iMatai ni Tui 6:1-38
6 Ena ika480 ni yabaki ni nodra lako tani mai na vanua o Ijipita+ na Isireli,* ena ikava ni yabaki ni nona veiliutaki vakatui e Isireli o Solomoni, ena vula o Sifi*+ (oya na ikarua ni vula), sa qai tara o koya na vale nei Jiova.*+
2 Na vale e tara o Tui Solomoni me nei Jiova e 60 na kiupiti* na kena balavu, e 20 na kiupiti na kena raba, e 30 na kiupiti na kena cere.+
3 Na varada+ ena mata ni valenisoro e 20 na kiupiti na kena balavu,* me tautauvata kei na raba ni vale.* E tini na kiupiti na kena raba ena matanivale.
4 E cakava o koya na katubaleka ni vale me duidui na kedra raba e loma vaka kina e tuba.+
5 E tara tale ga e dua na vale ena lalaga ni vale me wavokita na lalaga ni vale, oya na valenisoro* kei na rumu sara e loma,+ qai tara wavoki na rumu e sau.+
6 Na tabavale sara e ra ni rumu e sau e lima na kiupiti na kena raba, na tabavale e loma e ono na kiupiti na kena raba, kei na ikatolu ni tabavale e vitu na kiupiti na kena raba, e cakava eso na vata me wavokita na vale, me kua ni dua na ka e sema ena lalaga ni vale.+
7 E tara na vale ena vatu sa ta oti+ me kua ni rogo e lomanivale na ituki se na matau se na iyaya kaukamea ena gauna e tara tiko kina.
8 E tiko ena yasa imatau* ni vale+ na katuba ni tabavale sara e ra ni rumu e sau, ni cabeti na ikabakaba cowiri ena yacovi na tabavale e loma, mai na tabavale e loma ina kena ikatolu.
9 E tara tiko ga o koya na vale me vakaotia,+ e ubia na vale ena icoka sitari kei na iyatu papa sitari.+
10 E tara na rumu e sau ena yasanivale taucoko,+ e lima na kiupiti na kedra cere qai sema ina vale ena kau sitari.
11 E qai vosa vei Solomoni o Jiova, e kaya:
12 “Ena vuku ni vale o tara tiko qo, ke o muria na noqu lawa, mo vakayacora na noqu lewa, mo talairawarawa tiko ga ina noqu ivakaro kece,+ au na vakayacora tale ga na noqu vosa ni yalayala me baleti iko au tukuna vei Tevita na tamamu,+
13 au na tiko ena kedra maliwa na Isireli,+ au na sega ni biuti ira na noqu tamata na Isireli.”+
14 E tara tiko ga na vale o Solomoni me vakaotia.
15 E tara na lalaga ni vale e loma ena papa sitari. E ubia na lalaga e loma ena kau, mai na fuloa ni vale ina isa qai ubia na fuloa ni vale ena papa junipa.+
16 E tara na yasanivale e muri ena papa sitari me 20 na kiupiti, mai na fuloa ina isa, qai tara e loma* na rumu sara e loma,+ na Loqi Tabu Sara.+
17 Ia na valenisoro,*+ oya na yasanivale e donuya, e 40 na kiupiti.
18 Na sitari e lomanivale e ceuti ena vuanivago+ kei na senikau seraki.+ E sitari taucoko, e sega ni laurai e dua na vatu.
19 E vakarautaka o koya na rumu sara e loma+ ena lomanivale me biu kina na kato ni veiyalayalati i Jiova.+
20 E 20 na kiupiti na balavu ni rumu sara e loma, e 20 na kiupiti na kena raba, e 20 na kiupiti na kena cere,+ e botani ena koula dina, e botana o koya na icabocabonisoro+ ena sitari.
21 E botana o Solomoni na lomanivale ena koula dina,+ e dodoka na sinucodo koula ena mata ni rumu sara e loma,+ e botani ena koula dina.
22 E botana na vale taucoko ena koula me oti sara na vale, e botana tale ga ena koula na icabocabonisoro taucoko+ e volekata na rumu sara e loma.
23 Ena rumu sara e loma e cakava e rua na jerupi+ ena kau na paini,* e tini na kiupiti na kedrau cere.+
24 E dua na taba ni jerupi e lima na kiupiti, e dua tale na tabana e lima na kiupiti. E tini na kiupiti na mua ni tabana qo ina mua ni tabana oya.
25 E tini tale ga na kiupiti na ikarua ni jerupi. E tautauvata ga na kedrau levu kei na kedrau ibulibuli.
26 Na cere ni dua na jerupi e tini na kiupiti, e vaka kina na jerupi kadua.
27 E qai biuti rau na jerupi+ ena loma ni vale e loma.* Erau vakatetaba tu na jerupi me tara na lalaga na mua ni tabana e dua na jerupi, me tara na lalaga na mua ni tabana na jerupi kadua, erau vakatetaba tu me qara ina lomadonu ni vale me sota na tabadrau.
28 E botana o koya na jerupi ena koula.
29 E ceuta wavoki na lalaga ni vale, na rumu e loma kei na rumu e tuba ena ibulibuli ni jerupi,+ na vuniniuniu+ kei na senikau seraki.+
30 E botana na fuloa ni vale ena koula, na rumu e loma kei na rumu e tuba.
31 E cakava ena kau na paini na isogonikatuba ni rumu sara e loma, na duru e sau, kei na duru ni katuba me ikalima ni tikina.*
32 E paini na katuba ruarua, e ceuta kina na jerupi, na vuniniuniu kei na senikau seraki, e botana ena koula qai tukia na koula ena jerupi kei na vuniniuniu.
33 E cakava qori ena katuba ni valenisoro,* e caka ena kau na paini na duru ni katuba, me ikava ni tikina.*
34 E cakava o koya e rua na katuba ena kau junipa. E lobi rua e dua na katuba ni vakabolu, e lobi rua na kena ikarua ni vakabolu.+
35 E ceuta kina na jerupi, na vuniniuniu kei na senikau seraki, qai botana ena koula na ka e ceuta.
36 E tara na raranivale e loma+ ena tolu na iyatu vatu sa ta oti kei na dua na iyatu sitari me icoka.+
37 Ena ika4 ni yabaki ena vula o Sifi,* sa davo oti na yavu ni vale i Jiova,+
38 ena ika11 ni yabaki ena vula o Puli* (oya ena ikawalu ni vula), e oti kina na tikina lalai kece ni vale me vaka na kena peleni.+ E vitu gona na yabaki e tara vale tiko kina.
iVakamacala e ra
^ Ipe., “luvei Isireli.”
^ Se “raba.”
^ Se “20 na kiupiti na raba ni vale.”
^ Qo na Loqi Tabu.
^ Se “ceva.”
^ Oya e lomanivale.
^ Oya na Loqi Tabu, e toka ena mata ni Loqi Tabu Sara.
^ Ipe., “kau waiwai,” de paini na Alepo.
^ Oya na Loqi Tabu Sara.
^ Rairai dusia na caka ni kau ni katuba se na levu ni katuba.
^ Qo na Loqi Tabu.
^ Rairai dusia na caka ni kau ni katuba se na levu ni katuba.
