko na noqu dauveiqaravi, era na vaqaqara vinaka ena nomu vale kei na nodra vale na nomu dauveiqaravi, era na taura na ka kece e talei vei iko mera kauta.’”
7 E kacivi ira kece na qase ni vanua na tui Isireli, e kaya: “Moni kila mada, moni raica ni vakatubuca tiko na tamata qo, e vakarota mera kau yani vua na watiqu, na luvequ, na noqu siliva kei na noqu koula, au sega ni bureitaka vua.”
8 Era qai kaya vua na qase kece kei ira kece na tamata: “Moni kua ni muria, moni kua ni vakadonuya.”
9 E mani kaya vei ira na italai nei Penietati: “Dou tukuna vua na noqu turaga na tui, ‘Na ka kece oni talatala mai kina e liu au na cakava, ia na kena qo au na sega ni cakava rawa.’” Eratou lako sara na italai me ratou tukutuku tale vua.
10 E vakauta vua o Penietati na itukutuku qo: “Mera cakava mada ga vei au na kalou mera kuria tale ga ke levu na kuvuniqele e Samaria meu solia e dua na iluku vei ira yadua na tamata era muri au!”
11 E qai kaya na tui Isireli: “Dou tukuna vua, ‘O koya e vakaiyaragi me kua ni sakitaki koya me vakataki koya e luvata tani.’”+
12 Ni rogoca ga na vosa qori o Penietati, ni gunu vata tiko kei ira na tui ena nona valelaca,* e kaya vei ira na nona dauveiqaravi: “Moni vakarau vala!” Era vakarau sara mera valuta na koro.
13 Ia e torovi Tui Eapi e Isireli e dua na parofita+ qai kaya: “Qo na ka e tukuna o Jiova, ‘O sa raici ira na ilala levu kece qo? Au na soli ira e ligamu nikua, o na qai kila ni o yau o Jiova.’”+
14 E taroga o Eapi: “O cei o na vakayagataka?” e kaya o koya: “Qo na ka e tukuna o Jiova, ‘O ira na dauveiqaravi ni iliuliu ni yasana.’” E qai taroga: “O cei ena tekivuna na ivalu?” e kaya o koya: “O iko!”
15 E wilika sara o Eapi na nodra dauveiqaravi na iliuliu ni yasana, era le 232, oti qai wiliki ira na Isireli taucoko, era le 7,000.
16 Era biubiu ena sigalevu tutu ni gunu qai mateni tiko o Penietati ena valelaca,* kei ira na 32 na tui era tokoni koya.
17 Nira liu yani na nodra dauveiqaravi na iliuliu ni yasana, e tala sara eso na italai o Penietati. Era tukuna vua: “Era lako mai Samaria eso na tagane.”
18 E kaya sara o koya: “Ke ra lako mai mera veisaututaki moni vakabulai ira, ke ra lako mai mera vala moni vakabulai ira tale ga.”
19 Ia nira biuta mai na koro, oya na nodra dauveiqaravi na iliuliu ni yasana kei na mataivalu e muri ira tiko yani,
20 era dui mokuta na tamata e donui ira. Era dro na kai Siria+ ra qai cicimuri ira o ira na Isireli, ia e dro o Tui Penietati e Siria ena dua na ose kei na so na dauvodo ose.
21 E lako yani na tui Isireli qai mokuti ira tiko ga na ose kei na qiqinivalu, e vakadrukai ira vakaca na kai Siria.
22 Oti e lako yani na parofita+ vei tui Isireli, e kaya vua: “Moni lai vakaukauataki kemuni, moni vakasamataka na ka moni cakava,+ ni na lako cake mai me valuti kemuni na tui Siria ena itekivu ni yabaki mai qo.”*+
23 Era kaya vei tui Siria na nona dauveiqaravi: “Na nodra Kalou e Kalou ni veiulunivanua. Qori na vuna era qaqa kina vei keda. Ia ke da valuti ira ena vanua tautauvata, eda na qaqa vei ira.
24 Moni cakava tale ga qo: Moni kauti ira tani na tui kece+ mai na nodra itutu, moni biuti ira na kovana mera sosomitaki ira.
25 Moni soqona* e dua na mataivalu me tautauvata kei na mataivalu era yali, me va tale ga qori na ose kei na qiqinivalu. Meda valuti ira ena vanua tautauvata, eda na qaqa sara ga vei ira.” E mani rogoca o koya na nodra ivakasala qai muria.
