iMatai ni Veigauna 16:1-43
16 Era mani kauta i loma na Kato ni Kalou dina mera biuta ena loma ni valelaca e birika o Tevita me biu kina,+ era cabora sara na isoro kama kei na isoro ni veiyaloni ena mata ni Kalou dina.+
2 Ni cabora oti o Tevita na isoro kama+ kei na isoro ni veiyaloni+ e qai vosa vakalougatataki ira na lewenivanua ena yaca i Jiova.
3 E vota tale ga o koya vei ira kece na Isireli, vei ira yadua na tagane kei na yalewa na ibuli madrai mokimokiti, na keke vuaniniuniu, kei na ibuli vuanivaini rabaraba.
4 E qai lesia o koya eso na Livai mera veiqaravi ena mata ni Kato i Jiova,+ mera vakarokoroko,* mera vakavinavinaka, mera vakacaucautaki Jiova na Kalou ni Isireli.
5 O Esafa+ na iliuliu, e taravi koya o Sakaraia, eratou qiria na ivakatagi vakawa kei na api+ o Jaeli, o Simiramoci, o Jieli, o Maticaia, o Iliapi, o Penaia, o Opeti-itomi, kei Jaeli,+ o Esafa e qiria na sibali,+
6 o Penaia kei Jeseli, o rau na bete, erau uvuca tiko ga na biukila ena mata ni kato ni veiyalayalati ni Kalou dina.
7 Ena siga oya e cautaka o Tevita ena imatai ni gauna e dua na sere ni vakavinavinaka vei Jiova me lagata o Esafa+ kei ira na tacina:
8 “Moni vakavinavinaka vei Jiova,+ moni masuta na yacana,Moni vakatakila na nona cakacaka vei ira na lewe ni veivanua!+
9 Ni sere vua, sere vua ena vakacaucau,+Vakasamataka vakabibi* na nona cakacaka veivakurabuitaki kece.+
10 Ni sakitaka na yacana tabu.+
Me marau vakalevu na lomadra era vaqarai Jiova.+
11 Vakasaqarai Jiova+ kei na nona kaukaua.
Vakasaqara tiko ga na matana.+
12 Nanuma na cakacaka veivakurabuitaki sa cakava o koya,+Nona cakamana kei na lewa sa tauca,
13 O kemuni na kawa nei Isireli na nona dauveiqaravi,+O kemuni na luvei Jekope na nona digitaki.+
14 O koya ga o Jiova na noda Kalou.+
Sa roboti vuravura taucoko na nona lewa.+
15 Moni nanuma na nona veiyalayalati me tawamudu,Na nona yalayala* vei ira na udolu na itabatamata,+
16 Na veiyalayalati e cakava kei Eparama,+Kei na bubului e cavuta vei Aisake,+
17 E tauyavutaka me ivakaro vei Jekope+Me veiyalayalati tawamudu vei Isireli,
18 E kaya, ‘Au na solia vei iko na vanua o Kenani+Me nomu ivotavota mo taukena.’+
19 Qo ena gauna oni se lewe vica kina,Io oni se lewe vica ga, oni vulagi ena vanua.+
20 Era lako mai na dua na vanua ina dua tale na vanua,Mai na dua na matanitu ina dua tale na mataqali.+
21 E sega ni vakalaiva e dua me vakasaurarataki ira,+Ia e vunauci ira na tui ena vukudra,+
22 E kaya, ‘Kua ni tarai ira na noqu lumuti,Kua tale ga ni cakava na ka ca vei ira na noqu parofita.’+
23 Ni sere vei Jiova, na vuravura taucoko!
Ni kacivaka e veisiga na nona veivakabulai!+
24 Tukuna na nona lagilagi ina veimatanitu,Na nona cakacaka veivakurabuitaki vei ira na lewe ni veivanua kece.
25 Ni cecere o Jiova, e dodonu ga me vakacaucautaki.
Me qoroi vakalevu o koya vei ira kece na vo ni kalou.+
26 Na nodra kalou kece na veimatatamata era kalou tawayaga,+Ia o Jiova ga e bulia na lomalagi.+
27 E tu e matana na lagilagi kei na iukuuku,+E tiko ena nona itikotiko na kaukaua kei na reki.+
28 Solia vei Jiova na ka e nona, o kemuni na vuvale e veivanua,Solia vei Jiova na ka e nona ena vuku ni nona lagilagi kei na kaukaua.+
29 Solia vei Jiova na vakarokoroko e ganita na yacana,+Ni kauta mai na nomuni iloloma moni lako vua.+
Ni cuva vei* Jiova ena isulu savasava.*+
30 Moni rere e matana na vuravura taucoko!
Sa vakataudeitaki o vuravura, ena sega ni yavalati rawa.+
31 Me marau vakalevu o lomalagi, me reki o vuravura,+Me tukuni ina veimatanitu: ‘Sa Tui o Jiova!’+
32 Me vadugu na wasawasa kei na ka e tu kina,Me reki na vanua kei na ka kece e tu kina.
33 Mera kaila tale ga ena marau na kau ni veikau ena mata i Jiova,Ni lako mai o koya me lewai vuravura.
34 Moni vakavinavinaka vei Jiova ni yalovinaka,+Ni sega ni mudu na dei ni nona loloma.+
35 Moni kaya, ‘Ni vakabulai keimami, o kemuni na Kalou na neimami ivakabula,+Ni soqoni keimami moni vakabulai keimami mai na veimatanitu,Me keimami vakavinavinakataka na yacamuni tabu,+Me keimami reki ni vakacaucautaki kemuni.+
36 Me vakacaucautaki o Jiova na Kalou ni IsireliMe tawamudu.’”
Era kaya kece na lewenivanua, “Emeni!”* era vakacaucautaki Jiova sara.
37 E qai biuti Esafa+ e kea kei ratou na tacina o Tevita ena mata ni kato ni veiyalayalati i Jiova me ratou veiqaravi tiko ga ena mata ni Kato+ me vaka na kena ivalavala e veisiga.+
38 O Opeti-itomi kei ira na tacina era le 68, ia o Opeti-itomi na luvei Jitucuni kei Osa erau ivakatawa ni matamata,
39 o Setoki+ na bete kei ira na nona itokani bete eratou tu ena mata ni valeniveitavaki i Jiova ena vanua cecere e Kipioni,+
40 mera cabora tiko ga na isoro kama vei Jiova ena icabocabo ni isoro kama ena mataka kei na yakavi, mera vakayacora na ka kece e volai ena Lawa i Jiova a vakaroti Isireli kina.+
41 E tomani ira o Imani, o Jitucuni,+ kei ira na kena vo e digitaki na yacadra mera vakavinavinakataki Jiova+ ni “dei tu ga me tawamudu na dei ni nona loloma,”+
42 e tomani ira o Imani+ kei Jitucuni me rau uvuca na biukila, na sibali, kei na so tale na iyaya ni qiriqiri me vakacaucautaki* kina na Kalou dina, era tiko ena matamata na luvei Jitucuni.+
43 Era qai lako kece na lewenivanua ina nodra vale, e lako tale ga o Tevita me vosa vakalougatataki ira na lewe ni nona vuvale.
iVakamacala e ra
^ Ipe., “nanuma.”
^ Se rawa ni, “tukuna.”
^ Ipe., “nona ivakaro.”
^ Se “qaravi.”
^ Se rawa ni, “totoka ni nona savasava.”
^ Se “Me yaco mada ga.”
^ Se “iyaya ni qiriqiri me lagati kina na sere.”
