iMatai ni Veigauna 13:1-14
13 E veivosaki o Tevita kei ira na turaga ni vica vata na udolu kei na vica vata na drau, kei ira na turaga kece.+
2 E kaya sara o Tevita ina ivavakoso taucoko ni Isireli: “Ke vinaka vei kemuni qai vakadonuya o Jiova na noda Kalou, meda talatala mada vei ira na vo ni tacida ena vanua kece e Isireli, vei ira tale ga na bete kei ira na Livai ena nodra koro+ veico, mera lako mai mera tomani keda.
3 Meda lai kauta mai na Kato+ ni noda Kalou.” Nira vakawalena ena gauna i Saula.+
4 Era duavata kece na ivavakoso mera vakayacora qori, ni donu vei ira na tamata kece.
5 E mani soqoni ira kece na Isireli o Tevita mai na uciwai* e Ijipita me yaco sara i Lepo-emaci,*+ mera kauta mai na Kato ni Kalou dina mai Kiriaci-jiarimi.+
6 E lako cake o Tevita kei ira kece na Isireli i Peala,+ i Kiriaci-jiarimi mai Juta, mera kauta cake mai kea na Kato ni Kalou dina o Jiova, e toka e cake vei rau na jerupi,+ e dau cavuti kina na yacana.
7 Ia era vakavodoka na Kato ni Kalou dina ena dua na kareti vou,+ era kauta mai na vale nei Epinatapi, erau liutaka tiko na kareti o Usa kei Eio.+
8 E marau tiko o Tevita kei ira kece na Isireli ena nodra kaukaua taucoko ena mata ni Kalou dina, salavata kei na sere, na api, eso tale na ivakatagi vakawa, na tibereli,+ na sibali,+ kei na biukila.+
9 Ia nira yaco ena rara ni butu covuata nei Kitoni e qai dodoka na ligana o Usa me taura na Kato, ni voleka ni vakalutuma na bulumakau.
10 E waqa sara ga na cudru i Jiova vei Usa, e mokuti koya ni dodoka na ligana me taura na Kato,+ e mani mate e kea ena mata ni Kalou.+
11 E rarawataka o Tevita ni yaviti Usa o Jiova ena dela ni cudru, e qai vakatokai na vanua oya me o Peresiusa* me yacova mai na siga qo.
12 E rerevaka o Tevita na Kalou dina ena siga oya, e kaya: “Au na kauta vakacava mai vei au na Kato ni Kalou dina?”+
13 E sega ni kauta o Tevita na Kato ina vanua e tiko kina ena Koro i Tevita, ia e kauta ga ina vale nei Opeti-itomi na kai Kaca.
14 E tiko na Kato ni Kalou dina ena vuvale nei Opeti-itomi, e tiko ga ena nona vale me tolu na vula, e vakalougatataka tiko ga o Jiova na vuvale i Opeti-itomi kei na ka kece e nona.+