26 Ena itekivu ni yabaki,* e soqoni ira na kai Siria o Penietati ra qai lako cake i Efeki+ mera valuti ira na Isireli.
27 Era soqoni vata tale ga na Isireli, e soli na kedra, era lako sara yani mera vakasota. Era keba toka na Isireli e matadra me vaka e rua na qelenime lalai, ia era robota na vanua na kai Siria.+
28 E qai lako yani na tamata ni Kalou dina vua na tui Isireli, e kaya: “Qo na ka e tukuna o Jiova, ‘Nira kaya na kai Siria: “O Jiova e Kalou ni veiulunivanua, e sega ni Kalou ni vanua bucabuca,” au na soli ira kece na ilala levu qo e ligamu,+ oni na qai kila ni o yau ga o Jiova.’”+
29 Era keba veibasai tiko ga me vitu na siga, era qai tekivu veiraravui ena ikavitu ni siga. Ena dua ga na siga, era mokuta na Isireli e 100,000 na sotia ni Siria era taubale.
30 Era dro na kena vo i Efeki,+ ena lomanikoro. E qai lutuka na bai e 27,000 na tamata era vo tiko. E dro tale ga o Penietati mani yaco ina koro, qai vuni toka ena loma ni dua na rumu.
31 Era kaya vua na nona dauveiqaravi: “Raica, keimami rogoca nira tui yalovinaka* na tui ena vuvale e Isireli. Meda dara mada e toloda na isulutaga, meda vesuka na wa e uluda da qai lako yani vua na tui Isireli. De dua ena vakabulai kemuni.”+
32 Era dara sara na isulutaga e tolodra, era vesuka e uludra na wa, ra qai lako yani vua na tui Isireli, era kaya: “E tukuna mai na nomuni dauveiqaravi o Penietati, ‘Au kerea meu bula.’” E mani kaya o koya: “Se bula tiko? E taciqu o koya.”
33 Era nanuma na tagane qori ni ivakatakilakila vinaka qo, e totolo ga nira vakabauta na nona vosa, era kaya: “E tacimuni o Penietati.” E kaya o koya: “Dou lai kauti koya mai.” E qai lako yani vua o Penietati, e kaya sara o koya me vodo ena qiqinivalu.
34 E kaya vua o Penietati: “Au na vakasuka kece na koro e taura mai o tamaqu vei tamamu, o na cakava eso na nomu makete* e Tamasiko me vaka ga e cakava o tamaqu e Samaria.”
E kaya o Eapi: “Ena vuku ni veiyalayalati qo au na sereki iko mo lako.”
Erau mani veiyalayalati qai tukuna vua me lako.
35 E kaya sara e dua na luvedra na parofita*+ vua na nona itokani, ena vosa i Jiova: “Mo mokuti au mada.” Ia e bese ni mokuti koya na tamata.
36 E qai kaya vua: “Ni o sega ni vakarorogo ina vosa i Jiova, ni o biuti au ga ena vakamatei iko e dua na laione.” Ni biubiu ga, e raici koya e dua na laione qai vakamatei koya.
37 E raica tale o koya e dua na tamata, e kaya: “Mo mokuti au mada.” E mokuti koya na tamata oya qai vakamavoataki koya.
38 E qai lako na parofita me waraka na tui e gaunisala, e vakalecaleca ni vadreti tu na matana.
39 Ni lako mai na tui, e kacivaka o koya vua na tui: “E lako na nomuni dauveiqaravi ena vanua e katakata kina na veiraravui qai biubiu mai e dua na tamata e kauta tiko mai e dua tale, e kaya, ‘Mo yadrava tiko na tamata qo. Ke yali, na nomu bula ena sosomitaka na nona bula,+ ke sega o na sauma e dua na taledi* siliva.’
40 Ni ogaoga tiko eke na nomuni dauveiqaravi vaka kina e kea, e yali vakasauri na tamata oya.” E kaya vua na tui Isireli: “O na lewai kina, ni nomu vakatulewa qori.”
41 E luvata sara o koya na ivadreti mai matana qai kilai koya na tui Isireli ni dua na parofita.+
42 E kaya vua na parofita: “Qo na ka e tukuna o Jiova, ‘Ni o sereka mai ligamu na tamata au tukuna me vakamatei,+ na nomu bula ena sosomitaka na nona bula,+ era na sosomitaka na nona tamata o ira na nomu tamata.’”+
43 E mani gole i vale i Samaria na tui Isireli+ ena yalobibi kei na rarawa.
iVakamacala e ra
^ Se “valetabanikau.”
^ Se “valetabanikau.”
^ Se “vulaitubutubu tarava.”
^ Ipe., “wilika.”
^ Oya ena vulaitubutubu.
^ Se “ni dei na nodra loloma na tui.”
^ Se “digia na gaunisala.”
^ Na “luvedra na parofita” e rairai dusia e dua na koronivuli era vakavulici kina na parofita, se dua na nodra isoqosoqo na parofita.
