iMatai ni Veigauna 19:1-19
19 Oti e qai mate o Neasi na nodra tui na Amoni, e tui sara na luvena tagane me sosomitaki koya.+
2 E mani kaya o Tevita: “Ena dei na noqu lomani+ Anuni na luvei Neasi ni dei na nona lomani au o tamana.” E tala sara o Tevita eso na italai mera lai vakacegui koya ni sa takali o tamana. Ia nira lako yani na dauveiqaravi i Tevita ina nodra vanua na Amoni+ mera vakacegui Anuni,
3 era kaya na nodra iliuliu na Amoni vei Anuni: “O nanuma ni rokovi tamamu o Tevita ni tala mai eso mera vakacegui iko? Vakaevei, era lako mai vei iko na nona dauveiqaravi mera vakaraica vinaka, mera vakaraica lo na vanua ra qai vukica?”
4 E mani kauti ira na dauveiqaravi i Tevita o Anuni, e toroya na kumidra,+ e kotiva veimama na nodra isulu e butadra qai vakatalai ira.
5 Ni tukuni vei Tevita na ka me baleti ratou na tagane qo, e tala sara eso mera tavaki ratou ni ratou madua vakalevu na tagane qo, e kaya vei ratou na tui: “Dou tiko e Jeriko+ me tubu tale na kumimudou, dou qai lesu mai.”
6 Era qai raica na Amoni ni cati* ira o Tevita, e mani vakauta o Anuni kei ira na kai Amoni e 1,000 na taledi* siliva me saumi kina na qiqinivalu kei ira na dauvodo ose mai Mesopotemia,* mai Arame-meaka, kei Sopa.+
7 Era sauma gona e 32,000 na qiqinivalu, vaka kina na tui Meaka kei ira na nona tamata. Era lako yani mera keba e mata i Metipa.+ Era soqoni vata na Amoni mai na nodra dui koro mera lako yani mera vala.
8 Ni rogoca qori o Tevita e talai Joapi+ kei na mataivalu taucoko, wili kina o ira na nona tamata qaqa sara.+
9 Era lako yani na Amoni mera tuva vakaivalu ena matamatanikoro, ia o ratou na tui eratou a lako yani eratou tiko ga vakataki ratou ena dua na veico.
10 Ni raica o Joapi nira sa toso mai na mataivalu e matana vaka kina e dakuna, e digitaka sara eso na sotia momoqaqa e Isireli qai tuvai ira vakaivalu mera vakasota kei ira na kai Siria.+
11 E lesi ira na kena vo me lewa* o Apisai+ na tacina, me tuvai ira vakaivalu mera vakasota kei ira na Amoni.
12 E qai kaya o koya: “Ke ra kaukaua sara vei au na kai Siria,+ mo mai vukei au, ia ke ra kaukaua sara vei iko na Amoni au na vukei iko.
13 Me daru kaukaua, me daru yaloqaqa+ ena vukudra na noda tamata kei na koro ni noda Kalou, ena qai vakayacora o Jiova na ka e vinaka e matana.”
14 E qai lako yani o Joapi kei ira na nona tamata mera vakasota ena ivalu kei ira na kai Siria, era mani dro mai matana.+
15 Nira raica na Amoni nira sa dro na kai Siria, era drovaki Apisai tale ga na tacina mera lako ina koro. Oti e lako yani o Joapi i Jerusalemi.
16 Nira raica na kai Siria nira sa druka vei ira na Isireli, era qai talatala mera lai kacivi mai na kai Siria era tiko ena yasayasa ni Uciwai,*+ kei Sofaki na iliuliu ni mataivalu nei Etateseri me liutaki ira.+
17 Ni tukuni na itukutuku qori vei Tevita e soqoni ira totolo sara na Isireli taucoko, era takosova sara na Joritani mera lako yani vei ira, era tuva vakaivalu mera vala. E tuva vakaivalu o Tevita me valuti ira na kai Siria, era qai valuti koya.+
18 Ia era drovaki ira na Isireli na kai Siria, e vakamatea o Tevita e 7,000 na dauvodo qiqinivalu, e 40,000 na nodra sotia na kai Siria era taubale, e vakamatei Sofaki na iliuliu ni mataivalu.
19 Nira raica na dauveiqaravi nei Etateseri nira druka vei ira na Isireli,+ e totolo ga nira soro vei Tevita ra qai qaravi koya,+ era sega ni via vukei ira tale na kai Amoni o ira na kai Siria.
iVakamacala e ra
^ Se “nira boi ca vei.”
^ Dua na taledi e tautauvata kei na 34.2 na kilokaramu (1,101 na onisi). Raica na iKuri B14.
^ Ipe., “Arame-naremi.”
^ Ipe., “e liga i.”
^ Oya na Uferetisi.
